د بخښنې نړیوال سازمان یا امنېسټي انټرنشنل وایي، په افغانستان کې د اعدامونو ترسره کول د دې هېواد له ثبات سره مرسته نهکوي او هغه باید عملي نهشي.
د بشري حقونو دغې نړیوالې ډلې په نړۍ کې د ۲۰۱۷ میلادي کال د اعدامونو په اړه په هغه راپور کې چې نن پنجشنبهیې خپور کړی ويلي چې پهدې کال په افغانستان کې پنځه تنه په اعدام محکوم په دار ځړول شوي او دا کار هغه هم په بیړه د ترهګریزو حملو د زیاتېدو په غبرګون کې شوی دی.
په لندن کې دېره د بخښنې نړیوال سازمان د اعدام د سزا د برخې سلاکارې کیارا سانجیورجیو د چهارشنبې په ورځ ازادي راډیو ته وویل:
"داسې ښکاري چې اعدامونه پهدې هېواد کې د شویو حملو په عکسالعمل کې ترسره شوي. موږ پهدې پوه یو چې د مرګ سزا د ستونزې له حل سره مرسته نهشي کولای او د همدې لپاره موږ د افغانستان له ولسمشره غوښتنه کړې چې نور دې د اعدام سزاوې نهعملي کوي، ځکه هغه به د هېواد له ثبات سره چې زما په فکر موږ ټولیې غوښتونکي یو، مرسته ونهکړي."
د بخښنې نړیوال سازمان وایي، که څه هم په ۲۰۱۷ میلادي کال کې په نړۍ کې د اعدامونه اندازه د وړم کال په نسبت ډېره راکمه شوې، خو د افغانستان درې ګاونډیان ایران، پاکستان او چین د نړۍ د هغو پنځو هېوادونو په کتار کې راغلي چې تر ټولو زیات اعدامونه پهکې ترسره شوي دي.
د تأیید شویو ۹۹۳ اعدامونو له جملې له نیمایي زیات یعنې ۵۰۷یې په ایران کې ترسره شوي او په پاکستان کې هم د تأیید شویو شمېر ۶۰ ښودل شوی دی.
د راپور له مخې د چین په اړه چې هر کال په زرګونه کسان اعداموي شمېرې نهشته ځکه دا هېواد دغسې معلومات دولتي راز بولي.