د افغانستان د کورنیو چارو وزارت هغه راپورونه چې ګواکې د فراه ولایت د انار درې ولسوالۍ د طالبانو په ولکه کې ده، رد کړل او وايي چې د دغې ولسوالۍ مرکز تېره شپه د نیم ساعت لپاره وسلهوالو طالبانو نیولی و، خو اوس د افغان ځواکونو په کنټرول کې دی.
د دغه وزارت مرستیال ویاند نصرت رحیمي د دوشنبې په ورځ ازادي راډیو ته وویل چې نن ورځ دوشنبه غرمه مهال د افغان هوايي ځواکونو د بمبار او ځکمنیو قطعاتو د عملیاتو په پایله کې شااوخوا ۵۶ وسلهوال طالبان وژل شوي او لسګونه نور ټپیان دي.
د نوموړي په خبره دا مهال د دغې ډلې غړي د ولسوالۍ په شااوخوا کې د افغان ځواکونو له لوري د محاصرې په حال کې دي.
رحیمي زیاته کړه:
"په بشپړ ډول د انار درې ولسوالۍ مرکز د امنیتي ځواکونو په کنټرول کې دی، په دغې ولسوالۍ کې د افغانستان د خلکو ټول دښمنان د امنیتي ځواکونو په محاصره کې دي."
ښاغلی رحیمي زیاتوي، د انار درې ولسوالۍ په مرکز د وسلهوالو طالبانو په حمله کې د دغې ولسوالۍ د امنیه قوماندان په ګډون ۷ سرتېري وژل شوي او ۱۰ نور ټپیان دي.
په ورته وخت کې د دفاع وزارت ویاند دولت وزیري د دوشنبې په ورځ ازادي راډيو ته وویل، پر ولسوالۍ باندې د وسلهوالو طالبانو له حملې وروسته دولتي ځواکونو د تلفاتو د مخنیوي لپاره د انار درې ولسوالۍ له مرکزه شااوخوا ۵۰۰ متره په شا تګ کړی.
د نوموړي په خبره دمګړۍ له وسلهوالو طالبانو د سیمو د نیولو لپاره پراخ پوځي عملیات پیل شوي دي.
دا په داسې حال کې ده چې د فراه د ولایتي شورا د یو شمېر غړو په وینا وسلهوالو طالبانو تېره شپه د انار درې ولسوالۍ پر مرکز حمله کړې ده.
د دوی په خبره په دغې حمله کې وسلهوال طالبان توانېدلي چې د ولسوالۍ او امنیه قوماندانۍ ودانۍ تر خپل کنټرول لاندې راولي.
فراه ولایت په دې وروستیو اوونیو کې د یو لړ ناامنیو او پېښو شاهد و.
دوه ورځې وړاندې د دغه ولایت د ولایتي شورا رئیس تأیید کړې وه چې د بالابلوک په ولسوالۍ کې د وسلهوالو مخالفینو په حمله کې ۱۸ افغان سرتېري وژل شوي وو او درې تنهیې لادرکه دي.
په ورته وخت کې د ولایتي شورا رئیس فرید بختور وايي، وسلهوالو طالبانو تېره شپه د دغه ولایت په انار درې ولسوالۍ باندې حمله کړې چې په نتیجه کې د ولسوالۍ او امنیه قوماندانۍ ودانۍ د طالبان لاس ته لوېدلې دي.
نوموړی وايي:
"هلته د ملي امنیت چې کوم مدیریت دی او د ملي اردو په قرارګاه باندې سخت جنګ روان دی. د سیمې د خلکو د معلوماتو پر اساس امنیتي ځواکونو ته له ۱۰ تر ۱۵ تنو مرګ ژوبله اوښتې، دښمن ته هم تلفات رسېدلي دي."
په ورته وخت کې د ولسي جرګې د دوشنبې د ورځې په عمومي غونډه کې د فراه ولایت استازو د دغه ولایت په ناامنیو باندې خبرې وکړې.
د دغې جرګې رئیس عبدالرؤف ابراهیمي له دولته وغوښتل چې د وسلهوالو مخالفینو د حملو د په شا تمبولو لپاره جدي تدابیر ونیسي.
راپور: رحمتالله افغان
- پخواني معلومات
د افغانستان دفاع وزارت وايي، د انار درې ولسوالۍ د مرکز د بېرته نيولو لپاره سيمې ته تازه دمه پوځيان رسېدلي دي.
د دغه وزارت وياند تورن جنرال دولت وزيري تأييدوي چې افغان ځواکونه د ولسوالۍ له مرکز څخه شا ته شوي دي.
تر دې مخکې د فراه د ولايتي شورا رئيس فريد بختور ازادي راډيو ته ويلي و چې د دولت وسلهوالو مخالفینو تېره شپه د ولسوالۍ مرکز نيولى دى.
وسلهوالو طالبانو ادعا کړې چې دغه ولسوالۍ يې نيولې او په حمله کې يې ١٥ سرتېري وژلي او درې ټانکونهيې نيولي دي.
- پخواني معلومات
د فراه د ولايتي شورا رئيس وايي، د دولت وسلهوالو مخالفینو تېره شپه د انار درې ولسوالۍ نيولې ده.
فريد بختور نن دوشنبه سهار ازادي راډيو ته وويل چې په ولسوالۍ کې د افغان امنيتي ځواکونو او وسلهوالو ترمنځ شديده جګړه روانه ده.
د فراه ولايت چارواکو رسماً د دولت وسلهوالو مخالفینو ته د انار درې ولسوالۍ د ورلوېدو په اړه څرګندونې نهدي کړي.
تر دې مخکې دفاع وزارت د فراه د ځينو سناتورانو د اندېښنو په ځواب کې ويلي و چې افغان امنيتي ځواکونو په فراه کې ١٣ هوايي عمليات کړي دي.
د دغه وزارت وياند وويل چې په فراه ولايت کې د دوى پوځي عملياتو ځيني پرمختګونه کړي دي.
په مشرانو جرګه کې د فراه سناتور محمد سرور عثماني ازادي راډيو ته ويلي و چې وسلهوالو د فراه ښار ١٥ کېلو مترۍ ته رسېدلي دي.