په کابل کې خپرېدونکو ورځپاڼو نن بیا هم کابل ته د پاکستان د ملي امنیت د سلاکار د سفر او د دغه هېواد لومړي وزیر ته د ولسمشر اشرف غني په بلنې لیکنې خپرې کړې دي.
- سرخط
سرخط ورځپاڼې لیکلي دي چې د پاکستان لومړی وزیر شاهد خاقان عباسي په کابل کې په خپله لومړنۍ لیدنه کې د افغان دولت او طالبانو ترمنځ د خبرو په سر په نویو پیغامونو له افغان مشرانو سره بحثونه وکړي.
ورځپاڼه لیکي چې د پاکستان د لومړي وزیر د ملي امنیت سلاکار ناصر جنجوعه کابل ته د سولې په تړاو د نوې همکارۍ له پیغام سره راغلی و او ټاکل شوې ده چې د نورو جزئیاتو پر سر د پاکستان د حکومت مشر کابل ته په خپل سفر کې له افغان ولسمشر سره چنې ووهي.
د ورځپاڼې په باور په سیمه او نړۍ کې موجوده حالات له پاکستان سره یاري نهکوي او د ښاغلي غني د سولې وړاندیز هم پاکستانیان او هم د هغوی له ملاتړه برخهمند طالبان په یوه تاریخي دوه لاري کې درولي چې یوهیې د روغې او بلهیې د جګړې خوا ته تللې.
- ملي ارمان
ملي ارمان ورځپاڼې بیا کابل ته د پاکستان د ملي امنیت د سلاکار سفر ته په اشارې د مشرانو جرګې د ځینو غړو په حواله لیکلي دي چې افغان حکومت باید د پاکستان په ژمنو ونهغولېږي.
ورځپاڼه لیکي:
یو شمېر سناتورانو له طالبانو سره د خبرو لهپاره د افغان حکومت د سولې له وړاندیز او د کابل او اسلاماباد ترمنځ د دولتونو په کچه د ډیالوګ د پیلولو څخه د پاکستان ملاتړ ته په اشارې ویلي دي چې اسلاماباد په خپلو ژمنو ولاړ نهدی.
ورځپاڼې د سناتورانو په حواله دا هم لیکلي دي، که پاکستان درواغ نهوایي، نو پر طالبانو دې فشار راولي چې د افغان حکومت د سولې وړاندیز دې ومني او د هغې پر بنسټ دې اوربند اعلان کړي.
ورځپاڼې د مطلب په پای کې د سناتورانو دا نظر هم راخیستی چې ویلي دي، کابل ته د پاکستاني چارواکو د زیاتېدونکي تګ راتګ اساسي علت د امریکا فشارونه دي چې دا هېڅکله هم دا معنی نهلري چې اسلاماباد د افغانستان سولې ته صادق دی.
- هېواد
هېواد دولتي ورځپاڼې بیا لیکلي دي چې امریکا یو ځل بیا ټینګار کړی دی چې پاکستان باید د طالبانو او نورو سخت دریځو پر وړاندې جدي اقدام وکړي.
ورځپاڼه لیکي چې د امریکا مرستیال ولسمشر د پاکستان له لومړي وزیر سره په لیدنه کې د ولسمشر ډونالد ټرمپ دا غوښتنه تکرار کړه چې پاکستان باید په خپله خاوره کې د طالبانو، حقاني شبکې او نورو ترهګرو ډلو حضور پای ته ورسوي.
خو ورځپاڼې په خپله سرلیکنه کې لیکلي دي چې تر نړیوال فشار لاندې پاکستان لا هم د ترهګرو ډلو ملاتړ کوي او د همدغو ترهګرو ډلو پر مټیې له افغانستان سره جګړه روانه ساتلې ده.
خو د ورځپاڼې په وینا دا په هېڅ ډول د منلو وړ نهدي، پاکستان باید خپله ترهګریزه پالېسي پای ته ورسوي او پر ځای یې له افغانستان، امریکا او نورو هېوادونو سره همکاري وکړي.
ورځپاڼې د خپل بحث په دوام لیکلي دي چې په همدې هیله ولسمشر اشرف غني د پاکستان لومړي وزیر ته د کابل د سفر بلنه ورکړې ده او حکومت د پاکستان د ځواب په تمه دی.
- افغانستان ما
افغانستان ما ورځپاڼې هم د طالبانو او نورو ترهګرو ډلو په وړاندې په مبارزه کې د پاکستان د لا زیاتې همکارۍ په اړه د امریکا په ټینګار بحث کړی دی.
ورځپاڼې لیکلي دي چې د امریکا لهخوا دا غوښتنه داسې مهال تکرار شوې چې لهدې مخکې امریکایي چارواکو پر پاکستان تور پورې کړی و چې هغو ترهګرو تهیې په خپله خاوره کې پناه ورکړې چې د دوی پر وړاندې په افغانستان کې جګړه کوي.
د ورځپاڼې په وینا د امریکا ولسمشر ډونالد ټرمپ هم ویلي و چې پاکستان په تېرو ۱۷ کلونو کې د امریکا مشرانو ته دوکه ورکړې چې دا ډول چلند باید فوراً پای ته ورسول شي.
- دنیا
دنیا ورځپاڼې بیا لیکلي دي چې پاکستان به د نړیوالې ټولنې له فشارونو د خلاصون لهپاره د افغانستان له لوري د دولتونو ترمنځ د مخامخ خبرو وړاندیز درک نهکړي.
خو ورځپاڼې دا اشاره هم کړې چې د افغانستان او پاکستان ترمنځ ستونزه به تر هغو حل نهشي چې د افغان حکومت ملاتړی هېواد امریکا د نړۍ او سیمې له لویو قدرتونو سره د جنګ د پای ته رسولو او سولې لهپاره یوه اجماع رامنځته نهکړي.
ورځپاڼې لیکلي دي چې د افغانستان او پاکستان ترمنځ د دولتونو په کچه خبرې به په اساسي مسئلو متمرکزې وي چې پهکې د سولې او له ترهګرۍ سره د مبارزې په تړاو خبرې شاملې دي.