په کندهار کې د ولسي جرګې او ولسوالیو د شوراګانو د راتلونکو ټاکنو لپاره د نوم لیکنې پروسه پیل شوه، خو دا ځل د مرکزونو په شمېر کې د پام وړ کموالی راغلی.
د کندهار والي تورن جنرال زلمي ویسا د نوم لیکنې د پروسې د پیل په مراسمو کې وویل چې د دې ولایت ګډو امنیتي ځواکونو د رأی ورکوونې د ټولو مراکزو د امنیت ډاډ ورکړی او هم د کندهار په کچه د رأی ورکولو لپاره زمینه مساعده شوې ده.
والي د کندهار لپاره د رأی ورکوونې مرکزونه کم وبلل او په عین وخت کې يې په راتلونکو ټاکنو کې د خلکو د پراخ حضور غوښتنه وکړه.
ښاغلي ویسا زیاته کړه:
"د کندهار ښار او ۱۷ ولسوالیو کې ټول مرکزونه فعال دي او کوم امنیتي مشکل نشته، په ځینو ځایونو کې تهدیدات شته، زه پهدې ډاډه یم."
د کندهار اوسېدونکي او قومي مشران هم د کندهار لپاره د ټاکنو د رأی ورکوونې د مرکزونو شمېر د دغه ولایت نفوس ته کم بولي.
چارواکي او خلک: کندهار کې د رأی ورکوونکو د نوم لیکنې مرکزونه کم دي
دوی دغه راز له قومي مشرانو او ملا امامانو غواړي چې خلک د رأیه ورکوونکو د نوم لیکنې پروسې ته را وبولي، څو د ټاکنو په پروسه کې خپله شمېره زیات کړي او خپله رأیه وکاروي.
په عین وخت کې د کندهار د انتخاباتو د خپلواک کمېسيون مشر هاشم دُرانی وايي، د کندهار د رأیه ورکوونکو د مرکزونو د زیاتولو په اړه يې مرکز ته وړاندیز کړی او هغوی به ډېر ژر پهدې برخه کې تصمیم ونیسي.
کندهار ولایت چې شاوخوا درې میلونه نفوس لري، خو د مرکزي حکومت له خوا ورته ۲۲۵ د رأی ورکوونې مرکزونه ورکول شوي دي، خلک وايي، دا ونډه د شاوخوا یو میلیون وګړو لپاره بلل شوې ده.
راپور: صادق رښتینی