افغانستان
د فوټسال نړیوال جام؛ ارجنټاین افغانستان ته ماتې ورکړه
![د افغانستان فوټسال ملي لوبډله.](https://d1pp940guyio69.cloudfront.net/ad12df39-c955-4892-af66-cf983258970d_w250_r1_s.jpeg)
د فوټسال نړیوال جام په دویمې سیالۍ کې افغانستان نن چهارشنبه د ارجنټاین پر وړاندې سیالي وکړه چې ۲ـ۱ یې ماتې وخوړه.
دغه سیالي چې د کابل پر وخت ماښام ۷:۳۰ بجې پیل شوې وه، د لوبې په لومړۍ او دویمې نیمايي کې ارجنټاین دوه ګولونه ووهل او افغانستان د یوه ګول په وهلو سره لوبه وبایلله.
دا په روان نړیوال جام کې د افغانستان دویمه سیالي وه چې په لومړۍ لوبه کې یې انګولا ته ماتې ورکړې وه.
افغان لوبډله به په ګروپي پړاو کې خپله وروستۍ لوبه له اکراین سره د سپټمبر په ۲۱مه نېټه ترسره کړي.
کرکټ؛ سویلي افریقا افغانستان ته د ۱۰۷ منډو هدف وټاکه
![د افغانستان او سويلي افريقا کرکټ لوبه.](https://d1pp940guyio69.cloudfront.net/1d6e4f8e-f35a-431a-bb95-40960a7f130d_cx0_cy10_cw0_w250_r1_s.jpeg)
د افغانستان او سویلي افریقا ترمنځ د درې یو ورځنیو سیالیو د لوبلړۍ لومړۍ لوبه پیل شوې ده، چې سویلي افریقا افغانستان ته د ۱۰۷ منډو هدف وټاکه.
دغه سیالي چې د عربي متحده اماراتو په شارجه لوبغالي کې د کابل پر وخت مازدیګر ۴:۳۰ بجې پیل شوې مېلمه لوبډلې یې پچه وګټه او توپوهنه یې غوره کړه.
سویلي افریقا د ټولو لوبغاړو تر سوځېدو وروسته په ۳۳.۳ اورونو کې ۱۰۶ منډې وکړې.
د یادې لوبډلې په ګټه تر نورو زیاتې ۵۲ منډې اېون مولډر وکړې.
افغانستان ته په توپاچونه کې فضل حق فاروقي ۴، الله محمدغضنفر ۳ او راشدخان دوه لوبغاړي وسوځول.
افغانستان به په څو شېبو کې د خپلې توپوهنې پاڼۍ پیل کړي.
ريچارد بېنيټ: هيڅ پلمه نهشي کولی له زدهکړو د افغان نجونو محروميت توجيه کړي
![د نجونو يو ښوونځی](https://d1pp940guyio69.cloudfront.net/e4e9c7b8-31f0-45b3-856c-e10f220dfa39_w250_r1_s.jpg)
د افغانستان د بشري حقونو لپاره د ملګروملتونو ځانګړی راپورتر ریچارد بېنیټ وایي، هیڅ پلمه نهشي کولای له زدهکړو او تحصیله د افغان نجونو محرومیت توجیه کړي.
ښاغلي بېنیټ نن چهارشنبه (د وږي ۲۸مه) پر خپله ایکسپاڼه یا پخواني ټویټر له ښونځیو د افغان نجونو د محرومیت د درېیمې کلیزې په مناسبت دا څرګندونې کړي او نوموړی له هغه نړیوال کمپاین سره یوځای شوی چې شعار یې دی: "د افغان نجونو غږ، زدهکړې نهشي منتظرېدای."
هغه ټینګار کړی چې، افغان نجونې او ښځې د زدهکړو حق لري.
طالبانو په ۱۴۰۰هجري لمریز کال کې واک ته له رسېدو وروسته د نجونو ښونځي وتړل او وروسته یې د نجونو پوهنتونونه هم بند کړل.
له پاکستانه سکاټلنډ ته د رسېدلو ۱۹ افغان نجونو طبي زدهکړې پیل شوي
![د سکاټلنډ بیرغ](https://d1pp940guyio69.cloudfront.net/582B4FF7-04F0-4F20-B4B3-86844AD8B967_cx0_cy0_cw70_w250_r1_s.jpg)
په سکاټلنډ کې د هغو ۱۹ افغان نجونو طبي زدهکړې پيل شوي چې د تېرې اګست میاشتې په ۲۱مه له پاکستانه دغه هېواد ته ورسېدې.
