د کندهار په خاکرېز ولسوالۍ کي د ملي اردو پر یوې قرارګاه د وسلهوالو طالبانو په حمله کې ۳۰ سرتېري وژل شوي دي.
دکندهار د والي ویاند صمیم خپلواک نن چهارشنبه ازادي راډیو ته وویل چې تېره شپه د کندهار په خاکرېز ولسوالۍ د کرزالې په سیمه کي د ملي اردو پر یوې قرارګاه د وسلهوالو طالبانو په حمله کې د ملي اردو سرتېرو او وسلهوالو طالبانو ته درانه تلفات رسېدلي، خو دقق ارقاميې تر اوسه معلوم نهدي.
د خپلواک په وینا د ولایتي ادارې لهخوا د څېړنې ټیم د پېښې سیمې ته استول شوی تر څو د تلفاتو او د پېښي د څرنګوالي په اړه تحقیقات وکړي.
نوموړي زیاته کړه:
"جګړه شوې موږ ته هم درانه تلفات رسېدلي او وسلهوالو طالبانو ته هم درانه تلفات رسېدلي، خو تر اوسه د دقیقو ارقامو په اړه معلومات نهشته البته زموږ د برسي ټیم د پېښې ځای ته پر لاره دی."
په عین وخت کې د کندهار یوې باوري دولتي سرچینې ازادې راډیو ته تائید کړې چې د خاکرېز ولسوالۍ د کرزالې په سیمه کي د ملي اردو پر یوې قرارګاه د وسلهوالو طالبانو په حمله کې ۳۰ سرتېري وژل شوي او یو شمېر نور لادرکه دي.
د سرچینې په وینا دغې جګړې چې تر سهارهيې دوام کړی وسلهوالو په قرارګاه کې دننه د پوځیانو کانټینرونو ته اور اچولی او په کانټینرونو کې دننهيې یو شمېر پوځیان سوځولي دي.
وسلهوالو طالبانو د دغې حملې مسؤلیت منلی او د ۷۴ سرتېرو د وژل کېدو ادعا کوي.
طالبانو دغهراز ادعا کړې چې یو شمېر سرتېري لسګونه میله وسلې او نور مهماتیې هم له ځان سره وړي دي.
بلخوا چارواکي وايي، د کندهار ولایت په میانشين ولسوالۍ کې يې د وسلهوالو ډلهییز بريد په شا تمبولی دی.
د کندهار د امنیه قوماندانۍ ویاند ضیا دراني ازادي راډیو ته وویل چې تېره شپه وسلهوالو طالبانو د میانشین ولسوالۍ پر ځينو امنيتي پوستو ډلهییز بریدونه وکړل.
د دراني په وینا د امنيتي ځواکونو په ځوابي غبرګون کې وسلهوالو طالبانو ته درنه مرګ ژوبله اوښتې خو تر دا مهالهیې کره شمېره معلومه نهده.
هغه وايې د یادو بریدونو پر مهال امنيتي ځواکونو او د سيمې خلکو ته کوم زیان نهدی رسېدلی.
دغهراز د کندهار په میوند ولسوالۍ کې لس وسلهوالو ته مرګ ژوبله اوښتې او څلور نور نيول شوي دي.
د کندهار د امنيه قوماندانۍ ویاند ضیا درانی وایي، تېره شپه ۱۱ بجې افغان امنيتي ځواکونو د میوند ولسوالۍ په سره بغل سيمه کې عملیات تر سره کړي دي.
د هغه په خبره په دغو عملیاتو کې څلور وسلهوال وژل شوي، شپږ ټپیان دي او څلور نور ژوندي نيول شوي دي.
هغه وايي له نيول شویو کسانو سره څلور میله وسله هم د امنيتي ځواکونو لاسته ورغلې ده.
درانی په یاده ولسوالۍ کې د افغان امنيتي ځواکونو له لوري د هغو لسو ماینونو د شنډولو خبر هم ورکوي چې تېره ورځ طالب وسلهوالو په "شلغمي" سیمه کې ځای پر ځای کړي وو.
طالب وسلهوالو تر اوسه د وروستیو دو پېښو په اړه څه نهدي ویلي.
دا په داسې حال کې چې په دې وروستیو ورځو کې د هېواد په بېلابېلو سیمو کې د وسلهوالو طالبانو حملو زور اخیستی دی.
تر دې څو ورځې وړاندې وسلهوالو طالبانو د کندهار په شاه وليکوټ ولسوالۍ کې هم د ملي اردو پر یوې قرارګاه حمله کړې وه چې د افغان ځواکونو په وینا ۱۲ د ملي اردو سرتېري وژل شوي وو.
راپور: صادق رښتینی
