د افغانستان جمهوري ریاست د کابل او اسلاماباد د اړیکو د ښه کېدو په هدف د ترکیې د هڅو خبره کوي.
جمهوري ریاست وايي، د ترکیې ولسمشر د چهارشنبې په ورځ «۱۳۹۶ کال د لیندۍ ۲۲» له ولسمشر غني سره په خبرو کې ویلي چې په دې برخه کې به هېڅ ډول هڅې ونهسپموي.
د افغان ولسمشر د ویاند د دفتر سرپرست شاهحسین مرتضوي ازادي راډيو ته وویل، دواړو خواوو په دې ټینګار کړی چې په افغانستان کې د سولې د خبرو اترو لپاره د دولتونو ترمنځ اړیکې مهمې دي.
دی وايي:
"دواړو خواوو ټینګار درلود چې له پاکستان سره د سولې په برخه کې دولت په دولت خبرې کېدای شي ګټورې تمامې شي. موږ د سیمې له ټولو بانفوذه هېوادونو هیله لرو چې د سولې د پروسې چې مشري يې افغانان کوي ملاتړ وکړي او د دولتونو ترمنځ د خبرو په پیاوړتیا کې مرسته وکړي. څو په دې توګه د اساسي سولې بنسټ ایښی وي."
ښاغلی مرتضوی وايي، د ترکیې ولسمشر د افغانستان او جنوبي اسیا لپاره د امریکا د نوې ستراتېژۍ هرکلی وکړ او هغهیې د سیمې د وضعیت د تغییر لپاره مثبته وګڼله.
ترکیه د افغانستان او پاکستان په اړیکو کې څه نقش لرلای شي؟
ولسمشر غني هم ویلي چې افغان حکومت له پاکستان سره دولت په دولت او دغهشان له طالبانو سره د بینالافغاني خبرو له لارې مذاکرو ته چمتو دی.
دا خبرې د اسلامي هېوادونو د همکارۍ د سازمان د یوې ورځنۍ غونډې په څنډه کې چې په استانبول کې جوړه شوې وه د چهارشنبې په ورځ «۱۳۹۶ کال د لیندۍ ۲۲» د دواړو هېوادونو د ولسمشرانو ترمنځ شوې دي.
له دې وړاندې چین هم ویلي چې د افغانستان او پاکستان ترمنځ د اړیکو د ښه کېدو په هدف به درې اړخیزه ناسته جوړه کړي.
نږدې دوه کاله کېږي چې د کابل او اسلاماباد ترمنځ سیاسي اړیکې ترینګلې دي.
کابل ادعا کوي چې اسلاماباد ترورېستانو ته خوندي پټنځایونه ورکړي او د سولې د ټینګښت په برخه کې له افغانستان سره مرسته نهکوي، هغه ادعا چې د پاکستاني چارواکو لهخوا رد شوې ده.
ولسمشر غني په ټینګار سره دا خبره کړې چې اول له پاکستان سره سوله کوي او وروسته له وسلهوالو طالبانو سره.
په ورته وخت کې د ولسي جرګې د نړیوالو اړیکو د کمېسیون یو غړی ګل پاچا مجیدي د ترکیې د دې اقدام د هرکلي تر څنګ وايي، نوموړی هېواد کولای شي د سولې د ټینګښت او له وسلهوالو طالبانو سره د خبرو اترو په برخه کې ښه رول ولوبوي.
دی وايي:
"ترکیه او سعودي پر پاکستان ښه اغېز او له دې هېواد سره ښې اړیکې لري. که پر پاکستان فشار راوړي او دا هېواد مجبور کړي چې د ترورېستانو پټنځایونه لهمنځه یوسي او صادقانه عمل وکړي، نو ښه خبره ده."
ښاغلی مجیدی وايي، تر کومه چې پر پاکستان فشارونه زیات نهشي، هغه هېواد به د سولې په برخه کې عملي او رښتینې همکارۍ ته حاضر نهشي.
د ده په باور د افغانستان د سولې د تینګښت لپاره پر پاکستان د ترکیې په شان د سیمې د هېوادونو فشارونه ډېر مهم دي.
راپور: اکرامالله اکرام
