د افغان حکومت اجرائیه رئیس وایي، د افغانستان حکومت له ټولو هېوادونو او نړیوالو سازمانونو غوښتي چې د ترورېزم د ملاتړو هېوادونو پر وړاندې د مقابلې په برخه کې د افغانستان همکار واوسي.
د ملګرو ملتونو عمومي منشي د افغانستان د سولې د ټینګښت لپاره پر سیمهییز یووالي او همکارۍ ټینګار وکړ.
انتونیو ګوترش د افغان حکومت له اجرائیه رئیس عبدالله عبدالله سره د لیدو پر مهال دغهراز وویل چې د ملګرو ملتونو سازمان د انتخاباتو، اصلاحاتو او په افغانستان کې د سولې د هڅو په برخه کې لهدغه هېواد سره همکاریو ته دوام ورکوي.
د اجرائیه رئیس مرستیال ویاند جاوید فیصل ازادي راډیو ته وویل چې د دوشنبې په ورځ په ژنیو کې د لیدنو کتنو پر مهال د افغانستان پر مهمو مسایلو بحث وشو.
نوموړی وايي:
"په دغې کتنه کې د افغانستان د سیاسي او امنیتي وضعیت، د افغانستان د پارلماني او ولسمشرۍ ټاکنو، د اصلاحاتو پر پروسه او همداراز د کابل پروسې پر کنفرانس باندې بحث وشو. د افغانستان د سولې په ارتباط د سیمې هېوادونو پر همکارۍ او صادقانه عمل باندې هم دواړو لورو نظرونه تبادله کړل."
د افغان حکومت اجرائیه رئیس په دې لیدنه کې چې په ژنیو کې د ملګرو ملتونو د سازمان د بشري حقونو د شورا د ۳۷مې غونډې په څنډو کې ترسره شوه، دغهراز وویل چې افغانستان او متحدینیې هڅه کوي څو د کابل د پلانونو د ملاتړ او له ستونزو سره د مقابلې په برخه کې په ګډه کار وکړي.
عبدالله عبدالله ویلي چې د افغانستان حکومت له ټولو هېوادونو او نړیوالو سازمانونو غواړي چې د ترورېزم د ملاتړو سره د مقابلې په برخه کې له افغانستان سره همکار واوسي.
نوموړی زیاتوي:
"د ملکي تلفاتو کمول، زموږ لپاره تر ټولو ډېر اهمیت لري. موږ د ملګرو ملتونو د امنیت شورا سره د افغانستان د امنیتي وضعیت په اړه خبرې کړي دي او کابل ته د هغوی د وروستي سفره مننه کوو. هغه ځای چې موږ دغه پلاوي ته داسې کره شواهد وړاندې کړل چې ښیي یو حکومت ترورېستي شبکې تمویلوي، هلته روزنه ویني او پناه ځایونه لري."
د ملګرو ملتونو د امنیت شورا پلاوی د روان کال د جنورۍ پر ۱۳مه نېټه کابل ته تللی و او هلتهیې له افغان ولسمشر، اجرائیه رئیس او نورو لوړپوړو افغان چارواکو سره ولیدل.
هغه مهال ولسمشر اشرف غني د امنیت شورا له ورغلي پلاوي وغوښتل چې پر پاکستان فشارونه ډېر کړي، ځکه افغان حکومت په دې باور دی چې وسلهوال طالبان او حقاني شبکه په پاکستان کې پناه ځایونه لري او له هغه ځایه پر افغانستان بریدونه کوي یا بریدونه پلانوي.
پاکستان په پرلهپسې ډول د ترهګرو د ملاتړ خبره ردوي.
سره لهدې چې د ملګرو ملتونو امنیت شورا تر اوسه د پاکستان پر وړاندې کوم اقدام نهدی اعلان کړی، خو پهدې وروستیو کې د مالي سرچینو د څار یوې نړیوالې ډلې خبرداری ورکړ چې پاکستان به د ترورېزم د ملاتړ کوونکو په لېست کې شامل کړي.
د راپورونو له مخې که پاکستان د ترورېزم پر وړاندې د مبارزې په برخه کې جدي او عملي اقدامات ونهکړي، د روان میلادي کال په جون میاشت کې به د هغو هېوادونو په خړ لېست کې شامل شي چې د ترورېستانو د تمویل مخهیې نهده نیولې.
د امریکا او افغانستان له لوري له تورونو سره سره، پاکستان په پرلهپسې ډول د ترهګرو د ملاتړ خبره ردوي او وایي، د ترورېزم پر وړاندې د نړیوالې مبارزې په برخه کې یې ډېر کار کړی دی او ډېرې قربانۍ یې ورکړې دي.
