د کابل امنیه قوماندانۍ مسؤلین وايي چې د یوې خیریه مؤسسې هغه هندي کارکوونکېيې د اختطاف چیانو له منګولو ازاده کړې چې یوه نیم میاشت وړاندې په کابل کې برمته شوې وه.
څلوېښت کلنه جودیت دسوزا د بشري حقونو هغه هندۍ کارکوونکي ده چې شاوخوا یوه نیمه میاشت وړاندې په کابل کې د نا معلومو وسلهوالو له لوري و تښتول شوه.
د کابل د امنیه قوماندانۍ له جنایي جرمونو سره د مبارزې رئیس فریدون عبیدي د شنبې په ورځ له ازادي راډیو سره په خبرو کې وايي دغه هندۍ مېرمن د جمعې په ورځ د افغان ځواکونو د عملیاتو په نتیجه کې د اختطاف چیانو له منګولو راخلاصه شوه.
که څه هم ښاغلي عبیدي په دې اړه زیات جزئیات ورنهکړل چې دسوزا چا برمته کړې وه او څنګه راخوشې شوه خو دا یې وویل چې د مېرمن دسوزا روغتیايي وضعیت سم دی او لاهم د دغې قضیې په اړه څېړنې روانې دي.
ښاغلی عبیدي دې ته په اشارې سره چې مېرمن دسوزا یې په کابل کې د هند سفارت ته سپارلې وايي:
"بلې پرون له غرمې وروسته د امنیتي قواوو په یوه اقدام کې هندۍ مېرمن چې اختطاف شوې وه خوشې شوې ده، هند سفارت ته مو سپارلې صحتیې ښه دی قضیه د څېړنو لاندې ده انشاالله د یوه مطبوعاتي کنفراس له لارې به نور جزئیات دوستانو ته ورسول شي."
د هند د بهرنیو چارو وزیرې سوشما سواراج بیا په خپلې ټویټر پاڼه کې د مېرمن دسوزا له خوشې کېدو هرکلی کړی دی.
جودیت دسوزا په کابل کې د آغا خان له مؤسسې سره کار کاوه چې د جون د میاشتې په نهمه نېټه د کابل د قلعه فتحالله د تایمني واټ په سیمه کې د نا معلومو وسلهوالو له لورې وتښتول شوه.
تر دې وړاندې په ننګرهار کې د کاټرين جېن وېلسن په نوم یوه اسټرلیايي مېرمن د نامعلومو وسلهوالو له لوري چې پوځي یونیفورمیې په تن وو برمته شوې وه.
په ورته وخت کې د ۲۰۱۵ کال د جون په میاشت کې هم نا معلومو وسلهوالو په کابل کې هالنډۍ مېرمن برمته کړې وه خو بیا وروسته د افغان ځواکونو په هڅو راخوشې شوه.
په کابل کې د بهرنیو اتباعو د لاډېر مصونیت لپاره موده وړاندې د کورنیو چارو وزارت په کابل کې د بهرنیو مرستندویه مؤسسو کارکوونکو ته لارښوونه وکړه چې د ځان د حفاظت لپاره باید ځانګړي محافظتي ساتونکي وګماري او د هغوی له موجودیت پرته په ښار کې تګ راتګ و نهکړي.
له دې ټولو سره سره د سیاسي چارو یو شمېر کارپوهان بیا وايي چې په افغانستان کې د بهرنیو اتباعو برمته نیونې سیاسي اړخ هم لري.
د سیاسي چارو کارپوه محمد بشیر هاتف وايي:
"دا د افغانستان د حکومت او همداراز د افغانستان د حکومت د ملګرو هېوادونو دنده ده چې په دې هېواد کې د خارجي اتباعو د ساتنې لپاره تدابیر ونیسي او دلته د سیاسي سیالیو په پایله کې پوځي رقابتونه او دغه راز داسې پېښې رامنځته نهشي چې په افغانستان کې د خلکو په روهیې باندې منفي اغېز ولري."
ښاغلی هاتف وايي که څه هم د امنیت تأمینول د حکومت مسؤلیت دی خو تر هرڅه وړاندې باید په کور دننه د بهرنیو هېوادونو تر منځ د نیابتي منفي سیالیو مخه ونیسي ځکه چې د ځینو بهرنیو اتباعو برمته نیونې پر یو بل د سیاسي فشار د راوړلو په هدف هم ترسره کېږي.
ښاغلی هاتف وايي چې په افغانستان کې ډېری داسې وسلهوالې ډلې شته چې د نورو دلایلو تر څنګ په ځینو مواردو کې د سیاسي لاملونو له کبله د نورو بهرنیانو په ګډون هندي وګړي برمته کوي چې له هغې ډلې یوهیې د لشکر طیبه وسلهواله ډله ده چې اصلي مرکز یې په پاکستان کې دی.
راپور: محمد حدیث پردېس