یوه له دغو محصلانو څخه زهرا حسیني ده.
نوموړې فرانس پرېس اژانس ته ویلي، سکاټلنډ ته په رسېدو یې د ډاکترې کېدو ارمان پوره شو.
دغه افغان محصلانې، چې افغانستان کې له پوهنتونه منع شوې وې، د لیندا نورګروف بنسټ له درېیو کلنو هڅو وروسته بریتانیا ته ولېږدول شوې.
۳۶ کلنه لیندا چې یوه سکاټلنډۍ مرستندویه کارکوونکې وه، ۲۰۱۰م کال کې د اسلامپاله ملېشو لهخوا افغانستان کې وتښتول شوه او بیا د امریکایي ځواکونو لهخوا د ژغورنې د عملیاتو پر مهال ووژل شوه.
د لیندا تر وژلو وروسته د هغې مور او پلار د هغې په نوم بنسټ جوړ کړ او همدغه بنسټ دغه کابو شل افغان نجونې اوس د تحصیل د دوام لپاره بریتانیا ته غوښتي دي.
طالبانو د ۲۰۲۲م کال په ډسمبر کې د نجونو پوهنتونونه وتړل.
میرویس اشرف د یوې بلې دورې لپاره هم د افغانستان کرکټ بورډ مشر وټاکل شو
![میرویس اشرف د کرکټ بورډ یوازېنی مشر دی چې خپله لومړۍ کاري دوره یې پوره کړه او بیا ځلي په دې دندې وګومارل شو.](https://d1pp940guyio69.cloudfront.net/5070d8a1-1234-451e-abba-64799c4f3798_w250_r1_s.jpg)
د افغانستان کرکټ بورد اعلان کړی چې عمومي مشر یې میرویس اشرف د یوې بلې درې کلنۍ دورې لپاره هم پر خپله دنده پاتې شو.
میرویس اشرف د طالبانو د حکومت په لومړي کال کې د درېیو کلونو لپاره د کرکټ بورډ د عمومي مشر په توګه ټاکل شوی و.
کرکټ بورد لیکلي: د رییس الوزرا د یوه فرمان له مخې د میرویس اشرف کاري موده د یوې بلې کاري دورې (۳ نورو کلونو) هم لپاره وغځول شوه."
دغه راز په دې خبر کې ویل شوي چې د اجرایوي ریس نصیب خان کاري موده هم د درېیو نورو کلونو لپاره غځول شوې ده.
د ویلو ده چې میرویس اشرف د کرکټ بورډ یوازېنی مشر دی چې خپله لومړۍ کاري دوره یې پوره کړه او بیا ځلي په دې دندې وګومارل شو.
شولڅ د منځنۍ آسیا له هېوادونو سره د همکارۍ پراختیا د جرمني ستراتیژیک هدف وباله
![د منځنۍ آسیا د پنځو هېوادونو ولسمشرانو او د جرمني صدراعظم د غونډې یو انځور](https://d1pp940guyio69.cloudfront.net/960ba4ff-e257-41cd-bb9d-08cffb202d94_cx0_cy2_cw0_w250_r1_s.jpg)
د جرمني صدراعظم اولاف شولڅ د منځنۍ آسیا د پنځو هېوادونو ولسمشرانو ته ویلي دي چې له دوی سره د همکارۍ پراختیا د جرمني ستراتیژیک هدف دی.
شولڅ د قزاقستان، ازبکستان، قرغزستان، ترکمنستان او تاجکستان ولسمشرانو ته په هغه غونډه کې چې پرون د قزاقستان په پلازمېنه استانه کې جوړه شوې وه وویل چې له دې هېوادونو سره د جرمني اړیکي هیڅکله دومره نه وو نږدې شوي لکه اوس چې دي.
هغه زیاته کړه چې دواړه لوري د نړۍ په اوسني مبهم حالت کې نږدې ملګرتیا ته اړتیا لري.
