د ننګرهار روغتیايي چارواکي وايي، تر پرون یکشنبې د جلالاباد ښار په موټر بم برید کې د وژل شویو کسانو شمېر ۱۹ تنو ته ورسېد.
په ننګرهار کې د پروني موټر بم برید اکثر وژل شوي او ټپیان افغان سېکهان دي.
دا خبره د ننګرهار د عامې روغتیا رئیس ډاکتر نجیبالله کامهوال تېره شپه ازادي راډیو ته وکړه.
ښاغلي کامهوال زیاته کړه:
"په تأسف سره ووایم، کومه پېښه چې په جلالاباد ښار کې شوې موږه ۱۹ تنه اجساد لرو او ۲۱ تنه هم ټپیان لرو. ۱۳ تنه اجساد موږ ثابت کړي چې اهل هنود وروڼه دي. د څلورو هویت نهدی ثابت چې فکر کوو دا به هم اهل هنود وروڼه وي. ۲۱ تنه ټپیان دي چې ۷ تنهیې اهل هنود وروڼه دي. ۴ تنه تر تداوي وروسته رخصت شول او نور ټپیان تر جدي مراقبت لاندې دي."
ښاغلي کامهوال وویل، د ټپیانو درملنه روانه ده او یوازې د یوه ماشوم وضعیت نازک دی.
په جلالاباد ښار کې موټر بم برید پرون په مخابراتو څلورلاري کې ډېری هغه کسان هدف ګرځولي چې له شاهي ماڼۍ نه د افغان ولسمشر اشرف غني له لیدنې وروسته بېرته راګرځېدلي وو.
پهدې ډله کې د اوتار سنګهـ په مشرۍ د افغان هندوانو او سېکهانو یوه ډله هم شامله وه.
اوتار سنګهـ د افغان سېکهانو او هندوانو د شورا مشر او د دوی له ډلې د ولسي جرګې انتخاباتو ته یوازنی کاندید و.
د ننګرهار د عامې روغتیا رئیس ډاکتر نجیبالله کامهوال د اوتار سنګهـ وژل کېدل تأیید کړل.
ده وویل:
"تر اوسه پورې چې موږ ته ۱۳ تنه مړي مشخص شوي دي پهدې کې د اوتار سنګهـ په نوم چې موږ هم اورېدلي چې ولسي جرګې ته نوماند و هغه هم پهکې شامل دی."
اوتار سنګهـ موده مخکې له ازادي راډيو سره هم خبرې کړې وې چې ویلیې د خلکو د خدمت لپاره د ولسي جرګې انتخاباتو ته کاندید شوی دی.
ښاغلي اوتار سنګهـ زیاته کړې وه:
"له هر ځای چې ماته کوم پیغام راغلی او زموږ په خلکو کې کومه ستونزه راغلې ما دا نهدي ورته ویلي چې دا شپه ده که ورځ ده، غرمه ده که ماښام دی ورته وتلی یم ځان باندې مې قرباني منلې او خدمت مې کړی. زما ارزو دا نهده چې یوازې سېکهـ یا هندو ته خدمت وکړم زما هیله دا ده چې د افغانستان په ولسوالیو کې په ولایتونو او کلیو کې خلک خپلو حقونو ته ورسوم."
په وژل شویو کې په اوتار سنګهـ سربېره د ځینو راپورونو پر اساس د راوېل سنګهـ او اقبال سنګهـ په څېر د افغان سېکهانو او هندوانو د ځیني نور مشران هم شامل دي.
په ننګرهار کې پهداسې حال کې عام افغانان په یوه برید کې ووژل شول چې ویل کېدل په جلالاباد ښار کې د ولسمشر اشرف غني د سفر لپاره کلک امنیتي تدابیر نیول شوي وو.
راپور: صفيالله ستانکزی
