کابل چاپ ورځپاڼو په خپلو نننیو ګڼو کې هم د را روانو انتخاباتو په اړه یو شمېر لیکنې او سرلیکنې چاپ کړي دي.
- مسیر
مسیر خپلواکې ورځپاڼې پهدې اړه په خپله سرمقاله کې لیکلي، ټاکنې کېږي که مسخره کېږي؟
ورځپاڼه لیکي د ټاکنو لپاره د نوملېکنې او تیاریو په تړاو اندېښنې ورځ تر بلې زیاتېږي، له یوه اړخه د خلکو کمه نوملیکنه او له بله اړخه د ټاکنو په څرنګوالي او پروسیجرونو جدي نیوکې شته چې نه ورته د ټاکنو کمېسیون وړ ځواب لري او نهیې هم حکومت په تړاو څرګند دریځ.
په سرمقاله کې راغلي، دغو اندېښنو ته په پام سره اوس پوښتنه دا ده چې د راتلونکو ټاکنو برخلیک به څه وي؟
ورځپاڼه دا هم لیکي چې اوس خلک نوملېکنه نهکوي او د نوملیکنې لپاره مشخصې غوښتنې لري، خو کمېسیون او حکومت د خلکو د غوښتنو پرځای یوازې هڅونه کوي چې په باور یې، د ټاکنو لپاره د کمېسیون او حکومت اوسنۍ کړنې د ټاکنو د مسخره کولو په معنی دي.
- دنیا
دنیا خپلواکې ورځپاڼې پهخپله سرمقاله کې د موضوع په تړاو لیکلي دي، را روان انتخابات به د خلکو او حکومت تر منځ ګڼ مسایل روښانه کړي.
په سرمقاله کې راغلي دا به هم روښانه شي چې خلک په کومه اندازه د یوې مهمې ملي پروسې د امنیت په خوندیتوب کې د حکومت په وړتیا باور لري او دا هم چې ایا حکومت کولای شي د یوې روغې او شفافې پروسې په اړه خلکو ته ژمنه ورکړي؟
ورځپاڼه لیکلي، تراوسه د رأیو ورکوونکو د نوملېکنې بهیر ډېر پڅ روان دی، خو حکومت مسؤلیت لري چې په پاتې موده کې خلک پهدې قانع کړي چې په را روانو انتخاباتو کې په خپل پراخ ګډون سره، له زور واکو د درغلیو فرصت واخلي، کوم چې د ورځپاڼې په باور د یو شمېر راپورونو له مخې سر له اوسه ورته ملاې تړل شوې دي.
- ملي ارمان
ملي ارمان خپلواکې ورځپاڼې بیا د ولسي جرګې او ولسوالیو د شوراګانو د انتخاباتو په اړه د ولسمشرۍ د تېر ځل په انتخاباتو کې د ولسمشر محمد اشرف غني د یو رقیب زلمي رسول په حواله لیکلي دي.
د مطلب لیکونکی لیکي، ښاغلي رسول ویلي چې د افغانستان خلک نور په هېڅ وجه تقلبي انتخابات نهمني، د ورځپاڼې په خبره نوموړي دا هم ویلي که څوک داسې فکر کوي نو دا ناشونې ده.
- انیس
انیس دولتي ورځپاڼې بیا په خپل یو مطلب کې پهدې اړه لیکلي، په کابل کې د امریکا سفیر جان بس ویلي چې هېواد یې په بېلابېلو برخو لهدې ډلې د انتخاباتو په برخه کې له افغانستان سره مرسته وکړي.
انیس لیکلي، په کابل کې د امریکا سفیر زیاته کړې چې په افغانستان کې انتخابات د دغه هېواد خلکو او نړیوالې ټولنې لپاره ډېر مهم او با ارزښته دي.
په مطلب کې د نوموړي په حواله دا هم راغلي چې د شفافو او عادلانه انتخاباتو د جوړولو لپاره له افغان حکومت سره زموږ هڅې روانې دي او دا د افغان دولت او د افغانستان د انتخاباتو د خپلواک کمېسیون مسؤلیت دی چې انتخابات په شفاف ډول ترسره کړي.