د افغانستان د سولې عالي شورا چارواکي د ډیورند کرښې پورې غاړې د پرتو قومونو لاریونونو ته په اشارې وايي چې له دې سولهییز حرکته باید د سیمې او نړۍ هېوادونه ملاتړ وکړي.
د دې شورا د دارالانشا رئیس محمد اکرم خپلواک د پنجشنبې په ورځ ازادي راډيو ته وویل چې اعتراض کوونکي له څو کلونو راپهدېخوا د ترورېزم قربانیان دي او اوسيې د ترورېزم په وړاندې د سولې د ټینګښت غږ پورته کړی دی.
ښاغلی خپلواک وايي، د ډیورند کرښې دواړو غاړو ته پراته قومونه د ترورېزم اصلي قربانیان دي او باید له دې پدیدې د خلاصون او سولهییز ژوند په هدف ترې لازم ملاتړ وشي.
نوموړی وايي:
"دا چې اوس ملت، علما او ځوانان راپاڅېدلي او د سولې غږ يې پورته کړی دی، نو باید ټوله نړۍ، افغانستان او پاکستان او د ډیورند کرښې دواړه خواوې د دې غږ ملاتړ وکړي."
هغه ډلې چې په دې سیمه کې ناامني غواړي او کوښښ کوي چې د ناامنۍ په جوړولو خپلو اهدافو ته ورسېږي او ترورېستان چې افغانان نهدي او له بهره راغلي باید پر ضد يې په ګډه اقدام وکړي.
دا په داسې حال کې ده کله چې د روان میلادي کال د جنورۍ په ۱۳مه نېټه د پاکستان په کراچۍ ښار کې نقیبالله محسود ووژل شو، په غبرګون کې يې د ډیورند کرښې پورې غاړې ته پرتو قومونو په اعتراض لاس پورې کړ، دوی د جنورۍ په ۲۶مه نېټه له دېره اسماعیلخان څخه خپل اعتراضونه پیل کړل.
دغه لاریونونه او مظاهرې له دې وروسته بنو، کوهاټ، پېښور، چارسدې، مردان، صوابۍ او د پاکستان یو شمېر نورو ښارونو ته وغځېدې او د فبرورۍ میاشتې په پیل کې اعتراض کوونکو خپل ځانونه د پاکستان مرکز اسلاماباد ته ورسول.
- د پاکستاني پولیسو د یو پخواني چارواکي «راو انور» چې د نقیبالله محسود په وژلو کې لاس لري نیول.
- له جنوبي وزیرستان د ماینونو پاکول.
- د پاکستاني حکومت لهخوا د پښتنو نیول شویو ځوانانو راخلاصول.
د لاریون کوونکو له مهمو غوښتنو څخه دي.
په همدې حال کې د سیاسي چارو افغان کارپوه شهزاده مسعود وايي، کلونه کېږي چې د ډيورند کرښې پورې غاړې ته پراته پښتانه قومونه د ترورېزم قرباني کېږي او حقوقيې تأمین نهدي.
ښاغلی مسعود وايي چې د لاریون کوونکو غوښتنې په حقه دي او باید ملاتړ يې وشي.
دی وايي:
"له تېرو دوه لسیزو راپه دېخوا چې په موږ افغانانو تپل شوی د ډیورند کرښې پورې غاړې ته په پرتو قومونو هم دغسې تپل شوی دی، هلته د ترورېزم مرکزونه جوړ شول او لکه څنګه چې دلته په افغانانو ظلم کېږي، همدغسې د ډیورند کرښې پورې غاړې ته په پرتو قومونو هم کېږي. د هغوی غوښتنې په حقه دي او موږ له هغوی سره د حق د لارې په دې مبارزه کې درېږو."
یو شمېر نور کارپوهان په دې باور دي چې د لاریون کوونکو له غوښتنو سره سم د ډیورند کرښې پورې غاړې د امنیت ټینګښت د افغانستان او سیمې له امنیت سره مرسته کوي.
له ډلې يې عبدالغفور لېوال ازادي راډيو ته وویل چې د ډیورند کرښې د پورې غاړې د پرتو قومونو له روا غوښتنو سره سم د سیمې د هېوادونو اخلاقي مسؤلیت دی چې د دې قومونو ملاتړ وکړي.
راپور: اکرامالله اکرام