۲۰۱۷ میلادي کال پیل شو، د دغه کال د پیل لپاره د نړۍ په ګوټ ګوټ کې نندارې او اورلوبې جوړې شوې وې.
میلیونونو انسانانو له سیډني نیولې تر کالیفورنیا پورې اورلوبې وکړې او ټولو یې د نوي کال د پیل په مناسبت یو بل ته مبارکۍ ورکړې.
میلونونو کسانو په ټوله نړۍ کې نوی میلادي کال «۲۰۱۷» په نڅا او اورلوبو پیل کړ.
د اسټرالیا سیډني ښار د تر ټولو غوره نندارو شاهد و چېرته چې هر کال تر نورو ځایونو مخکې نوی کال پیلېږي او خاص تدابیر هم ورته نیول کېږي.
څه باندې دوه میلیونه کسانو د هاربر پله په سر چې د سیډني تر ټولو مشهوره ځای دی د دې اورلوبو او نندارو لپاره سره ټول شوي و.
لکونه اورلوبې وړاندې شوې چې د تل په څېر یې یوه زړه وړونکې ننداره وړاندې کړه.
په نیویارک کې هم په لکونه کسان په ټایمز څلور لارې کې سره ټول شوي و څو د نوي کال لپاره اورلوبې او جشنونه وکړي.
د امریکا متحده ایالاتو ولسمشر بارک اوباما په یوه وېډیويي پیغام کې ۲۰۱۶ کال له لاسته راوړنو ډک وباله او د ۲۰۱۷ کال مبارکي یې ورکړه.
ښاغلي اوباما وویل:
"ټول مساوي یو، ټول د دې حق لرو چې د خپلو هېلو د پوره کېدو لپاره ژوند وکړو، د اوباما د کورنۍ لهخوا تاسو ټولو ته نېکمرغه او خوشحاله نوی ۲۰۱۷ کال غواړم."
د اوباما په څېر د نړۍ نورو مشرانو هم د ۲۰۱۷ کال د پیل په مناسبت د مبارکۍ پیغامونه خلکو ته وړاندې کړي او د ټولو لپارهیې د ارامۍ ډک کال غوښتی دی.
د روسیې ولسمشر ولادیمیر پوتین، د جرمني صدراعظمې انګېلا مرکل او ګڼو نورو دا پیغامونه په ۲۰۱۶ کال کې د خپلو هېوادونو د لاسته راوړنو او لوړو ژورو د یادولو تر څنګ ورکړي دي.
په اروپا کې د نوي کال د لمانځنې لپاره خاص امنیتي تدابیر نیول شوي دي.
پولیسو لا له وړاندې په برلین کې د کرېسمس د بازارګوټي او د فرانسې په نیس کې خاص تدابیر نیولي او خپل چمتووالی یې زیات کړی دی.
د نړۍ په ګڼو ښایسته ځایونو له هغې ډلې هانک کانګ او د اماراتو په دبۍ کې په خلیفه برج کې د نوي کال د پیل په مناسبت بېلابېل جشنونه او اورلوبې وشوې.
په افغانستان کې هم مېشتو ملکي او پوځي بهرنیانو د ۲۰۱۷ کال د پیل په مناسبت جشنونه جوړ کړي و.
راپور: صفيالله ستانکزی