د هلیفکس په امنیتي کنفرانس کې د افغانستان ټينګار د تروریستي ډلو د پټنځایونو له منځه وړل او په ملاتړو يې د فشارونو زیاتول دي.
افغان حکومت په هېواد کې د امنیت د ټینګښت لپاره د هلیفکس کنفرانس پایلو ته تر بل هر وخت ډېر هیله مند دی.
د افغان حکومت اجرائیه ریاست وايي، په دغه کنفرانس کې د امنیتي ننګونو څخه د وتو پر حل لارو تمرکز کېږي.
د اجرائیه ریاست مرستیال ویاند جاوید فیصل د جمعې په ورځ«۱۳۹۶کال لړم۲۶» ازادي راډيو ته وویل چې په دغه کنفرانس کې چې په کاناډا کې ترسره کېږي د افغان حکومت اجرائیه رئیس عبدالله عبدالله به خپلې غوښتنې د نړۍ له استازو سره شریکې کړي.
جاوید فیصل
نوموړي زیاته کړه:
"د ښاغلي عبدالله په خبرو کې چې کوم څه موږ ته ډېر مهم دي هغه د افغانستان امنیت دی، د دې ترڅنګ د تروریستي ډلو د پټنځایونو له منځه وړل او په ملاتړو يې د فشارونو زیاتول نور مهم موضوعات دي، موږ د دغه کنفرانس له لارې غواړو نړیوالو ته ووایو چې د ترورېزم په وړاندې زموږ ګډه مبارزه هله بریالی کېدای شي د افغانستان له خاورې نه بهر د تروریستان امن پټنځایونه له منځه یوړل شي."
دا د هلیفکس ۱۹ امنیتي کنفرانس دی چې د دوو ورځو لپاره به په کاناډا روان وي او د اجرائیه ریاست د مرستیال ویاند جاوید فیصل په خبره له هغه وروسته به ښاغلی عبدالله د ملګرو ملتونو د سازمان په مجمع کې د ګډون لپاره بېرته امریکا ته ستون شي.
ښاغلي عبدالله د تېرې دوشنبې په ورځ امریکا ته سفر وکړ او د هغه هېواد له دفاع وزیر جمیز ماټيس او د ملي امنیت له سلاکار جنرال ایچ ار مک مسټر سره په کتنه کې د کابل او واشنګټن ترمنځ د مشارکت پر بنسټ په افغانستان کې د سولې د روانو هڅو او د ترورېزم پرضد د مبارزې په اړه خبرې وکړې.
عبدالله عبدالله له جېمز مټېس او مکمسټر سره پر امنیتي او دفاعي مسایلو وغږېد
Chief Executive Dr. Abdullah met with U.S National Security Advisor H. R. McMaster for discussion on mentoring, training & equipping the Afghan Forces, continued partnership to peace &prosperity and uprooting terror & extremism in the region that challenge harmony in Afghanistan. pic.twitter.com/G5ZXkzsBPo
— Dr. Abdullah (@afgexecutive) November 16, 2017
په دغو لیدنو کې يادو امریکايي چارواکو په افغانستان کې د امنیتي حالاتو په ښه والي او د افغان امنیتي ځواکونو پر لا ښه تجهیز ټینګار کړی.
خو له دې ټولو سره سره اجرائیه ریاست وايي، په دې غونډه کې به د افغانستان د امنیتي ستونزو د حل پر اړوندو موضوعاتو تمرکز وشي او اجرائیه رئیس عبدالله عبدالله به له نړیوالې ټولنې وغواړي چې په پاکستان کې د تروریستي ډلو د پټنځایونو د له منځه وړلو په برخه کې عملي ګامونه پورته کړي.
د هلیفکس امنیتي کنفرانس هر کال د نړۍ د شااوخوا درې سوه چارواکو او امنیتي کارپوهانو په ګډون په کاناډا کې جوړېږي او د جګړې د مخنیوي او د سولې پر اړوندو مسایل خبرې پکې کېږي.
د هلیفکس د تېر کال په کنفرانس کې د افغانستان اساسي غوښتنې د تروریستي ډلو په وړاندې جدي مبارزه او د پاکستان په خاورو کې د افراطي ډلو د پټنځایونو له منځه وړل و.
پاکستان هغه هېواد دی چې تل د افغان حکومت لخوا د تروریستي ډلو په ملاتړ تورن شوی خو پاکستان دغه تورونه بیا تل رد کړي دي.
په ورته وخت کې د نړیوالو اړیکو يو شمېر افغان کارپوهان د هلیفکس امنیتي کنفرانس او د ملګرو ملتونو عمومي مجمع د افغانستان لپاره يو ښه فرصت بولي چې نړیوالو ته خپلې غوښتنې ورسوي.
د دغو کارپوهانو له ډلې محمد لطیف نظري داسي وايي:
"دغه ناسته د افغانستان لپاره يو ښه فرصت دی چې د ترورېزم د ملاتړ هېوادونو په وړاندې خپل دریځ بیا جدي ونیسي، دا موقع افغانستان لري."
ښاغلی نظري وايي، په دغه کنفرانس کې اجرائیه رئیس باید نېغ په نېغه په پاکستان د فشارونو د زیاتولو غوښتنه وکړي.
نوموړی وايي، افغان حکومت د دغه کنفرانس له لارې کولای شي چې د کاناډا په ګډون يو شمېر نور هېوادونه دې ته واداره کړي چې د تروریستي ډلو د ملاتړو هېوادونو په ځانګړې توګه د پاکستان په وړاندې خپله تګلاره جدي کړي.
راپور: واصل وصال