طالبان وايي، دوی په قطر کې د سولې د روانو خبرو په اجنډا کې په افغانستان کې د موقت حکومت د جوړېدو غوښتنه نه ده کړې.
په قطر کې د طالبانو د سیاسي دفتر ویاند محمدنعیم تېر ماښام په دې اړه د ازادي راډیو د پوښتنې په ځواب کې ولیکل چې د موقت حکومت د جوړېدو مسئله هېڅ مطرح شوې نه ده.
حفیظ منصور ویلي و، طالبان په مذاکراتو کې د هېواد د راتلونکي نظام پر څرنګوالي ټینګار کوي
له دې مخکې د افغانستان د دولت د مرکچي پلاوي یوه غړي حفیظ منصور ویلي و، طالبان په مذاکراتو کې د هېواد د راتلونکي نظام پر څرنګوالي ټینګار کوي چې دا د ښاغلي منصور په وینا د موقت حکومت له جوړېدو پرته بله لاره نه لري.
د ولسمشر اشرف غني په ګډون د افغان حکومت چارواکو هم د سولې د خبرو پر مهال د موقت حکومت د جوړېدو طرح په وار وار رد کړې او په ټینګار سره یې ویلي دي چې سوله به د همدې حکومت په موجودیت کې کېږي.