د لاسرسۍ وړ لېنکونه

تازه خبر
سه شنبه ۷ زمری ۱۴۰۴ کابل ۰۵:۳۴

نړۍ

روسیه په ارمنستان کې خپله پوځي اډه په جنګي الوتکو لاپیاوړې کړې

روسي رسنیو راپور ورکړی چې دغه هېواد په ارمنستان کې خپله پوځي اډه په جنګي الوتکو او یوې مډرني هلیکوپترې لاپیاوړې کړې ده.

د روسیې پوځ نن په یوې اعلامیې کې ویلي چې دغه څلور MiG-29 ډ‌وله جنګي الوتکي او یوه Mi-8MT ډوله هلیکوپتره به له ترکیې سره د ارمنستان پر پوله په ایریبوني Erebuni نومې پوځي اډه کې ځای پرځای شي.

د دې هوایې اډې پیلوټان به په مارچ میاشت کې ازمایشي پروازونه پیل کړي.

روسیه د ارمنستان یو عمده پوځي تمویلوونکی هېواد دی.

د ورځې تازه خبرونه دلته ولولئ

چارواکي: غزه کې د جګړې له پيله د وژل شویو فلسطینیانو شمیر له ۶۰ زرو واوښت

د اسراییل او حماس جګړه، ارشیف
د اسراییل او حماس جګړه، ارشیف

د غزې د روغتیا وزارت وایي، پر دغې تړانګې د اسراییل د بریدونو له پيله تراوسه څه باندې ۶۰ زره فلسطینیان وژل شوي دي.

د اسوشیتید پریس خبري اژانس د راپور له مخې وزارت دغه شمیرې نن سه شنبه ( د زمري ۷مه) اعلان کړي، خو دا یې نه دي ویلي چې څه شمیر یې پوځیان او څومره یې ملکیان دي.
خبر کې راغلي چې د وژل شویو شاوخوا نیمایي برخه ښځې او ماشومان دي.

دا په داسې حال کې ده چې غزه کې د لوږې کچې د لوړېدو په اړه د ملګرو ملتونو له خبرداریو وروسته دغې تړانګې ته ځمکنۍ او هوایي مرستې رسیدلي دی.

هندي چارواکي وایي، هغه درې ( ترهګر) یې وژلي چې اپریل میاشت کې یې پر سیلانیانو برید کړی و

د هند او پاکستان پوله
د هند او پاکستان پوله

د هند د کورنیو چارو وزیر امیت شا نن ( سه شنبه د اسد ۷مه) ویلي، هغه درې " ترهګر" یې وژلي چې په تیره اپریل میاشت کې یې په جمو او کشمیر کې پر سیلانیانو برید کړی و.

هغه برید کې ۲۶ تنه ووژل شول چې وروسته یې د هند او پاکستان ترمنځ څلور ورځنۍ پوځي شخړې ته هم زمینه برابره کړه.

هغه مهال هندي چارواکو بریدګر پاکستاني اتباع بللي وو چې په وینا یې د اسلام اباد په ملاتړ یې د کشمیر پهلګام سیمه کې دا خونړی برید کړی دی.

پاکستاني اسلامپاله ډلو په دغه برید کې لاس لرل رد کړل.

دا له ۲۰۰۸ کال راهیسې پر ملکیانو تر ټولو خونړی برید بلل شوی دی.

ملګروملتو له ایران څخه وغوښتل چې اعدامونه ودروي

د ملګروملتو د بشري حقونو لوی کمېشنر فولکر ترک پرون (دوشنبې) په یوه بیان کې وویل چې په ایران کې د اعدامونو پر زیاتېدو اندېښمن دی او له دې هیواده غواړي چې د اعدام سزاوې سمدستي بس کړي.

په اعلامیه کې راغلي: «دا چې تر دې دمه په روان کال کې په ایران کې د اعدام سلګونه حکمونه اجرا شوي دي، ښيي چې وضعیت څومره اندېښمنوونکی دی.»

هغه په دوام کې په ایران کې د اعدام د سزا د «فوري درولو» پر ضرورت ټینګار وکړ.

د ملګرو ملتونو د بشري حقونو د دفتر له راټولو شویو معلوماتو سره سم، د روان ۲۰۲۵ کال په لومړیو شپږو میاشتو کې په ایران کې لږ تر لږه ۶۱۲ کسان اعدام شوي دي.

په دې بیان کې چې د ملګرو ملتونو د بشري حقونو لوی کمېشنر خپور کړی، راغلي چې دا شمېر د ۲۰۲۴ کال په همدې موده کې د اعدامونو د شمیرې دوه برابره زیات دی.

