د روسیې د پوځ یو جګپوړی جنرال چې په اوکراین کې د کیمیاوي وسلو په کارولو تورن و، نن په مسکو کې په یوه چاودنه کې ووژل شوی.

د آزادۍ راډیو سرچینې وايي، د روسیې د اټومي، بیالوژیکي او کیمیاوي دفاعي ځواک مسوول ډګرجنرال ایګور کیریلوف د اوکراین د استخباراتو په برید کې په نښه شوی دی.

د روسیې د تحقیقاتو کمیټې په یوه بیان کې ویلي چې ۵۴ کلن جنرال کیریلوف او د هغه مرستیال نن سهار وختي په مسکو کې د یوې ودانۍ مخې ته د ځای پرځای شوي بم په چاودنه کې ووژل شول.

کیریلوف د روسیې د پوځ تر ټولو جګپوړی چارواکی دی چې پر اوکراین د روسیې د یرغل له پیله ظاهرا په یوه هدفي حمله کې وژل کېږي.

له دې پېښې یوه ورځ مخکې د اوکراین د امنیتي خدماتو ادارې SBU خبر ورکړ چې اوکرایني څارنوالانو کیریلوف رسما د اوکراین پرضد د روسیې په جګړه کې د اوکرایني ځواکونو پرضد د کیمیاوي وسلو په کارولو تورن کړی دی.

د ایران د بهرنیوچارو وزارت اعلان کړی چې په سوریه کې د دې هېواد سفارت به د لازمو شرایطو له برابرېدو وروسته بیا پرانیستل شي.

د بهرنیوچارو وزارت ویاند اسماعیل بقايي نن (د لیندۍ ۲۷مه) وویل چې د ایران د سفارت بېا پرانیسته یولړ شرایطو ته اړتیا لري چې تر ټولو مهم یې د سفارت او د سفارت د کارکوونکو د امنیت او خوندیتوب تضمین دی.

په سوریه کې د ایران سفیر حسین اکبري د لیندۍ په ۲۵مه نېټه ویلي و، چې په دمشق کې د ایران سفارت به په نژدې راتلونکي کې خپل فعالیت بیا پیل کړي.

ښاغلي اکبري د سوریې د تحولاتو په اړه په یوه مرکه کې ویلي و، وروسته له دې چې د هیات تحریر شام په مشرۍ وسله والې ډلې دمشق ته ورسېدې، د ایران د سفارت امنیت یې خوندي کړ. د هغه په وینا ایران غواړي چې په دمشق کې خپله قونسلګري بیا پرانیزي او سوریې هم چمتووالی ښودلی دی.

د ډسمبر په اتمه نېټه وروسته له دې چې وسله والې ډلې دمشق ته ننوتلې، ایراني ډيپلوماتان له سفارت څخه ووتل او د ایران سفارت ولوټل شو.

د بشاراسد د رژیم له پرځېدو وروسته پر ټولنیزو شبکو هغه تصویرونه خپاره شول چې یوه ډله کسان د ایران د سفارت د اړوندو اداري وسایلو او تجهیزاتو د ورانولو په حال کې ښيي.

د اروپايي کمیسیون مشرې اورزولا فان دیرلین نن د ترکیې په پلازمېنه انقره کې له ولسمشر رجب اردوغان سره په کتنه کې د سوریې د روان وضعیت په اړه خبرې وکړې.

د رویټرز خبري آژانس د راپور له مخې ښاغلي اردوغان په دې کتنه کې هیله څرګنده کړه چې اروپايي ټولنه به خپل هېواد ته د هغو سوري کډوالو په بېرته ستنولو کې مرسته وکړي چې له تېرو دیارلسو کلونو راهیسې په سوریه کې د کورنۍ جګړې له پیلېدو سره سم ترکیې ته کډوال شوي دي.

ښاغلي اردوغان له مېرمن فان دیرلین سره تر کتنې وروسته په ګډه خبري غونډه کې وویل چې ترکیه په سوریه کې د یوه پراخ بنسټه حکومت د جوړېدو په برخه د اروپايي کمیسیون له دریځ سره موافق دی.

اروپايي ټولنې تېره اونۍ اعلان وکړ چې نژدې سل ټنه طبي تجهیزات او نور د اړتیا وړ وسایل به ترکیې ته واستوي څو وروسته د ملګروملتونو د اړوندو ادارو له خوا سوریې ته ولېږدول شي.

د اسد رژیم د ډسمبر په اتمه هغه مهال وپرځېده چې د هیات تحریر شام ډلې په مشرۍ وسله وال د چټک پرمختګ په ترڅ کې پلازمېنې دمشق ته ورسېدل.

