د ولسي جرګې اداري پلاوي، د هېواد پر امنیتي او دفاعي ځواکونو یو ځل بیا غږ وکړ چې د هغو ولایتونو د امنیتي وضعیت ښه کولو ته تدابیر جدي کړي، کوم چې د وسلهوالو مخالفینو حملې او خوځښتونه پهکې زیات شوي دي.
د دې جرګې یو شمېر غړو د دوشنبې په ورځ د جرګې په عمومي غونډه کې وویل، په سرپل، جوزجان، فراه او کونړ ولایت کې د امنیتي ځواکونو د عملیاتو سره-سره، وسلهوالو مخالفینو د دغو ولایتونو په ځینو ولسوالیو کې حملې زیاتې کړې دي.
د ولسي جرګې د دغو غړو د اندېښنو له څرګندولو وروسته، د جرګې رئيس عبدالرؤف ابراهیمي وویل:
"امنیتي او دفاعي ځواکونه مخاطب دي چې د افغانستان د خلکو د امنیت د تأمینولو او د روان بحران د مدیریت لپاره لازم پام وکړي."
د ولسي جرګې د غړو له ډلې عبدالستار درزابي وویل، په سرپل، جوزجان او فاریاب ولایتونو کې امنیت ډاډمن نهدی او د دغو ولایتونو په یو شمېر ولسوالیو کې په پرلهپسې توګه، د وسلهوالو مخالفینو لهخوا حملې کېږي.
د کونړ ولایت استازي حاجي سخي مشواڼي وویل، د دې ولایت په ځینو ولسوالیو کې داعش فعالیتونه زیات کړي او د لویو لارو سپرلۍ هم ترې خوندي نهدي.
نوموړی وايي:
"په کونړ ولایت کې د داعش مرکزونو ته اکمالات کېږي او په پراخه کچه دعوتونه شروع دي، هیله ده چې حکومت لاس په کار شي او د دغې ډلې مخنیوی وکړي."
د فراه ولایت استازي محمد سرور عثماني بیا وویل، د بکوا، ګلستان او خاک سفید د ولسوالیو په شااوخوا ۵ کېلو مترۍ کې وسلهوال طالبان مېشت دي او سیمهیې ناامنه کړې ده.
دا په داسې حال کې ده چې پخوا تر دې د پکتیا ولایت جانيخېل، د غور ولایت تېوره او د فاریاب ولایت غورماچ ولسوالۍ څو ځلې د وسلهوالو طالبانو لاس ته ورغلې، خو افغان ځواکونو ترې بېرته خپلې کړې دي.
خو د افغانستان دفاع وزارت وايي، همدا اوس هم د هېواد په نا امنو سیمو کې د وسلهوالو مخالفینو د ځپلو عملیات روان دي او ښې نتیجې یې هم ورکړې دي.
د دغه وزارت ویاند دولت وزیري ازادي راډیو ته وویل:
"د افغانستان په هره سیمه کې چې مخالفین سر پورته کړي افغان وسلهوال پوځیې ټکوي. نن په ۱۴ ولایتونو کې ۱۶ عملیاتونه لرو، د کومانډو قطعاتو ۱۴ عملیاتونه لرو او هوايي ځواک مو هم فعال دی او پر مخالفینو یې ۳۱ مستقلې حملې کړې دي."
د یادونې وړ ده چې د افغانستان په ولایتونو کې ناامني څه نوې خبره نهده او په دې اړه په وار-وار د افغانستان په ملي شورا کې د وکیلانو لهخوا تُند انتقادونه شوي دي، خو د افغانستان امنیتي او دفاعي بنسټونو هم تل د وسلهوالو مخالفینو د ځپلو په هدف د خپل تیاري او عملیاتو خبره کړې ده.
افغان امنیتي کارپوهان وايي، د وسلهوالو مخالفینو د ځپلو په هدف پهکار ده چې افغان ځواکونو ښه تجهیز او په نویو وسلو سمبال شي.
راپور: خان محمد سیند
