د استرالیا حکومت یو نوی قانون اعلان کړی چې له مخې يې د روان کال له ډیسمبر وروسته له ۱۶ کلونو کم عمره ماشومان نشي کولی په یوټیوب کې اکونټ ولري.

په استرالیا کې د قانون له مخې ماشومان د فیسبوک، اینستاګرام او ټیک ټاک اکونټونو د جوړولو اجازه نه لري.

یوټیوب مخکې له دې قانونه مستثنا وو.
د دغه قانون موخه له ټولنیز او رواني فشارونو د ماشومانو ساتنه ده.

د استرالیا حکومت وايي، له دې قانونه د سرغړونې په صورت کې شرکتونه ۵۰میلیونه استرالیايي ډالره جریمه کیږي.

یوټیوب دغه قانون ته په غبرګون کې ویلي، دا پلټفارم یوازې د ویډیوګانو د شریکول لپاره دی.

د اسوشیټدپرس خبري اژانس د راپور له مخې، ماشومان کولی شي د یوټیوب ویډیوګانو ته لاسرسی ولري خو خپله په کې اکونټ جوړولی نشي.

انلان لوبې، پیغامونه، تعلیمي او د روغتیا اړونده موارد له دې قانونه مستثنا دي، ځکه ماشومانو ته کم زیان رسوي.

د ملګرو ملتونو متخصصان وايي، د داعش خراسان څانګه، چې مرکز یې په افغانستان کې دی، د پیغام رسونې د خوندي اپلېکېشنونو او ټولنیزو رسنیو له لارې خلک افراطي کوي او دا مهال امریکا او اروپا ته تر ټولو ستر ګواښ بلل کېږي.

د ملګرو ملتونو کارپوهانو دغه راپور پرون چهارشنبې د ملګرو ملتونو امنیت شورا ته وړاندې کړ.

په راپور کې همداراز ویل شوي چې د بهرنیو ترهګرو د بیرته ستنېدو په اړه اندېښنه مخ پر زیاتېدو ده، ځکه چې دوی ښایي منځنۍ آسیا او افغانستان ته د بېرته راتګ له لارې د سیمې امنیت ګډوډ کړي.

کارپوهانو په راپور کې دا هم څرګنده کړې، چې په القاعده پورې اړوندې ډلې، په ځانګړې توګه الشباب په افریقا کې د خپل فعالیت ساحې پراخې کړې دي.

یوه ورځ وروسته له هغه چې د لبنان حزب‌الله عمومي منشي ټینګار وکړ چې دا ډله به خپلې وسلې پر مځکه کښېنږدي، د لبنان ولسمشر اعلان وکړ چې هېواد یې پریکړه کړې څو حزب‌الله او نور سیاسي او ملېشه ډلې بې‌وسلې کړي.

د لبنان د رسنیو د راپور له مخې، جوزف عون نن (د پنجشنبې) په بیروت کې وویل چې وسلې باید یوازې د لبنان د دولت په واک کې وي، څو وکولای شي خپل حاکمیت په ټوله خاوره کې پلی کړي.

جنرال عون، چې تر یوې مودې مخکې د لبنان د پوځ قوماندان و، زیاته کړه چې ټولې هغه وسلې چې له دولته دباندې د حزب الله په شان د وسله‌والو ډلو په لاس کې دي، باید راټولې شي.

ده له حزب‌الله، او له نورو ډلو وغوښتل چې د «وسلې د انحصار د اصل، چې یوازې د پوځ په واک کې وي» ملاتړ وکړي، او دې غوښتنې ته په پوره مسوولیت ځواب ووايي، ځکه چې: «دا یوه برخلیک ټاکونکې مرحله ده، چې په کې نور تحرکات نه شي زغمل کېدای.»

د عون په وینا، ټول سیاسي ځواکونه او ډلې باید له دې فرصت څخه استفاده وکړي، څو د پوځ د وسلو انحصار ملاتړ وکړي.

د امریکا ولسمشر د چهارشنبې په ورځ، )د زمري په ۸مه( اعلان وکړ چې له هند څخه پر واردېدونکو توکو به ۲۵ سلنه ګمرکي تعرفه ولګوي، او پر دغه هېواد به یوه بله نامعلومه جریمه هم تطبیق کړي، چې علت‌ یې له روسیې د وسلو او تېلو پېرل دي.

دغه اقدامات به د اګست له لومړۍ نېټې (د زمري له ۱۰مې) عملي شي.

ډونالډ ټرمپ همداراز یو اجرايي فرمان لاسلیک کړ، چې له مخې یې پر ټولو نیمه‌پروسس شویو مسي محصولاتو او د مسو پر مشتقونو ۵۰ سلنه تعرفه وضع شوه، چې له نننۍ پنجشنبې څخه به پلې شي.

د ټرمپ دا پرېکړه ښایي د دواړو هېوادونو ترمنځ د وروستیو څو میاشتنیو خبرو د ځنډېدو سبب شي، او له دې سره به واشنګټن خپل ستراتیژیک شریک او د چین پر وړاندې مهم انډول رامنځته کوونکی ځواک له لاسه ورکړي.

د امریکا ولسمشر په خپله ټولنیزه شبکه ټروت سوشیال کې لیکلي:

«که څه هم هند زموږ دوست دی، خو موږ له هغوی سره له کلونو راهیسې نسبتاً محدود تجارت درلود، ځکه د دوی تعرفې ډېرې لوړې دي – تر ټولو لوړې تعرفې په نړۍ کې – او تر ټولو سخت او له توهینه ډک غیرمالي سوداګریز خنډونه لري.»

ښاغلي ټرمپ زیاته کړې:

«هغوی تل د خپلو پوځي تجهیزاتو ډېره برخه له روسیې اخیستې، او د چین ترڅنګ، د روسیې د انرژۍ تر ټولو ستر پېرودونکي دي، هغه هم په داسې وخت کې چې ټول غواړي روسیه دې له اوکراین سره جګړه ودروي؛ دا ښه خبره نه ده!»

د هند حکومت په غبرګون کې ویلي، چې د ټرمپ د پرېکړې پایلې ارزوي، او همداراز له امریکا سره د یوه عادلانه سوداګریز توافق لپاره ژمن دی.

د هند په رسمي اعلامیه کې راغلي:

«هند او متحده ایالاتو په تېرو میاشتو کې د یوه منصفانه، متوازنه او د دواړو لورو لپاره ګټور دوه‌اړخیز سوداګریز تړون په اړه خبرې کړې دي. موږ لا هم دې هدف ته ژمن یو.»

د ایران د بهرنیو چارو وزیر عباس عراقچي وایي، د تهران او واشنګټن د اټومي خبرو د بیا پيل لپاره هیڅ کومه ځانګړې برنامه نه ده تنظیم شوې.

عراقچي پرون سه شنبه ( د زمري ۷مه) د اسراییل-ایران د ۱۲ ورځنۍ جګړې د قربانیانو د یاد غونډې په څنډه کې دا خبره وکړه.

د ایران او متحده ایالتونو مرکچیانو سږ کال یوه اټومي تړون ته د رسیدو په هدف پنځه پړاوه خبرې وکړې او شپږم پړاو یې چې مسقط کې پلان شوی و، پر ایران د اسراییل له بریدونو وروسته لغو شو.

د ایران او اسراییل د بریدونو پر دوام د متحده ایالتونو ځانګړو جنګي الوتکو د ایران درې اټومي تاسیسات فوردو، نطنز او اصفهان په نښه کړل چې د چارواکو په خبره ( په بشپړ ډول) له منځه ولاړل.

د روسیې په ختیځ کې کامچاتکا ټاپوزمه نن چهارشنبه ( د زمري ۸مه) د ریښتر په کچه ۸ اعشاریه ۷ درجې زورورې زلزلې ولړزوله.

د دغې زلزلې له کبله د روسیې په لرې ختیځ کې سونامامي یو ښارګوټی ځپلی او د جاپان او متحده ایالتونو په ساحلي سیمو کې هم د سونامي خبرداری ورکړل شوی او له خلکو د تخلیې غوښتنه شوې.

