د صربیا ولسمشر الکساندر وچیچ پرون په بیلګراد کې د افغان لس کلن فرهاد نوري او د ده د کورنۍ له څلورو غړو سره وکتل او دوی ټولو ته یې د صربیا د تابیعت وړاندیز وکړ.
د صربیا ولسمشر فرهاد نوري ته د یو تعلیمي بورس د ورکولو ژمنه هم وکړه څو د انځورګرۍ په برخه کې یې استعداد نور هم ورزول شي.
صربي رسنۍ وايي، د نوموړي پلار ته هم د دندې ورکولو ژمنه شوې.
فرهاد نوري ته په دې وروستیو کې صربي رسنیو د "واړه پیکاسو" نوم ورکړ.
هسپانوي پیکاسو د شلمې پیړۍ ستر انځورګر ګڼل کېږي.
لس کلن فرهاد نوري له اتو میاشتو راهیسې د بیلګراد ښار ته نېژدې د کډوالو لپاره په جوړ شوي یو کمپ کې له خپل مور پلار او وروڼو سره اوسي.
د نوموړي په کښلو انځورونو کې د جرمني د صدراعظمې انګېلامېرکل او د سوریالېزم د سبک د انځورګر سلوادور دالي انځورونو ډېره پاملرنه ور اړولې او نوموړی یې په یو ستوري بدل کړی دی.
نوموړي تیره اوونۍ په صربیا کې د مغز په سرطان د اخته ماشومانو سره د مرستې په هدف د خپلو انځورونو یو نندارتون جوړ کړ.
نوري له خپلې کورنۍ سره هغه وخت صربیا ته تللی و چې د بالکان له لارې لویدیځې اروپا ته د افغانانو د تلو بهیر زور اخېستی و. خو کله چې دغه لاره وتړل شوه هغه له خپلې کورنۍ سره په بیلګراد کې بند پاتې شو.
د فرهاد نوري پلار وايي، غوښتل یې له خپلې کورنۍ سره سویس ته ولاړ شي او هلته ژوند وکړي.
د صربیا ولسمشر د نوري کورنۍ ته په خطاب کې ویلي:
"موږ د سویس په څېر بډای نه یوو، خو تاسو به د بیلګراد ښار د یو ښکلي ښار په توګه ووینئ. که تاسو غواړئ دلته پاتې شئ، موږ تاسو ته د تابیعت حق درکوو."
د صربیا ولسمشر دې افغانې کورنۍ ته ویلي:
"زموږ پالیسي د مخلصانه دوستۍ، یووالي ، د کډوالو او هغو کسانو سره چې راتلونکي ته هیلمن وي د مینې پالیسي ده. که تاسو خپل راتلونکی زموږ په هېواد کې وینئ درته هرکلی وایوو. "
د فرهاد نوري کورنۍ نهدي ویلي چې د صربیا د ولسمشر دا وړاندیز یې منلی او که ردوي یې.
د فرهاد نوري د انځورګرۍ استعداد هغه وخت راښکاره شو چې په بلګراد کې د نقاشي په یوه کورس یې ګډون کړی و.
دغه کورس د یوې مرستندویه ټولنې لهخوا د کډوالو او پناه غوښتونکو لپاره جوړ شوی و.
د کډوالو فاونډیشن په نوم دغه ټولنه وایي، نوري یې وروسته د هنر یوه ښوونځي او د عکاسي یوه کورس ته واستاوه چې خپل استعداد ته وده ورکړي.