د پاکستان په شمال لویدیځ کې د پولیو د واکسین پرټیمونو پرون دوشنبې د وسله والو په بریدونو کې د روغتیا پالانو یو پولیس ساتونکی وژل شوی او دوه روغتیا پالان ټپیان شوي دي.

د جرمني خبري آژانس د راپورله مخې په یوه برید کې چې پرون په ټول هیواد کې د پولیو د واکسین د کمپاین په لومړۍ ورځ د خیبرپښتونخوا ایالت د کرک په ولسوالۍ کې د واکسیناتورانو پرټیم وشو، یوپولیس ووژل شو او یو روغتیایي کارکونکي ټپي شو.

همدارنګه پرون په یوه بل برید کې چې د دې ایالت په بنو ولسوالۍ کې وشو، یو روغتیایي کارکونکی ټپي شوی دی. د دغو بریدونو مسولیت تراوسه چا یا کومې ډلې ندی اخیستی خو د راپورله مخې د پولیو د واکسین د کمپاین په لومړۍ ورځ دغه بریدونه ښیي چې په وروستیو میاشتو کې د شخړو زیاتوالي څومره د دغه فلج کونکې ناروغۍ د نویو پیښو له زیاتوالي سره مرسته کړې ده. د روان کال له پیل راهیسې په دې هیواد کې د پولیو نوې ۶۳ مثبتې پیښې ثبت شوې دي.

د پاکستان د روغتیا وزارت په وینا د پولیو د واکسین په دغه نوي کمپاین کې به د هیواد په ۱۴۳ ولسوالیو کې له ۴۴ ملیونه زیات ترپنځو کلونو کم عمره ماشومان واکسین شي.

تمه ده چې د اروپايي کمیسیون مشره اورزولا فان دیرلین نن د ترکیې په پلازمېنه انقره کې له ولسمشر رجب اردوغان سره په کتنه کې د سوریې د روان وضعیت په اړه خبرې وکړي.

مېرمن فان دیرلین پر خپله ایکس پاڼه لیکلي چې له اردوغان سره د دې خبرې به د بشار الاسد د واکمنۍ له پرځېدو وروسته د سوریې د ملي وحدت او د اقلیتونو د خوندیتوب پر مسایلو متمرکزې وي.

د دوی په خبرو کې به سوریې ته د بشري مرستو د رسولو موضوع هم شامله وي.

اروپايي ټولنې تېره اونۍ اعلان وکړ چې نژدې سل ټنه طبي وسایل او نور د اړتیا وړ تجهیزات به ترکیې ته ولېږي چې وروسته به د ملګروملتونو د اړوندو ادارو له خوا سوریې ته ولېږدول شي.

د اسد رژیم د ډسمبر په اتمه نېټه وروسته له هغه وپرځېده چې د هیات تحریر شام ډلې په مشرۍ وسله وال د چټک پرمختګ په ترڅ کې پلازمېنې دمشق ته ورسېدل.

اوکراین د روسیې په لویدیځه کورسک سیمه کې د شمالي کوریا هغو ځواکونو ته چې د روسیې په ملاتړ جګړه کوي د مرګ ژوبلې د اړولو خبر ورکوي.

د اوکراین پوځي استخباراتو نن (د ډسمبر ۱۶مه) په یوه بیان کې وویل چې لږترلږه دېرش تنه کوریايي سرتېري مړه یا ټپیان شوي دي. په بیان کې راغلي دي چې کوریايي ځواکونو ته درنه مرګ ژوبله اوښتې ده.

وروسته له دې چې پیونګ یانګ د روسیې جګړې ته خپل سرتېري واستول، دا لومړی ځل دی چې کییف د هغوی د مرګ ژوبلې په اړه دقیق معلومات ورکوي. آزادي راډيو د اوکراین دا ادعا په خپلواک ډول نه شي تاییدولای. اوکرایني ځواکونو د روان کال په اګست کې د روسیې د کورسک سیمې یوشمېر ناحیې ونیولې او تراوسه هم پر ځینو سیمو ولکه لري.

د سوریې پرځول شوی ولسمشر بشارالاسد وايي چې دی د ډسمبر په اتمه له دمشق څخه تر وتلو وروسته د حمیمیم پوځي اډې ته چې د مسکو تر ادارې لاندې دی ولاړ خو کله پر دې اډې د ډرونونو حملې وشوې روسیې ته ولېږدول شو.

اسد له مسکو څخه چې ده ته یې سیاسي پناه ورکړې، د سوریې د جمهوري ریاست پر ټلګرام پاڼه په یوه لیکلی بیان کې دا څرګندونې کړي.