شولڅ په منځنۍ آسیا کې د روسیې د نفوذ د کمولو لپاره د هڅو په ترڅ کې د ۲۰۲۳م کال په سپټمبر کې په برلین کې د منځنۍ آسیا له ولسمشرانو سره په لومړۍ سرمشریزه کې هم کتلي وو.
په افغانستان او نوره نړۍ کې د خپلو حقونو لپاره غږ اوچتونکې افغان مېرمنې وستایل شوې
![د افغان مېرمنو دغه ډله څو ورځې مخکې په البانیا کې سره راټولې شوې وې او نړیوالې ټولنې ته یې د مېرمنو د ستونزو د حل په موخه وړاندیزونه وکړل.](https://d1pp940guyio69.cloudfront.net/e5ce34f0-58b5-4998-9c9d-c20669fd40ab_cx0_cy0_cw99_w250_r1_s.jpg)
د افغان ښځو، نجونو او بشري حقونو په چارو کې د امریکا ځانګړې استازې رینا امیري هغه افغان مېرمنې ستایلي چې په افغانستان او نوره نړۍ کې د خپل حقونو لپاره غږ اوچتوي.
مېرمن امیري نن پر خپل ایکسپاڼه په یوه بیان کې ولیکل، داسې مهال چې طالبان د دې په ټکو، د جنسي ځورونو تګلارې ته دوام ورکوي افغان مېرمنې په هېواد کې دننه او بهر په بېلابېلو ځایونو کې راټولېږي څو وښيي چې د خپلو حقونو په دفاع کې له نړیوالو حساب کتاب غواړي.
مېرمن امیري د کومې غونډې یادونه نه ده کړې او نه یې د چا نومونه یاد کړي، خو نوموړې دا بیان وروسته له هغه ورکوي چې د افغان مېرمنو یوې ډلې پرون د اروپا د پارلمان یوې غونډې ته د افغانستان د بشري وضعیت په اړه خبرې وکړې.
د دې غونډې یوې ګډونوالې افغانې سیاستوالې شکریې بارکزۍ په خپله وینا کې له نړیوالې ټولنې وغوښتل چې د افغانستان د روان وضعیت او په ځانګړي ډول د بشري حقونو وضعیت ته ډېره پاملرنه وکړي.
د افغانستان دوه ملي لوبډلې سیالۍ لري
![د افغانستان د فوټسال ملي لوبډلې غړي](https://d1pp940guyio69.cloudfront.net/01000000-c0a8-0242-38f1-08dccb41687e_w250_r1_s.jpg)
د افغانستان دوه ملي لوبډلې نن لوبې کوي.
د افغانستان د فوټسال ملي ټیم به نن چهارشنبې د ۲۰۲۴م کال د فوټسال نړیوال جام سیالیو په لړ کې په دویمه لوبه کې له ارجنټاین سره مخامخ شي.
د ازبکستان پلازمېنه تاشکند د دغو سیالیو کوربه دی.
افغانستان په خپله لومړۍ لوبه کې انګولا ته ۶ د ۴ پر وړاندې ماتې ورکړې وه او ارجنټاین هم د اوکراین په وړاندې ۷-۱ بریا خپله کړې ده.
همدارنګه د افغانستان د کرکټ ملي لوبډله به نن له جنوبي افریقا سره د درېیو نړیوالو یو ورځنیو لوبو د لړۍ لومړی لوبه پیل کړي.
دغه لوبې د متحده عربي اماراتو د شارجې ښار د کرکټ په لوبغالي کې ترسره کېږي.
دا لومړی ځل دی چې د افغانستان او جنوبي افریقا د کرکټ ټیمونه په یوه لوبلړۍ کې سره مخامخ کېږي.
دواړو ټیمونو مخکې په مختلفو تورنمنټونو کې سیالي سره کړي چې تراوسه هېڅ یوه یې هم افغانستان نهده ګټلې.
د دواړو ټیمونو ترمنځ دویمه لوبه د سپټمبر په ۲۰مه او درېیمه یې د سپټمبر په ۲۲مه پلان شوې دي.
"پولیو فري افغانستان" د پولیو ضد واکسین پر اهمیت ټینګار وکړ
![په افغانستان کې د پولیو ضد واکسین له کمپاینه یو انځور](https://d1pp940guyio69.cloudfront.net/01000000-0a00-0242-1fa2-08db55db8c75_cx0_cy8_cw0_w250_r1_s.jpg)
پولیو فري افغانستان د ماشومانو د ګوزڼ یا پولیو ناروغۍ ضد د پولیو د واکسین پر اهمیت ټینګار وکړ.
