د افغانستان د انتخاباتو خپلواک کمېسیون وايي، که څه هم امنیتي بنسټونو ډاډ ورکړی چې د نوم لیکنې د پروسې امنیت به خوندي کوي، خو د غور حملې دوی په جدي توګه اندېښمن کړي دي.
د دغه کمېسیون یوه کمېشنر سید حفیظالله هاشمي له ازادي راډیو سره په خبرو کې امنیتي وضعیت د اندېښنې وړ بولي، خو وايي د نوم لیکنې پروسه به په بریالیتوب ترسره شي.
د انتخاباتو د خپلواک کمېسیون یو غړی سید حفیظ الله هاشمي
نوموړی زیاتوي:
"له بده مرغه تېره ورځ په غور کې پېښې موږ په جدي توګه اندېښمن کړي یو، موږ دغه مسئله د غور له سیمهییزو چارواکو، قومي سپینږیرو، د کورنیو چارو وزارت او له ملي امنیت څخه تعقیبوو چې دغه مسئله حل شي."
د سې شنبې په ورځ د غور په مرکز د فېروزکوه ښار د غلامان په سیمه کې د نوم لیکنې په یوه مرکز وسلهوالو برید وکړ او پنځه تنهیې برمته کړل.
د غور د سیمهییزو چارواکو د معلوماتو له مخې په برمته شویو کې د کمېسیون درې کار کوونکي او دوه پولیس شامل دي.
د ولسي جرګې او ولسوالیو شوراګانو د راتلونکو انتخاباتو لپاره د نوم لیکنې پروسې له پیله تر دې دمه دا لومړنی برید دی چې د نوم لیکنې په یوه مرکز کېږي.
د افغانستان د کورنیو چارو وزارت پهدې اړه له څه ویلو ډډه وکړه، خو تر دې وړاندې امنیتي مسؤلینو د نوملیکنې د پروسې د امنیت په اړه ډاډ ورکړی و.
د طالبانو ویاند ذبیحالله مجاهد ازادي راډیو ته په استولي پیغام کې د غور د پېښې په اړه بېخبري ښودلې، خو ټینګار یې کړی چې طالبان به د انتخاباتو مخه ونیسي.
د انتخاباتو د خپلواک کمېسیون د معلوماتو لهمخې په تېرو څلورو ورځو کې له ۷۶ زره څخه زیاتو کسانو نوم لیکنه کړې چې کابو ۲۰ زرهیې مېرمنې دي.
د نوم لیکنې د پروسې پر وړاندې د ناامنۍ تر څنګ د انتخاباتو په پروسې د خلکو بېباوري بله لویه ستونزه ګڼل کېږي.
د ولسي جرګې یو شمېر غړي وايي، د غور پېښې دا وښوده چې د نوم لیکنې پروسه به له جدي ننګونو سره مل وي.
د ولسي جرګې غړی عبدالستار خواصي
د ولسي جرګې غړی عبدالستار خواصي وايي:
"د ناامنۍ اغېز بېخي ډېر محسوس کېږي لکه څنګه چې په غور کې تېره ورځ د رأی ورکولو پر یوه مرکز برید وشو او کارکوونکي یې برمته شول، دا د انتخاباتو د کمېسیون د کار کوونکو لپاره لوی ګواښ دی."
په ورته وخت کې د ولسي جرګې د چهارشنبې ورځې په عمومي غونډه کې هم وکیلانو له دې کبله په کمېسیون انتقاد وکړ چې له چمتووالي پرتهیې د نوم لیکنې پروسه پیل کړه.
د وکیلانو په خبره که کمېسیون او په ټوله کې حکومت ونهکړای شي چې د نوم لیکنې پروسه په بریالیتوب پای ته ورسوي، نو په ولسواکۍ او انتخاباتو به د خلکو نسبي باور هم لهمنځه ولاړ شي.
خو د انتخاباتو خپلواک کمېسیون تل بیا ټینګار کړی چې د نوم لیکنې لپاره ټول چمتووالی نیول شوی او له پلان سره سم به دغه پروسه پر مخ ولاړه شي.
راپور: محمد حدیث پردېس