نوموړي په دې اړه چې ولې له سوریې ووت ویلي چې د جګړو په ټول بهیر کې ده هېڅکله هم دا فکر نه کاوه چې له واکه به لاس واخلي او یا به په بل هېواد کې پناه واخلي. اسد زیاتوي چې د یکشنبې په ورځ سهار وختي لاهم په دمشق کې پر خپله دنده و، خو کله چې د ده په وینا تروریستي ډلې دمشق ته ننوتلې، نو له روسیې سره په تفاهم کې لاذقیې ته ولاړ څو له هغه ځایه پر پوځي عملیاتو څارنه وکړي.

د اسد په بیان کې یادونه شوې چې دی کله سهار مهال په حمیمیم کې د روسانو پوځي اډې ته ورسېد نو خبر شو چې ده ته وفادار ځواکونه د جګړې له ټولو کرښو څخه په شا شوي او وروستۍ پوځي قطعې هم سقوط وکړ.

د اسد د کورنۍ ۵۴ کلنه واکمني د ډسمبر په اتمه نېټه وروسته له هغه وپرځېده چې د هیات تحریر شام ډلې په مشرۍ وسله وال پلازمېنې دمشق ته ننوتل.

د هند د کلاسیکې موسیقۍ د مشهور طبله ږغوونکي ذاکر حسین پر مړینه په ټوله نړۍ کې د موسیقۍ مینه والو او چارواکو خپګان ښوولی دی.

د هند صدراعظم نریندرا مودي لیکلي، چې د طبلو افسانوي ماسټر ذاکر حسین د مړینې له کبله خپه دی. د هغه په وینا ذاکر حسین د هند د کلاسیکې موسیقۍ په نړۍ کې انقلاب راوستلی و.

د ذاکر حسین کورنۍ په یوه اعلامیه کې ویلي، هغه پرون یکشنبه د ۷۳ کلونو په عمر د امریکا د سن فرانسیسکو په یوه روغتون کې له دې نړۍ سترګې پټې کړې.

هغه له څه مودې د سږو سخته ناروغي درلوده. ذاکر حسین د نورو جایزو تر څنګ په ۲۰۲۳م کال کې پدما وبهوشن غیرپوځي جایزه ګټلې وه، چې په هند کې د اعتبار له مخې دویمه درجه معتبره جایزه ده.

د قرغزستان صدراعظم عقیل بېګ جباروف نن د توضیحاتو له ورکولو پرته له خپلې دندې استعفی وکړه.

د قرغزستان د ولسمشر صدر جباروف دفتر تایید کړه، چې صدراعظم عقیل بېګ له خپلې دندې لیرې شوی، چې پر یوه بل مقام به وټاکل شي. د ولسمشر او پخواني صدراعظم تخلصونه یو دي، خو خپلوي نه سره لري.

ولسمشر، ۶۴ کلن عادل بېګ قسیم علییف د وزیرانو کابینې د مشر او سرپرست صدراعظم په توګه نومولی دی. په وروستیو کې د اداري فساد په تور د مالیې د عالي رتبه چارواکو له نیولو وروسته پر ۶۰ کلن عقیل بېګ جباروف د استعفی لپاره فشارونه زیات وو.

هغه له ۲۰۲۱م کال راهیسې د حکومت مشري کوله او دی د قرغزستان هغه صدراعظم و، چې تر ټولو زیات وخت په واک کې پاتې و.

الجزیرې ټلویزیوني شبکې پرون خبر ورکړ، چې پر غزه د اسرائیل په برید کې د دوی یو کامره مین وژل شوی دی.

په قطر کې دېره دغې شبکې د أحمد اللوح په نوم د خپل دغه کامره مین د وژنې خبر تایید کړی دی. دا په داسې حال کې ده، چې د فلسطینیانو په قلمرو، غزې تړانګه کې له څه باندې ۱۴ میاشتو راهیسې د اسرائیل او حماس ډلې ترمنځ جګړه روانه ده.

د امریکا متحد ایالتونه او اروپايي ټولنه توندلارې ډله حماس یو تروریستي سازګان ګڼي. الجزیرې ویلي احمد اللوح د غزې په مرکزي برخه کې د نصیرات په نوم د کډوالو پر کمپ د اسرائیل په بمبارۍ کې وژل شوی دی.

دا د الجزیرې پنځم خبریال دی، چې په دې جګړه کې وژل کېږي. د خبریالانو د خوندیتوب کمېټې (CPJ) وايي په منځني ختیځ کې د څه باندې ۱۴ میاشتنیو ناکراریو پر مهال تر پرون یکشنبه په غزه، لوېدیځه غاړه، اسرائیل او لبنان کې د وژل شویو خبریالانو او د رسنیو د کارکوونکو شمېر ۱۳۷ ته رسېدلی دی.