د اداري فساد پر وړاندې د مبارزې عالي اداره ټینګار کوي چې د لوړپوړو حکومتي چارواکو د شتمنیو ثبت له فساد سره د مبارزې برخه کې ګټور تمامېږي او دوی په دې برخه کې جدي دي.
د دغې ادارې مشر سید حسین فخري ازادي راډیو ته وویل، که پاتې دولتي چارواکي له ځنډ پرته خپلې شتمنۍ ثبت نهکړي دوی بهیې د نومونو د افشا تر څنګ څارنوالۍ ته هم معرفي کړي.
ښاغلي فخري زیاته کړه:
"په راتلونکي کې موږ په دې برخه کې ډېر جدي اجرأت کوو او که مسؤلین جدي اجرأت ونهکړي موږ مجبور یو چې د هغوی لېست او شهرت خپور او خپل مسؤلیتونه رفع کړو."
په ورته وخت کې د ولسمشر ویاند هارون چخانسوري هم په کابل کې د یوې خبري ناستې پرمهال ټینګار وکړ چې ټول لوړ پوړي چارواکي باید خپلې شتمنې ثبت کړي.
ښاغلي چخانسوري همدا راز وویل، که کوم چارواکی د شتمنیو د ثبت په برخه کې ناسم معلومات ورکړي نو جدي او قانوني چلند به ورسره وشي.
دا په داسې حال کې ده چې د شنبې په ورځ د افغانستان کابینې د فساد پر وړاندې د ستراتېژۍ د تطبیق قانون هغه ماده تعدیل کړه چې که دولتي چارواکي خپلې شتمنۍ ثبت نهکړي نو معاشونه او نور امتیازونه بهیې وځنډېږي.
د فساد پر وړاندې د مبارزې عالي اداره وايي چې د ۱۱ والیانو په ګډون تر اوسه ځینو لوړ پوړو دولتي چارواکو خپلې شتمنۍ نهدي ثبت کړي.
ښاغلی فخري وايي، هیلهمند دی چې د کابینې وروستۍ پرېکړه له دوی سره د شتمنیو ثبت کې مرسته وکړي.
د فساد پر وړاندې د مبارزې عالي ادارې شپږ کاله وړاندې د دولت د لوړپوړو چارواکو د شتمنیو د ثبت بهیر پیل کړ چې د همدې ادارې د مسؤلینو په خبره اکثره چارواکو خپلې شتمنۍ ثبت کړي او دغه پروسه هر کال تازه کېږي.
وړاندې د اداري فساد پر وړاندې مبارزې عالي ادارې ویلي چې د دوی د لېست له مخې باید ۱۷۰۰ لوړپوړي دولتي چارواکي خپلې شتمنۍ ثبت کړي.
یو شمېر افغان کارپوهان د فساد پر وړاندې د مبارزې برخه کې د حکومت دا ډول اقدامات سمبولیک بولي.
اقتصادي کارپوه سیفالدین سیحون وايي، په افغانستان کې د فساد پر وړاندې مبارزه خورا پېچلې ده او سپارښتنهیې دا ده چې حکومت باید د نمایشي اقداماتو پر ځای په رېښتیني ډول د فساد ریښې وچې کړي.
ښاغلي سیحون زیاته کړه:
"د افغانستان ستونزې ډېرې پېچلې او عمیقې دي د فساد پر وړاندې د مبارزې برخه کې د دولت کړنلاره ظاهري او نمایشي ده، که دولت د فساد د لهمنځه وړلو په وړاندې د مبارزې د جوړښت برخه کې بدلون رامنځته نهکړي نو نهشي کولای چې د فساد پر وړاندې سمه مبارزه مخ ته یوسي."
د ښاغلي سیحون په خبره افغانستان کې تر دې دمه د فساد پر وړاندې مبارزه یوازې په خبرو خلاصه شوې نو ځکه افغان ولس د دولت د لوړپوړو چارواکو د شتمنیو د ثبت په څېر بهیرونو ته د شک په سترګه ګوري او نوموړی دا د خلکو د تېر اېستلو یوه هڅه ګڼي.
راپور: محمد حدیث پردېس