د ایران د بسیج یو قوماندان په زاهدان کې ووژل شو

په زاهدان کې د بسیج په نوم د ایران د رضاکار ځواک د اډې قوماندان وژل شوی دی

د سپاه پاسداران د ځمکنيو ځواکونو د قدس سيمه‌ييزې اډې پرون (دوشنبې) خبر ورکړ چې د د دې ځواک د يوې اډې قوماندان په یوه «تروریستي برید» کې وژل شوی دی.

د دې اډې په خبرپاڼه کې د وژل شوي کس نوم «جواد کریم‌کُشته» بلل شوی او ويل شوي چې نوموړی د یکشنبې په ورځ (د زمريږ/ اسد ۵ مه) د زاهدان ښار د شيرآباد سيمې په «امام هادي» جومات کې «د لمونځ کوونکو د امنيت د ساتنې د ماموريت پر مهال» وژل شوی دی.

تر اوسه د دې پېښې په اړه نور جزئيات نه دي خپاره شوي.

د زمري په څلورمه نېټه په زاهدان ښار کې د سيستان او بلوچستان د ولايت د عدليې پر ودانۍ وسله‌وال بريد شوی و.

د «جیش‌العدل» په نوم ډلې، چې ايران او امريکا يې يوه «ترهګره» ډله بولي، د دغه بريد مسووليت پر غاړه واخیست.

په غزه کې ۱۴کسان د لوږې او خوارځواکۍ له کبله مړه شوي

د امریکا ولسمشر ډونالډ ترمپ وايي، "په غزه کې د حماس وسله والې ډلې پر وړاندې جګړه باید په بل ډول پر مخ لاړه شي".

هغه دا خبره نن په سکاتلنډ د بریټانیا له صدراعظم کیرسټارمر سره یو ځای خبریالانو ته کړې ده.

ټرمپ ویلي، د اسراییلو صدراعظم بنیامین نتانیاهو ته مې ویلي چې د حماس پر وړاندې باید جګړه بل ډول پرمخ لاړه شي.

ټرمپ خبریالانو ته وړاندې وویل، "له تلویزیوني تصویرونو داسې ښکاري چې په غزه کې ماشومان وږي دي".

بل پلو، په غزه کې روغتیايي چارواکي وايي، "په تیرو ۲۴ساعتونو کې د لوږې او خوارځواکۍ له کبله ۱۴کسان مړه شوي دي".

رویترز ویلي، له دې سره د هغوو کسانو شمیر چې د جګړې له پیل راهیسې د لوږې او خوارځواکۍ له امله مړه شوي ۱۴۷ تنو ته پورته شو چې ۸۹ يې ماشومان دي.

په عین حال کې د روغتیا نړیوال سازمان وايي، نن يې په بشري مرستو بار ۶۰لارې غزې ته استولي دي.

په غزه کې د بشري ناورین او د لوږې له کبله د ماشومانو په ګډون د خلکو له مړینې وروسته نړیوالو پر اسراییلو فشارونه زیات کړل، څو غزې د بشري مرستو د انتقال لپاره اجازه ورکړي.

د مالیزیا په منځګړیتوب تایلند او کمبویا اوربند وکړ

تایلند او کمبودیا د مالیزیا په منځګړیتوب له قید او شرط پرته په اوربند سلا شوي دي.

دا اوربند وروسته له هغې اعلانیږي چې د داوړو هېوادونو ترمنځ په پنځه ورځینۍ نښته کې ۳۵کسان ووژل شول او ۲۶۰ نور ټپیان شول.

د اوربند پلي کیدل د سه شنبې په شپه پیلږي.

د تایلند او کمبودیا ترمنځ د اوربند په خبرو اترو کې د مالیزیا په ګډون امریکا او چین هم رول درلود.

د دواړو هېوادونو مشران هیله مند دي چې وضعیت بیرته عادي حالت ته راوګرځي او بې ځایه شوي خپلو کورونو ته ستانه شي.

د تایلند او کمبودیا ترمنځ د پنج شنبې په ورځ په سرحدي سیمه جګړه د یوه ماین د چادونه له کبله پیل شوه.

د ماین په چادونه کې پنځه تایلندي سرتیري ټپیان شوي وو.

حوثي وسله وال؛ هغه کمپنۍ به په نښه شي چې له اسراییلو سره سوداګریز کاروبار کوي

حوثي وسله والو د روانې جولای میاشتې په سر کې دا یونانۍ کشتۍ په نښه کړه.
حوثي وسله والو د روانې جولای میاشتې په سر کې دا یونانۍ کشتۍ په نښه کړه.

د یمن حوثي ډلې ګواښ کړی چې د هرې هغې کمپنۍ کشتۍ به په سره سمندرګي کې په نښه کړي چې له اسراییلو سره کاروبار کوي.

د دې ډلې پوځي ویاند پرون په یوه ټلویزیوني وینا کې وویل دا کشتۍ دې ته له پام پرته چې په کوم هېواد پورې تړلې دي وویشتل کېږي. ویاند زیاته کړه چې دا د اسراییلو پرضد د دې ډلې د عملیاتو څلورم پړاو دی.

