د بخښنې نړيوال سازمان يا امنسټي انټرنشنل له پاکستانه غوښتي چې د بشري حقونو د مدافعينو، خبريالانو او فعالانو ځپنه ودروي.
د بخښنې نړيوال سازمان د پنجشنبې په ورځ په خپره کړې اعلامیه کې ويلي چې په پاکستان کې د وروستيو غير قانوني توقيفونو، په زوره د خلکو د ورکېدو او د بیان پر ازادۍ د حملو په خاطر دغه اداره سخته اندېښنه لري.
اعلاميه وايي، دا په داسې حال کې ده چې د ۲۰۱۸ میلادي کال د جولای مياشتې په ۲۵مه نېټه به په پاکستان کې د راتلونکي ملکي حکومت لپاره انتخابات کېږي.
د بخښنې نړيوال سازمان په خپله اعلاميه کې له پاکستانه غوښتي چې هغه ۳۷ فعالان ژر تر ژره راخوشې کړي چې د پښتون ژغورنې غورځنګ په لاريونونو کې د ګډون په خاطر اوسمهال په اډياله زندان کې بندي دي.
د اعلاميې له مخې په دغو توقيف شويو کسانو کې ډېری محصلین دي او ډېر ژر یې امتحانونه راروان دي.
د دوی پر ضمانت د راخوشې کېدو غوښتنه رد شوې ده او قضيهيې اوس د ترورېزم پر وړاندې د مبارزې يوې محکمې ته وړاندې شوې ده.
اعلاميه زياتوي چې دغو کسانو يوازې د بیان د ازادۍ حق عملي کړی دی.
امنسټي انټرنشنل همداراز د یوې پاکستانيالاصلې بریتانوۍ فعالې ګل بخاري چې څو ساعته توقيف شوې وه، په اړه هم اندېښنه څرګنده کړې ده او ويلي يې دي چې مېرمن بخاري د پاکستان پر پوځ انتقاد کاوه او د پښتون ژغورنې غورځنګ ملاتړ یې کاوه.
د اعلاميې له مخې، ګل بخاري وروسته له هغه توقيف شوه چې د پاکستان د پوځ وياند په يوه خبري کنفرانس کې شکايت وکړ چې د ټولنيزو شبکو کاروونکي د پاکستان پر دولت انتقاد کوي.