د ارزګان ولایت د چهارچینو ولسوالۍ سیمهییز چارواکي وايي، دغه ولسوالۍ وسلهوالو طالبانو له تېر یوه کال راهیسې محاصره کړې، خو ولایتي او مرکزي ادارې ورته لاس تر زنې ناست دي.
د یادې ولسوالۍ ولسوال محمد کریم کریمي د ټیلیفون پر کرښه د سې شنبې په ورځ ازادي راډيو ته وویل چې د یادې ولسوالۍ نیم بازار د وسلهوالو طالبانو په ولکه کې ده او د دوی یوازې یو د ملي اردو کمپ په لاس کې دي.
نوموړی وايي، په یاده ولسوالۍ کې د دولت تر ولکې لاندې سیمو کې ښوونځي، روغتیايي مرکز او نه هم نورې ادارې لري.
ښاغلي کریمي وویل:
"چهارچینو ولسوالۍ له تېر یوه کال راهیسې وسلهوالو طالبانو داسې محاصره کړې چې زموږ یوازې د ملي اردو یو کمپ په لاس کې دی او موږ په دغه کمپ کې اوسېږو، د کمپ په ۲۰۰ متري کې وسلهوال طالبان دي، نور ټوله ولسوالۍ د طالبانو په لاس کې ده."
د ارزګان ولایت امنیه قوماندان محمد معروف احمدزی بیا دا نه مني چې یاده ولسوالۍ وسله والو طالبانو محاصره کړې وي، خو دا مني چې هلته زیاتې سیمې د طالبانو په لاس کې دي.
بل خوا امنیتي مسؤلین خبر ورکوي چې په مرکز ترینکوټ کې یې د عملیاتو پر مهال ۵۰ وسله والو طالبانو ته مرګ ژوبله اړولې.
د وسله والو طالبانو ویاند قاري یوسف احمدي ازادي راډيو ته په یوه استولي برښنالیک کې ویلي چې دغلته د افغان پوځ روان عملیات یې پر شا تمبولي او زیات شمېر افغان سرتېرو ته یې مرګ ژوبله اړولې.
په دې اړه نور حال د ازادي راډيو د خبریال شریف الله شرافت په راپور کې چې د لاندې لېنک په کېکاږلو سره یې اورېدلی شئ:
