- اېشیا ټايمز
اېشیا ټايمز خپرونې د افغانستان، پاکستان او چين د درې اړخیزې غونډې په اړه مقاله خپره کړې ده.
په دې مقاله کې راغلي، د چين د بهرنيو چارو وزیر وانګ يي د سې شنبې په ورځ اعلان وکړ چې پيکېنګ او اسلاماباد به افغانستان ته د اقتصادي دهلېز پروژې پر غځولو غور وکړي. د اقتصادي دهلېز پروژه د ۵۷ میليارده ډالرو ارزښت لري.
مقاله لیکي:
د چين وړانديز ښايي پاکستان اندېښمن کړی وي چې دې هېواد چين خپل اوسپنيز ورور باله، خو چين اوس په یوه منځګړي بدلېږي.
مقاله زياتوي چې د افغانستان د بهرنیو چارو وزیر صلاحالدين رباني چين د افغانستان تلپاتی او د باور وړ شريک هېواد وباله او ويېويل چې هېواد يې چمتو دی چې د اقتصادي دهلېز پروژې برخه شي.
د مقالې په وينا، چين غواړي افغانستان او پاکستان دواړه د سيمهييزو پروژو برخه وي، نو ځکه غواړي د سولې پروسه هم پرمختګ وکړي.
په همدې حال کې افغان چارواکو هيله څرګنده کړې ده چې چین به پر پاکستان د ترورېزم په برخه کې د همکارۍ په خاطر له خپله نفوذه کار واخلي.
مقاله زياتوي چې که افغانستان د اقتصادي دهلېز پروژې برخه شي، امریکا يې ښايي هرکلی وکړي ځکه د ورېښمو د لارې نظر لومړی ځل امریکا په ۲۰۱۱ میلادي کال کې ورکړی وو.
مقاله همداراز زیاتوي چې د منځنۍ اسیا او جنوبي اسیا وصل کول د امریکا جغرافیايي سياسي هدف دی چې په سيمه کې د روسيې نفوذ لهمنځه لاړ شي.
مقاله لیکي:
امريکايي څېړونکي وايي، په منځنۍ اسیا کې د چين او امریکا ګټې يو دي.
- دې هندو
دې هندو ورځپاڼې هم افغانستان ته د چین د اقتصادي دهلېز پروژې د غځېدو په اړه مقاله لیکلې ده.
مقاله لیکي چې هندوستان مخکې د چين او پاکستان د اقتصادي دهلېز د پروژې مخالفت کړی دی.
دا پروژه د پاکستان تر کنټرول لاندې کشمير څخه تېرېږي او هندوستانيې ځکه مخالفت کوي چې وايي، کشمير د دې هېواد برخه دی او که اقتصادي دهلېز له دې سیمې تېر شي دا د هندوستان له خپلواکۍ د سرغړونې په معنی ده.
مقاله د څېړونکو له قوله لیکي چې د اقتصادي دهلېز له لارې د ګوادر بندر ته د افغانستان لاسرسی په دې معنی دی چې د ايران، هندوستان او افغانستان ترمنځ د درې اړخېزې موافقې سره توازن برابر شي.
د دې موافقې له مخې کابل د ايران چابهار بندر ته لاسرسی لري.
مقاله زیاتوي چې چين همداراز غواړي د افغانستان او پاکستان ترمنځ اړيکې عادي شي.
د مقالې په وينا د افغانستان او پاکستان د خپلمنځي اړيکو د وضعیت په اړه هڅې په نوره نړۍ کې د هېوادونو ترمنځ د ورته وضعیت لپاره د ازموينې په توګه ګڼل کېږي.