د افغان حکومت اجرائیه ریاست وايي، که څه هم پاکستان له ترهګرو ملاتړ کوي خو افغان حکومت غواړي خپلې ستونزې ورسره د خبرو له لارې حل کړي.
د اجرائیه ریاست ویاند مجیبالرحمن رحیمي د پنجشنبې په ورځ په کابل کې د خبري ناستې پر مهال د بهرنیو ډیپلوماتانو او پاکستاني چارواکو تر منځ د لیدنو په اړه وویل چې دوی هڅې کوي څو د افغانستان او پاکستان تر منځ خبرې بیا پیل شي.
ښاغلي رحیمي د یوې پوښتنې په ځواب کې وویل، افغانستان او پاکستان ګډې ګټې لري او د دواړو هېوادونو تر منځ ستونزې باید د خبرو له لارې حل شي.
نوموړی وايي:
"په سیمه کې ګډو ګټو او هغه ګواښونو ته په کتو چې د ترهګرۍ له پلوه دواړو افغانستان او پاکستان ته متوجه دي موږ کولای شو چې د خبرو له لارې ستونزې حل کړو. زموږ د نړیوالو ملګرو هڅې هم دا دي چې پر پاکستان فشار راوړي څو خبرو ته حاضر او له بل پلوه له افغانستان سره خپلې ستونزې د خبرو له لارې حل کړي."
په دې وروستیو کې پاکستان ته د ځینو بهرنیو ډیپلوماتانو د راشه-درشې په اړه رپوټونه خپاره شول او تازه په کابل کې د بریتانیا سفیر هم له پاکستانه لیدنه کړې ده.
دا په داسې حال کې ده چې د کابل او اسلاماباد تر منځ اړیکې تر بل هر وخت خړې پړې شوي او افغانستان تل پر پاکستان تور پورې کوي چې له ترورېستانو څخه ملاتړ کوي.
خو پاکستان هم بیا د افغانستان او هند تر منځ د اړیکو د نېږدې والي په اړه اندېښنه څرګنده کړې.
له دې وړاندې افغان چارواکو په کراتو د افغانستان پر وړاندې د پاکستان پر سیاستونو انتقاد کړی او دا یې ویلي چې پاکستان د دې هېواد د سولې پروسه کې رښتینې همکاري نهکوي.
یو شمېر افغان کارپوهان وايي، پاکستان د کابل او نوې ډېلي تر منځ د اړیکو له نېږدېوالي د اندېښنې تر څنګ له افغانستانه دا هم غواړي چې د ډیورند فرضي کرښه په رسمیت وپېژني.
د نړیوالو چارو کارپوه حمید عزیزي وايي، د پاکستان اوسنی سیاست او له افغانستانهیې غوښتنو ته په پام فکر نهکېږي چې د بهرنیو ډیپلوماتانو هلې ځلې هم ګټورې تمامې شي.
ښاغلی عزیزي زیاتوي:
"هغه ډیپلوماتان چې پاکستان ته تګ راتګ لري د پاکستان پر وړاندې یې د خپلو هېوادونو پالېسۍ مشخصې نهدي نو په دې دلیل زه فکر کوم چې دا ډول هڅې به مثبته نتیجه ورنهکړي."
ښاغلي عزیزي په ورته وخت کې د پاکستان پر وړاندې د افغان حکومت له سیاستونو هم انتقاد وکړ.
نوموړی وايي، افغان حکومت له یوې خوا پاکستان د ترهګرو اصلي پټنځای بولي او د منزوي کېدو خبرهیې کوي خو بل پلو غواړي د خبرو لارې دغه هېواد ته امتیاز ورکړي.
راپور: محمد حدیث پردېس
