په بلخ ولایت کې کوچیان د تعلیمي امکاناتو له نشتوالي او روغتیايي مرکزونو ته د نهلاسرسي په اړه شکایت کوي.
دې ولایت کې د کوچیانو عمومي ریاست مشر غلام فاروق عبیدي ازادي راډیو سره په خبرو کې ادعا کړې چې د بلخ په ۹ ولسوالیو کې کوچیان مېشت دي، خو له څو کلونو راهیسې ورته هېڅ ډول تعلیمي امکانات نهدي مساعد شوي او ماشومانیې ښوونځیو ته له تلو محروم شوي دي.
نوموړی وايي:
"ښوونځي نهلرو، زموږ ماشومان تعلیمي خدماتو ته لاسرسی نهلري، هېڅ ډول پروژه او تعلیمي برنامې د پوهنې ریاست لهخوا کوچیانو ته نهدي تطبیق شوي او زموږ ماشومان بې زدهکړې لویېږي."
په عین حال کې د بلخ د پوهنې ریاست مشر صبغتالله مستقیم وايي، تر هغو چې کوچیان له کوچي حالت څخه راونهوځي او په یوې ځانګړې سیمه کې مېشت نهشي، دوی نهشي کولای کوچیانو ته د زدهکړې زمینه مساعده کړي.
صبغتالله مستقیم پهدې باب وویل:
"کوچیان په یوه ځای کې مېشت نهدي او دا شونې نهده چې هغوی هر ځای چې غواړي کډه شي او موږ ورته په هغه ساحه کې ښوونځی پرانیزو."
د صحي مرکزونو نشتوالی بله ستونزه ده چې د کوچیانو ماشومان او ښځې ورسره لاس او ګرېوان دي، هغوی په لیرو پرتو سیمو کې روغتیايي چوپړتیاو ته لاسرسی نهلري او د کوچیانو ریاست مسؤلان یادې موضوع ته د رسیدګۍ په برخه کې د بلخ عامې روغتیا ریاست مسؤلان په بېپامۍ تورنوي.
د بلخ د کوچیانو ریاست مشر غلام فاروق عبیدي داسې وايي:
"د کوچیانو ښځې او ماشومان چې په لیرو پرتو سیمو او دښتو کې ژوند کوي، هېڅ ډول روغتیايي خدمات نه ورته ترسره کېږي، په بلخ کې د کوچیانو ډېری ماشومان د زېږدنې پر وخت مري. موږ ته روغتیايي خدمات نهشته."
په همدې حال کې د بلخ د عامې روغتیا ریاست د کوچیانو څانګې مسؤل ډاکتر فهیم شریفیار وايي چې په ۹ ولسوالیو کې د کوچیانو لپاره سیار روغتیايي مرکزونه فعال دي.
هغه وویل چې یوازې په تېره یوه میاشت کې د عامې روغتیا ریاست ۱۸۰۰ کوچیانو ته په عمومي او نسایي ولادي برخو کې روغتیايي خدمات ترسره کړي دي.
ښاغلي شریفیار پهدې هلکه وویل:
"یوازې په همدې تېره میاشت کې موږ ۱۸۰۰ تنو کوچیانو ته صحي خدمات ترسره کړل چې پهکې د عمومي امراضو، ولادي او نسايي برخې شاملې وې."
دا چې په بلخ کې شته کوچیان تعلیمي مرکزونو او صحي خدماتو ته د لاسرسي په برخه کې له ستونزې سره مخ دي، د یادې مسئلې د حل په برخه کې ازادي راډیو وغوښتل د افغانستان د بشر حقونو خپلواک کمېسیون نظر هم له ځان سره ولري، خو د یاد بنسټ ویاند بلال صدیقي ازادي راډیو ته وویل چې د بشر حقونو خپلواک کمېسیون د کوچیانو د ستونزو په اړه هېڅ ډول فعالیت نهدی ترسره کړی.
نهیوازې په بلخ کې کوچیان د تعلیمي امکاناتو او روغتیايي خدماتو له نشتوالي ځورېږي، بلکې د شمال زون د کوچیانو د ټولنې د معلوماتو پر اساس چې په جوزجان، سرپل، فاریاب او سمنګان کې هم کوچیان له ورته ستونزې سره مخ دي.
راپور: مجیبالرحمن حبیبزی