د افغانستان دفاع وزارت ادعا کوي چې داعش ډله یې په ننګرهار کې ځپلې ده، دفاع وزارت په داسې وخت کې دا خبره کوي چې داعش د جلالاباد ښار په زړه کې د ملي راډیو تلویزیون پر ودانۍ برید وکړ.
د ننګرهار په اچین ولسوالۍ کې تېره میلادي میاشت امریکا د داعش پر سمڅو د بمونو د مور په نوم ستر بم استعمال کړ چې د راپورونو له مخې پهکې د داعش په لسګونو مشران ووژل شول، خو پرون داعش په جلالاباد کې ډله ییز برید وکړ او د خبریالانو په ګډون یې یو شمېر ملکیانو ته مرګ ژوبله واړوله.
د افغانستان دفاع وزارت وایي چې داعش د ننګرهار په نېژدې ټولو ۲۲ ولسوالیو کې ځپل شوی دی او دا توان نهلري چې د پخوا په څېر له افغان ځواکونو سره جګړو ته دوام ورکړي.
خو د دې وزارت ویاند جنرال دولت وزیري ازادي راډیو ته وویل چې داعش د دې لپاره چې خپل حضور خلکو ته ثابت کړي، د ننګرهار د ملي راډیو تلویزیون د ودانۍ په څېر پر عامه تأسیساتو حملې کوي.
وزیري: داعش ډله په ننګرهار کې ځپل شوې
نوموړی وايي:
"په افغانستان کې په عمومي صورت د داعش ملا ماته شوې ده، ډېر ټکول شوی دی، کوم مقاومت چې یې پخوا کاوه هغه اوس نهلري. اوس د دې لپاره چې دا ډله خپل حضور ثابت کړي داسې بریدونو ته یې مخه کړې ده چې پهکې عام خلک وژل کېږي، ملکیان وژل کېږي. "
په جلالاباد ښار کې د ننګرهار پر ملي راډیو تلویزیون تېره ورځ حملې تقریباً درې ساعته دوام وکړ چې پهکې د ملي راډیو تلویزیون څلور تنه کارکوونکي او دوه امنیتي سرتېري ووژل شول او ۱۷ تنه ملکیان ټپیان شول.
د افغانستان د خپلواکو ژورنالستانو د ملاتړ د ټولنې مشر رحیمالله سمندر ازادي راډیو ته څرګنده کړه چې په ټپیانو کې د دوی د معلوماتو له مخې د ننګرهار د ملي راډیو تلویزیون تر لسو ډېر کارکوونکي شامل دي.
رحیمالله سمندر وایي چې په ننګرهار کې داعش خپله راډیو لري او د دوی د راډیو کسان د ولایت ټول خبریالان پیژني چې دغو خبریالانو ته یې جدي ګواښ متوجه کړی دی.
د افغانستان د خپلواکو ژورنالستانو د ملاتړ د ټولنې مشر رحیمالله سمندر
دی وايي:
"موږ تېرو وختونو کې پردې موضوعاتو د ننګرهار له چارواکو سره بیا-بیا جدي خبرې کړې وې، متأسفانه د افغانستان حکومت په تېره د ننګرهار ادارې او امنیتي ځواکونو دې ته توجه ونهکړه. موږ دوی ته وویل چې ننګرهار تر ټولو سیمو د خبریالانو د کار او فعالیت لپاره ناامنه سیمه ده ځکه چې هلته پرلهپسې خبریالانو ته ګواښونه کیدل، یو شمېر خبریالان کابل ته راغلي، یو شمېر نور یې مستقیماً تهدیدیږي، هلته داعش فعاله راډیو لري او کوم کسان چې د داعش په راډیو کې کار کوي هغوی د ننګرهار هر خبریال بېل-بېل پېژني، نو دغسې محیط کې رسنیو ته کار کول ډېر ستونزمن دي. "
تېرمیلادي کال په افغانستان کې د خبریالانو لپاره تر نورو کلونو خونړۍ و او پهکې ۱۳ خبریالان ووژل شول.
د ژرونالیستانو د ټولنو په وینا د دغو خبریالانو د قتل په لږ تر لږه لسو پېښو کې طالبانو لاس درلود.
روان میلادي کال تراوسه شپږ خبریالان وژل شوي دي او شاوخوا ۳۵ ځله پر خبریالانو بریدونه شوي دي.