د اوکراین ولسمشر وایي، روسي ځواکونو د دغه هېواد د جګړې پر لومړیو کرښو درنو بریدونو ته دوام ورکړی دی.
ولودمیر زیلنسکي تېره شپه د جنورۍ په ۲۳مه په خپله ویډیویي وینا کې زیاته کړې، د توغندیو دغه بریدونه هر ساعت ترسره کېږي، خو په خبره یې دونباس سیمه کې د دوی جګړه او دفاع هم دوام لري.
زیلنسکي یو ځل بیا ټینګار وکړ چې دوی د روسي پوځیانو د تیت او پرک کېدو شاهدان دي او اوکراین پوهېږي چې دغه وضعیت ته څه ډول ځواب ورکړي.
نن د جنورۍ ۲۴مه، پر اوکراین د روسیې د ناموجه یرغل ټیک ۱۱ میاشتې پوره شوې.
دې موده کې زرګونه تنه ووژل شول او میلیونونه نور بې ځایه شول.