په کابل کې د المپیک د ملي کمېټې سلګونو غړو د دغې کمېټې په اړه د ولسمشرد وروستي فرمان په ملاتړ کې د منډو سیالۍ ترسره کړه.
دوی ویل چې د ولسمشر وروستی فرمان یو ښه اقدام دی او د ورزش د ودې سبب به شي.
دا په داسې حال کې ده چې د ظاهراغبرپه مشرۍ بیا زرګونه ورزش کارانو په دې وروستیو د ولسمشر د دغه فرمان پر ضد لاریون وکړ.
د سپورټ په برخه کې د نظر خاوندان بیا وایي، دا ډول اختلافات د ورزش کارانو پر روحیې ناوړه اغیز کوي.
که څه هم افغان لوبغاړي په بېلابېلو برخو کې ښه ځلیدلي او هېواد ته یې ویاړونه راوړي، خو په دې وروستیو کې د المپیک کمېټې دننه جدي مخالفتونو ځیني اندیښنې راپارولي دي.
د المپیک په کمېټه کې پخوا د مخالفتونو یوازې خبرې کیدلې، خو په دې وروستیو کې دغه مخالفتونه بربنډ شول او له ورایه داسې ښکاره شوه چې په المپیک کمېټه کې یو لوی درز رامنځ ته شوی.
د پنجشنبې په ورځ سلګونه ورزشکارانو د المپیک کمېټې په اړه د ولسمشر وروستی فرمان وستایه او په دې ویاړ یې د منډو سیالۍ ترسره کړه.
د دغو ورزشکارانو په استازیتوب جاوید دلاور وویل:
"دغه سیالۍ د ولسمشر د حکم نه د مننې په هدف چې د حمل په ۲۵ ویشتمه یې صادر کړ هغه ټیم چې په حقه و، مشروعیت یې لرو مشروعیت وکړ، نو اوس موږ د ولسمشر نه د مننی په هدف دغه سیالۍ جوړې کړې دي."
په المپیک کمېټه کې له مخالفتونو وروسته ولسمشر د مخالفتونو د حل لپاره یو پلاوی وټاکه او له هغې وروسته یې د یوه فرمان له مخې فهیم هاشمي د المپیک کمېټې د مشر په توګه وټاکه.
د ولسمشر مرستیال ویاند دواخان مینه پال وایي، هیله ده چې له دغه فرمان سره د المپیک دننه مخالفتونه له منځه ولاړ شي.
ښاغلي مینه پال زیاته کړه:
"د المپیک په کمېټه کې ډیرې ستونزې وې، ولسمشر د دې ستونزې د څېړنې لپاره، هلته پلاوی واستوو او تصمیم په دې باندې ونیول شو چې فهیم هاشمي هلته د ریس په توګه باندې مقرر شي، زموږ هیله دا ده چې د فهیم هاشمي په ورتګ سره هلته د المپیک په ملي کمېټه کې چې مخکې ستونزې وې."
خو شااوخوا یوه اوونۍ وړاندې بیا د ظاهراغبر په مشرۍ چې هغه ځان د المپیک
کمېټې مشر بولي، زرګونه ورزش کاران سړکونو ته راووتل او د ولسمشر وروستی فرمان یې وغانده.
جمهوري ریاست وایي، طبیعي خبره ده چې د ولسمشر فرمان ځیني حساسیتونه راپارولي او وروستي اعتراضونه هم د همدغو حساسیتونو زیږنده ده.
بل لورته د ورزش د برخې یو شمېر کارپوهان وایي چې د المپیک دننه موجوده اختلافات باید پای ته ورسیږي دا ځکه چې د ورزشکارانو پر روحیې ناوړه اغیزه کوي.
د کرکټ بورډ پخواني مشر شهزاده مسعود ازادي راډیو ته وویل:
"لومړی خو تربیتي بدني یا المپیک غیرې سیاسي ارګانونه دي، د دوی اختلافات به په هغو ځوانانو باندې چې په تېرو څوارلسو کلونو کې مډالونه او افتخارات یې افغانستان ته راوړي دي، سخت منفي تاثیر وړکړي. زما غوښتنه د ملي یووالي له حکومته دا ده چې ورزش کې دې دا ډول کارونه نه کوي چې خدای ج مکړه، د لوبغاړو د پنځلسو کلنو لاس ته راوړنې له اوبو سره لاهو کړي."
افغان ورزش کارانو په تېرو څو کلونو کې په بېلابېلو برخو کې افغانستان ته ویاړونه راوړل او د افغانستان بیرغ یې د نړۍ په ګوډ ګوډ کې ورپاوه.
د ورزش مینه وال وایي، افغان حکومت باید د ورزش د ودې لپاره نور جدیت هم وکړي او په ورزشي بنسټونو کې د مخالفتونو مخنیوي ته اقدامات وکړي.
راپور: ابراهیم صافی