د درې اړخیزو یو ورځنیو سیالیو په پایلوبه کې د بنګلهدېش تر نولس کلونو کمعمره لوبډلې د ۶ وېکټو په توپیر افغانستان ته ماتې ورکړه.
دغه سیالي چې د پنجشنبې په ورځ د کابل پر وخت ۳:۳۰ بجې د عربي متحده اماراتو په ابوظبۍ ښار کې پیل شوې، افغان لوبډلې د پچې په ګټلو سره توپ وهنه غوره کړه او د ۳۷ اورونو تر لوبولو وروسته یې د ټولو لوبغاړو په سوځېدو ۱۴۳ منډې جوړې کړې.
د افغانستان لپاره په توپوهنه کې یوازینی مخکښ توپوهونکی محمدهارون خان و چې ۶۵ منډې یې جوړې کړې.
همدارنګه وفي الله تره خېل ۲۷ او خالد تڼیوال بیا ۱۵ منډې وکړې.
د بنګلهدېش د کمعمره لوبډلې کیڼ لاسي ورو توپ اچونکي محفوظ الرحمن بیا ۶ افغان لوبغاړي وسوځول.
بنګالۍ لوبډلې ورکړل شوی هدف د ۴ وېکټو په تاوان په ۲۴م اور کې پوره کړ او د دې درې اړخیزو سیالیو جام یې وګاټه.
بنګلهدېش ته په توپوهنه کې چوهدري محمدرضوان او جیشان عالم په ترتیب سره ۴۳ او ۳۵ منډې جوړې کړې.
په پایلوبه کې د افغان توپ اچونکو له ډلې کامران هوتک ۲، بشیر احمد او خلیل احمد یوه ـ یوه وېکټ واخیسته.
بنګالی محفوظ الرحمن د دې لوبې د غوره لوبغاړي جایزه وګټله.
د افغانستان کرېکټ بورډ د معلوماتو لهمخې، په یادو سیالیو کې د افغانستان تر ۱۹کلنو د کمعمره لوبډلې لوبډلمشر نعمان شاه په ۲۴۴ منډو د یادو سیالیو د غوره توپوهونکي، بشیر احمد افغان په ۱۳ ویکټو د غوره توپ اچوونکي او محمد هارون خان په ۲۸۱ منډو ترسره کولو د یادو سیالیو د غوره لوبغاړي جایزې خپلې کړې.
کرېکټ بورډ زیاتوي: "افغان ستوري به له سریلانکا سره د دوه لوبو وروستۍ لوبلړۍ ترسره کړي. چې لومړۍ لوبه به راتلونکې شنبه او دویمه سیالۍ به راتلونکې یکشنبه د ابوظبي په ټولورینس اوول لوبغالي کې ترسره شي."
د ویلو ده چې درې اړخیزې یو ورځنۍ سیالۍ د افغانستان کرېکټ بورډ ادارې په کوربهتوب د مارچ میاشتې په ۱۸مه نېټه پیل شوې وې.