د کندهار په شاولي کوټ ولسوالۍ کې د افغان ځواکونو پر یوې پوستې د وسلهوالو په حمله کې لس د ملي اردو سرتېري او ۱۲ وسلهوال طالبان وژل شوي او د ملي اردو ۹ سرتېري ټپیان شوي دي.
کندهار کې د ۲۰۵ اتل قول اوردو مطبوعاتي مسؤل تورن محمد صادق عیسی ازادي راډیو ته وويل چې تېره شپه وسلهوالو طالبانو د کندهار د شاولي کوټ په ولسوالۍ کې د افغان پوځ پر یوه پوسته برید کړي چې تر نن سهاره پورې دغه حملې دوام درلود.
د عیسي په وینا په دغه حمله کې د ملي اردو لس سرتېري وژل شوي او د امنیتي ځواکونو د مقاومت په پایله کې زیات شمېر وسلهوال وژل شوي چې د شاوخوا ۱۲ وسلهوالو جسدونه په سیمه کې پاتې شوي دي.
دی وايي:
"د طالبانو دا حمله زموږ د سرتېرو د مقاومت سره مخامخ شوه چې پرمهال يې د مخالفینو ۱۲جسدونه د جګړې ډګر کې پاتې شوي متأسفانه چې دې حمله کې زموږ لس د ملي اردو سرتېري وژل شوي او ۹ تنه نور ټپیان دي."
دغه پېښه چې مسؤلیت یې د دولت وسلهوالو مخالفینو منلی د کندهار په شمال کې د ارغنداب او شاهولي کوټ ولسوالیو ترمنځ د اڅکزیو او سوزنیانو سیمه کې رامنځته شوې.
یوه سرچینه چې نه غواړي نوم يې خپور شي ازادي راډیو ته وویل چې د وسلهوالو طالبانو د سرې قطعې ډله چې ځانګړي وسلې او د شپې دوربینونونه لري، تېره شپه يې هغه مهال چې د ملي اردو سرتېري په خوب وو، پر دغه پوسته حمله کړې او شاوخوا ۱۳ سرتېري يې ووژل.
د سرچینې په وینا د طالبانو د سرې قطعې دغه ډله له هلمند څخه کندهار ته د دغه حملې لپاره ورغلې وه.
طالبانو د دې حملې مسؤلیت منلی او د ملي اردو د ۳۵ سرتېرو د وژل کېدو اعا کوي.
راپور: محمدصادق رښتینی