ولسمشر غني وايي، د کندهار د برېښنا لپاره ۴۷۶ ميليونه ډالره ځانګړې شوي چې ډېر ژر به د وارداتي برېښنا ستونزه حل شي.
ولسمشر وویل، د سولر برېښنا جوړولو لپاره به هم هڅې وکړي او د سوداګرو په همکارۍ به لس مېګا واټه برېښنا د کندهار لپاره جوړه کړي.
ولسمشر دغه څرګندونې په کندهار کې د ولسي خلکو یوې غونډې ته وکړې.
د کندهار قومي مشرانو او مدني فعالانو ولسمشر ته د کندهار د برېښنا د اوږد مهالې ستونزې، د بندونو د جوړولو او په یو شمېر ادارو په خاص ډول معارف کې د فساد او ګډوډیو شکایتونه وکړل.
په ولسي جرګه کې د کندهار د خلکو استازي تورن عبدالخالق ولسمشر ته وویل چې برېښنا د کندهار د خلکو لپاره یوه حیاتي مسئله ده.
د تورن عبدالخالق په وینا کندهار د ابي برېښنا لپاره اوبه او د لمریزې برېښنا لپاره په کال کې لس میاشتې لمر لري، خو په تېرو ۱۵ کلونو کې دغه لوی ښار دوامداره برېښنا نهده تر لاسه کړې.
دی وايي:
"په مجموع کې لوی کندهار د برېښنا ستونزه لري. د کجکي د بند برېښنا کفایت نهکوي نو ځکه دلته ډېرې صنعتي فابریکې سقوط شوې دي."
ولسمشر د خلکو دغه غوښتنې ته په عکسالعمل کې وویل، د کندهار د برېښنا لپاره ۴۷۶ ميليونه ډالره ځانګړې شوي چې ډېر ژر به د وارداتي برېښنا ستونزه حل شي.
ولسمشر وویل، د سولر برېښنا جوړولو لپاره به هم هڅې وکړي او د سوداګرو په همکارۍ به لس مېګا واټه برېښنا د کندهار لپاره جوړه کړي.
ولسمشر غني وویل:
"د ۲۲۰ کېلو واټه د لین انتقال له غزني څخه تر کندهاره پورې ۱۳۰ میلیونه ډالر ورته اختصاص شوې بودجه مطلق موجوده، د لس مېګا واټه لمریزه برېښنا په ۲۰ میلیونه ډالره هغه کمپنۍ چې ورکه وه اوس پیدا ده قرارداد امضا شوی دی."
د کندهار مدني فعال نثار احمد صالح د کندهار په یو شمېر ادارو په خاص ډول معارف ریاست کې د فساد او نورو ګډوډیو شکایتونه وکړل.
د صالح په وینا د کندهار د معارف ریاست د کمېشنکارانو په مرکز بدل شوی.
ولسمشر د کندهار د معارف د ستونزې په اړه وویل چې په راتلونکو دوو اوونیو کې به د بشري قواوو لپاره يو کمېسیون جوړ کړي چې مشري بهيې خپله کوي او د معارف ستونزو ته به رسیدګي وکړي.
ولسمشر دغهراز د کندهار والي ته وویل چې ټول هغه رئيسان چې تر درې کاله زیات په يوه ریاست کې پاتې شوي له دندې لیرې کړي.
راپور : محمد صادق رښتینی