ایران پلوې حوثي ډلې د ۲۰۲۳ کال له اکتوبر میاشتې راهیسې وروسته له دې چې د اسراییل او حماس ډلې ترمنځ جګړه پیل شوه له حماس سره د خواخوږۍ له مخې پر نړیوالو کشتیو حملې پیل کړې.

په سوریه کې په راروانه سپټامبر میاشت کې پارلماني انتخابات کېږي

د سوریې ولسمشر احمدالشرع
د سوریې ولسمشر احمدالشرع

د سوریې د انتخاباتو کمیسیون وايي تمه ده چې په دې هېواد کې به په راروانه سپټمبر میاشت کې د لومړي ځل لپاره پارلماني انتخابات وشي.

د سوریې سنا دولتي خبري آژانس پرون د انتخاباتو د کمیسیون د رییس محمد طها له قوله راپور ورکړ چې نوموړی وايي، د خلکو د شورا د ۲۱۰ کسیز پارلمان د غوراوي لپاره انتخابات به د سپټمبر د ۱۵ او شلمې نېټې ترمنځ ترسره شي.

د خبر له مخې ولسمشر احمدالشرع د انتخاباتو د قانون مسوده ترلاسه کړه چې له مخې یې د پارلمان د غړو شمېر له ۱۵۰ څخه ۲۱۰ ته لوړ شوی دی. د پارلمان د غړو له دریو یوه برخه به ولسمشر غوره کوي.

د سوریې حکومت ژمنه کړې چې دا انتخابات به ټولشموله وي او همداراز بهرنیو څارونکو ته یې پر دې بهیر د څار بلنه ورکړې ده.

چارواکي وايي د شمال د کردمیشتو سیمو او سویدا ولایت چې اکثر وګړي یې په دروزي اقلیت پورې تړلي دي، څوکۍ به د وګړو د شمېر په اساس وټاکل شي.

د روسیې پر والګاګراد ښار د اوکراین د بې پیلوټه الوتکو حملو مالي زیانونه اړولي دي

د روسیې والګاګراد ښار (آرشیف)
د روسیې والګاګراد ښار (آرشیف)

د روسیې د جنوبي سیمې والګاګراد چارواکي وايي چې د اوکراین د ویشتل شویو ډرونونو د ټوټو د راپرېوتو له کبله د اورګاډي د بریښنا یو سیسټم ویجاړ شوی او د رېلونو تګ راتګ له خنډ سره مخامخ شوی دی.

د والګاګراد والي اندرې بوښاروف پر خپله ټلګرام پاڼه په یوه بیان کې وویل چې دې ډرونونو یا بې پیلوټه الوتکو انساني تلفات نه دي اړولي.

د روسیې دفاع وزارت پر خپله ټلګرام پاڼه ویلي دي چې د هوايي مدافعې ځواک یې په والګاګراد کې د اوکراین نهه ډرونونه ویجاړ کړي دي. دې وزارت ویلي دي چې روسیې تېره شپه د دې هېواد په ۱۲ سیمو او همداراز په تورسمندرګي او کریمیا ټاپووزمه کې د اوکراین ۹۹ ډرونونه له منځه وړي دي.

اوکرایني چارواکو تراوسه په دې اړه څه نه دي ویلي.

اسراییلو د غزې په دریو سیمو کې وقفه یي اوربند اعلان کړی

د ۲۰۲۵ کال جولای، غزه
د ۲۰۲۵ کال جولای، غزه

اسراییلو اعلان کړی چې د غزې په دریو ساحو کې یې په جګړو کې محدوده وقفه راوستې ده. د دې اعلان هدف دا دی چې په دې تړانګه کې د راغلي بشري ناورین له مصیبت ځپلو سره مرستو ته موقع ورکړل شي.

د اسراییلو پوځ نن سهار وختي وویل چې دا تکتیکي وقفه به د غزې په ښار، دیر البلاح او مواصي سیمو کې تر بل اعلان پورې هره ورځ د لسو ساعتونو لپاره اخیستل کېږي.

د ملګروملتونو د بشري مرستو د برخې مشر ټام فلیچر د اسراییلو د دې اعلان هرکلی کړی. ښاغلي فلیچر پر خپله ایکس پاڼه لیکلي چې په غزه کې د ملګروملتو اړوندې ادارې به تر وسې وسې هڅه وکړي چې وږو خلکو ته مرستې ورسوي.

په دې سیمو کې وقفه یي اوربند وروسته له هغه اعلانېږي چې په غزه کې د پوځي عملیاتو پرمهال د اسراییلو اقداماتو د نړیوالو سخت غبرګونونه وپارول او په دې سیمه کې د قحطۍ د ګواښ په اړه اندېښنې څرګندې شوې.

نور راوښيه

XS
SM
MD
LG