د ارزګان ځایي چارواکي وایي، د دغه ولایت په خاص ارزګان ولسوالۍ کې داعش ډلې خپل فعالت پیل کړی او مرکزونه جوړوي.
د خاص ارزګان ولسوالۍ قوماندان ملا صمد د چهارشنبې په ورځ ازادي راډيو ته وویل چې د دغې ولسوالۍ په پالان نومۍ سیمه کې داعش ډلې څه باندې ۱۰۰ کورنۍ له خپلو کورونو ویستلي چې په خبرهیې، دغه ډله اوس پهکې د ځان لپاره مرکزونه جوړوي.
نوموړی وايي چې د پالان په دغې سیمه کې هزاره توکمي مېشت دي او دغه سیمه د زابل دایچوپان سره نښتې ده.
ښاغلي صمد زیاته کړه:
"داعش دغه پلان د تېر کال راهیسې درلود چې خاص ارزګان ولسوالۍ ته راشي چې تېر کاليې د وسلهوالو طالبانو په همکارۍ ۱۵۰ هزاره مېشتې کورنۍ له خپلو سیمو وشړلې او اوس دوی پهکې مرکزونه جوړوي، اوسيې یو شمېر نورو کورنیو ته هم خبر ورکړی چې سیمه پرېږدي او ولاړې شي."
ښاغلي صمد دا هم وویل چې په دغې ولسوالۍ کې یو شمېر روسان هم له وسلهوالو طالبانو سره لیدل شوي دي.
نوموړی وايي، دغه روسان خلکو د دغې ولسوالۍ په متکزو اډه کې له وسلهولو طالبانو سره لیدلي چې درې تنه وو چې د دوی په خبره یو نارینه یوه ښځه او یو هم ژباړونکی و.
دی وایي:
"زه خپله اسناد په لاس کې لرم چې د دغې ولسوالۍ متکزو نومي اډې ته روسان راغلي وو او یو دانه لنډکروزر موټر چې خړ رنګيې درلود ورسره و، ما سرهيې خپله تصویرونه موجود دي."
ښاغلي صمد تر اوسه په دې اړه په سیمه کې د ازادي راډیو له خبریال سره کوم اسناد یا انځورونه نهدي شریک کړي.
دا په داسې حال کې ده چې څه موده مخکې د دغه ولایت د ولایتي شورا مسؤلینو ازادي راډیو ته ویلي وو چې په دغه ولایت کې داعش یا د اسلامي دولت نومې ډلې په فعالیت پیل کړی او په خبرهيې چې د ارزګان لپاره د وسلهوالو طالبانو نومول شوی والي شیخ هم له وسلهوالو طالبانو څخه بېل شوی او داعش سره یوځای شوی دی.
په ارزګان ولایت کې د څلورمې پلې لوا قوماندان هم مني چې ځیني استخبارتي معلوماتيې ترلاسه کړي، خو کره اسناد په لاس کې نهلري.
بلخوا په ارزګان ولایت کې د مدني ټولنې مسؤل جاوید خپلواک مرکزي دولت څخه غوښتنه وکړه چې د دغه ولایت امنیتي وضیعت ته جدي پاملرنه وکړي.
ښاغلي خپلواک وویل:
"مرکزي اداره له ارزګان ولایت سره د مور او میرې چلند کوي، تاسې وګورئ ۹ میاشتې کېږي چې په ارزګان ولایت کې د وینو ویالې بهېږې، خو مرکزي دولت ورته هېڅ پاملرنه نهکوي."
د یادونې وړه ده چې د دغه ولایت د ولایتي شورا مسؤلین وايي چې له تېرو نهو میاشتو راهيسي څه باندې ۹۰ سلنه خاوره د ارزګان ولایت د وسلهوالو طالبانو تر ولکې لاندې ده.
راپور: شریفالله شرافت