دغه بنسټ پرون سې شنبې په خپله ایکسپاڼه کې لیکلي چې له پنځو کلونو کم عمره ماشومان د پولیو ناروغۍ له لوړ ګواښ سره ځکه مخ دي چې د هغوی د معافیت کچه ټیټه ده.
د دغه بنسټ په وینا، له همدې امله دا ډېره مهمه ده چې دغه ماشومان د پولیو په ټولو کمپاینونو او له یوه ځایه بل ته د سفر پر مهال د ټرانزیټ یا سرحدي ټیمونو له لوري واکسین شي.
پولیو فري افغانستان د کم عمره ماشومانو د پولیو ضد واکسین پر تطبیق ټینګار داسې مهال کوي چې د روغتیا نړیوال سازمان د دوشنبې په ورځ په یوه بیان کې وویل چې د طالبانو حکومت په افغانستان کې د کور په کور د پولیو د واکسین کمپاین درولی دی.
خو د طالبانو د حکومت د روغتیا وزارت ویاند شرافت زمان رسنیو ته په استولي پیغام کې ویلي چې د پولیو د واکسین د کمپاین پر وړاندې کومه ستونزه نهشته.
د روغتیا د نړیوال سازمان د شمېرو له مخې، په افغانستان کې روان کال د پولیو د مثبتو پېښو شمېر اتلسو ته رسېدلی دی.
ګوزڼ یا پولیو یوه ناعلاجه ناروغي چې ماشوم د تل لپاره فلج کوي او ان د مړینې سبب یې کېدای شي او د مخنیوي یوازېنۍ لاره یې دا ده چې له پنځو کلونو کم عمره ماشوم د پولیو پر ضد ځو ځلې واکسین شي.
د افغانانو اساسي حقونو ته د درناوي غوښتنه وشوه
![د منځنۍ آسیا د پنځو هېوادونو ولسمشرانو او د جرمني صدراعظم د غونډې یو انځور](https://d1pp940guyio69.cloudfront.net/960ba4ff-e257-41cd-bb9d-08cffb202d94_cx0_cy2_cw0_w250_r1_s.jpg)
د منځنۍ آسیا د پنځو هېوادونو ولسمشرانو او د جرمني صدراعظم د افغانستان له خلکو سره د بشري مرستو د دوام پر اړتیا ټینګار وکړ، خو یوځل بیا یې د دې هېواد د وګړو اساسي حقونو په ځانګړې توګه د نجونو او ښځو حقونو ته د درناوي غوښتنه وکړه.
په هغه ګډه اعلامیه کې چې پرون سې شنبې د قزاقستان په پلازمېنه استانا کې د قزاقستان، قرغزستان، ازبکستان، ترکمنستان، تاجکستان د ولسمشرانو او د جرمني د صدراعظم اولاف شولڅ د سرمشریزې په پای کې د جرمني حکومت پر خپله ویبپاڼه خپره کړې، دغو مشرانو د یوه امن، سولې او ثبات لرونکي او سوکاله هېواد په توګه د افغانستان د پرمختګ لپاره پر خپلو ټینګو ژمنو یوځل بیا ټینګاروکړ، داسې افغانستان چې د ټولو اتباعو په ځانګړې توګه د ښځو او نجونو او توکمیزو ډلو د بشري حقونو او اساسي آزادیو درناوي وکړي.
په ګډه اعلامیه کې همدارنګه په افغانستان کې د یوه ټولګډونه حکومت چې ټول قومونه او مذهبي او سیاسي ډلې پهکې ګډون ولري، پر اهمیت ټینګار شوی دی.
د منځنۍ آسیا زیاتو هېوادونو په افغانستان کې د طالبانو له حکومت سره ډیپلوماتیکي اړیکې ټینګې کړي، خو تراوسه یې د هغه له په رسمیت پېژندلو ډډه کړې ده.
جرمني چې له طالبانو سره مستقیم تعامل نه لري، په دې وروستیو کې یې په یوه بېساري اقدام کې ۲۸ هغه افغانان چې د جرمني د محکمو لهخوا مجرم پېژندل شوي و، بېرته افغانستان ته واستول.