د بلخ ولایت اوسېدونکي شکایت کوي چې په مزار شریف کې د بېاسناده موټرو زیاتوالي دې ښار کې جنايي جرمونه زیات کړي دي.
د مزار شریف اوسېدونکي وايي، خلک او زورواکي د بېاسناده موتړو څخه په استفادې قتلونه، وسلهوالې غلاوې او په نورو جرایمو لاس پورې کوي، خو ملي پولیس او د بلخ د ټرافیکو مدیریت تر اوسه نهدي توانېدلي، څو د بېاسناده موټرو پر تګ راتګ بندیز ولګوي.
د مزار شریف دوه تنه اوسېدونکي یې په اړه وايي:
"قیس سجادي یم، د بېاسناده موټرو تګ راتګ د مزار شریف خلک اندېښمن کړي، خلک د بېاسناده موټرو څخه په ګټې اخېستنې سره قتلونه، غلاوې او نور جرایم ترسره کوي."
"محراب دروېش یم، په بلخ کې د بېاسناده موټرو حضور ډېر شوی، دولت باید ورته یوه برنامه ولري، یادو موټرو څخه په استفادې لوی لوی جرایم ترسره کېږي."
د بلخ د امنیه قوماندانۍ چارواکي وايي، هڅه کوي څو د بېاسناده موتړو په تګ راتګ بندیز ولګوي.
د بلخ د امنیه قوماندانۍ ویاند شیر جان دُراني ازادي راډیو ته وویل چې دوی د ګډو ځواکونو په چوکاټ کې هره ورځ د پلټنې تم ځایونه جوړوي او له مزار شریف ښاره د ورځې ۵ تر ۱۰ بېاسناده موټرونه راټولوي.
په همدې حال کې د بلخ د ولایتي شورا غړي هم په مزار شریف ښار کې د بېاسناده موټرو پراخ حضور تأییدوي.
د یادې شورا مشر ډاکتر افضل حدید وايي چې د بېاسناده موټرو ستونزه نهیوازې پر بلخ پورې تړلې ده، بلکې په ټول هېواد کې د بېاسناده موټرو خرڅلاو موجود دی او دا د مرکزي دولت مکلفیت دی، څو د ستونزې د حل په خاطر یوه تګ لاره رامنځته کړي.
ښاغلي حدید وویل:
"بېاسناده موټر نهیوازې په بلخ کې، بلکې په نورو ولایتونو کې هم موجود دي، دا باید ورته مرکزي دولت یوه منظمه تګلاره جوړه کړي، څو ستونزه حل شي."
په عین وخت کې د بلخ د ټرافیکو مدیریت چارواکي وايي چې دوی د پنځه کلن مؤقت پلېټ موټرونو د راټولولو لړۍ پیل کړې، خو د افغانستان لاس بېاسناده موتړو د راټولولو په برخه کې هېڅ ډول برنامه نهلري.
د بلخ د ټرافیکو مدیریت مشر محمد مراد طاهري داسې وویل:
"موږ هغه موټرونه چې د پاکستان لاس وو او پنځه کلن مؤقت پلېټیې درلودل، راټولوو. د افغانستان لاس بېاسناده موتړو د راټولولو په برخه کې موږ ته هېڅ ډول هدایت نهدی راکړل شوی."
دا پهداسې حال کې ده چې د امنیتي چارو د پوهانو په باور چې د بېاسناده موټرو تګ راتګ ته اجازه په بلخ او ګاونډي ولایتونو کې د امنیتي ستونزو د ډېرولو تر څنګ د بااسناده موتړو غلا ته هم زمینه هواره کړې ده.
راپور: مجیبالرحمن حبیبزی