د کابل امنیه قوماندانۍ په یوه خبري ناسته کې اعلان وکړ چې د کمکي اختر لپاره یې جدي امنیتي تدابیر نیولي دي.
د کابل د امنیه قوماندانۍ سرپرست محمد سالم احساس د شنبې په ورځ په یوې خبري ناسته کې اعلان وکړ چې پولیس د کابل ښار او ولسوالۍ د امنیت د ټینګښت لپاره مؤظف شوي دي.
نوموړي د کابل ښاریانو ته ډاډ ورکړ چې د اختر د مراسمو، جوماتونو او تفریحاځایونو امنیت ټینګ شوي او خلک په ارامه زړه کولای شي د اختر خوښۍ ولمانځي.
ښاغلي احساس له خلکو وغوښتل چې د پلاستیکي وسلو له استفادې ډډه وکړي او همدا راز د اختر په ورځو کې ټرافیکي قوانین هم په جدي توګه رعایت کړي.
نوموړي زیاته کړه:
"د اختر په مناسبت پولیس له نورو ځواکونو سره په همغږۍ د امنیت د ټینګښت لپاره له خپلو ټولو امکاناتو څخه په استفادې د پلان مطابق په بېلابېلو برخو کې توظیف شوي دي."
په دغه ناسته کې د کابل د امنیه قوماندانۍ سرپرست همدا راز په تیرې یوې میاشتې کې د ۲۰۰ جنايي پیښو په تړاوو د ۳۶۸ تورنو کسانو د نیولو خبر هم ورکړ.
نوموړي همدا راز وویل چې په دغه موده کې یې په کابل ښار کې د شپږو ترهګریزو بریدونه مخه هم نیولې ده.
کابل د روژې په میاشت کې د خونړۍ پیښو شاهد وه چې له سلو زیات کسان پکې ووژل شول او ګڼو نور ټپیان شول.
- په کابل کې وروستۍ امنیتي پېښې.
مجروح: د کابل وروستۍ پېښې ۷ تنه وژلي او ۱۱۹یې زخمیان کړي
عامې روغتیا وزارت: د کابل مظاهره کې ۴ تنه وژل شوي اته ټپیان دي
کابل کې چاودنې ۸۰ کسان وژلي او څه باندې ۳۵۰ یې ټپيان کړي
خو د کابل ښار ځینې اوسېدونکي د پولیسو له لورې د اختر په مناسبت د امنیتي تدابیرو نیولو ته خوشبینه دي.
د کابل یوه اوسېدونکي رامین په دې اړه ازادي راډیو ته وویل:
"دا چې امنیتي ځواکونو امنیتي تدابیر نیولي موږ خوشحاله یو او خدای دې وکړي چې د اختر ورځې او شپې په خوشحالۍ تیرې شي."
د اختر په رارسېدو د کابل ښار په واټونو کې تر نورو ورځو ډېر امنیتي ځواکونه تر سترګو کېږي.
د کابل ښار اوسېدونکي وايي چې استخباراتي او کشفي بنسټونه هم باید د امنیتي ګواښونو په مخینوي له هیڅ ډول هڅو دریغ ونه کړي.
راپور:محمد حدیث پردېس