اسوشیتد پریس خبري اژانس ویلي چې زلزله کې څو تنه ټپيان شوي او ګڼ شمیر خلک تخلیه شوي دي.

تر زلزلې وروسته نور ټکانونه هم احساس شوي دي.

پر اوکراین د روسیې د تیرې شپې په توغندیز او بې پيلوټه الوتکو برید کې لږ تر لږه ۲۰ تنه وژل شوي او لسګونه نور ټپيان شوي دي.

دا بریدونه څو ساعته وروسته تر هغه وشول چې د امریکا ولسمشر ډونالډ ټرمپ وویل، د روسیې ولسمشر ولادمیر پوتین لس- دولس ورځې وخت لري چې دا جګړه و دروي.

ټرمپ دوه اونۍ مخکې پوتین ته پنځوس ورځې مهلت ورکړی و، خو اوس یې دا مهلت نژدې سم نیمایي را کم کړ.

هغه ویلي، که پوتین له اوکراین سره سوله ونه کړي، پر روسیې به پراخ بندیزونه ولګوي.

کریملین تراوسه د ډونالډ ټرمپ له خوا دوی ته په نوي ضرب الاجل تبصره نه ده کړې.

د غزې د روغتیا وزارت وایي، پر دغې تړانګې د اسراییل د بریدونو له پيله تراوسه څه باندې ۶۰ زره فلسطینیان وژل شوي دي.

د اسوشیتید پریس خبري اژانس د راپور له مخې وزارت دغه شمیرې نن سه شنبه ( د زمري ۷مه) اعلان کړي، خو دا یې نه دي ویلي چې څه شمیر یې پوځیان او څومره یې ملکیان دي.
خبر کې راغلي چې د وژل شویو شاوخوا نیمایي برخه ښځې او ماشومان دي.

دا په داسې حال کې ده چې غزه کې د لوږې کچې د لوړېدو په اړه د ملګرو ملتونو له خبرداریو وروسته دغې تړانګې ته ځمکنۍ او هوایي مرستې رسیدلي دی.

د هند د کورنیو چارو وزیر امیت شا نن ( سه شنبه د اسد ۷مه) ویلي، هغه درې " ترهګر" یې وژلي چې په تیره اپریل میاشت کې یې په جمو او کشمیر کې پر سیلانیانو برید کړی و.

هغه برید کې ۲۶ تنه ووژل شول چې وروسته یې د هند او پاکستان ترمنځ څلور ورځنۍ پوځي شخړې ته هم زمینه برابره کړه.

هغه مهال هندي چارواکو بریدګر پاکستاني اتباع بللي وو چې په وینا یې د اسلام اباد په ملاتړ یې د کشمیر پهلګام سیمه کې دا خونړی برید کړی دی.

پاکستاني اسلامپاله ډلو په دغه برید کې لاس لرل رد کړل.

دا له ۲۰۰۸ کال راهیسې پر ملکیانو تر ټولو خونړی برید بلل شوی دی.

د ملګروملتو د بشري حقونو لوی کمېشنر فولکر ترک پرون (دوشنبې) په یوه بیان کې وویل چې په ایران کې د اعدامونو پر زیاتېدو اندېښمن دی او له دې هیواده غواړي چې د اعدام سزاوې سمدستي بس کړي.

په اعلامیه کې راغلي: «دا چې تر دې دمه په روان کال کې په ایران کې د اعدام سلګونه حکمونه اجرا شوي دي، ښيي چې وضعیت څومره اندېښمنوونکی دی.»

هغه په دوام کې په ایران کې د اعدام د سزا د «فوري درولو» پر ضرورت ټینګار وکړ.

د ملګرو ملتونو د بشري حقونو د دفتر له راټولو شویو معلوماتو سره سم، د روان ۲۰۲۵ کال په لومړیو شپږو میاشتو کې په ایران کې لږ تر لږه ۶۱۲ کسان اعدام شوي دي.

په دې بیان کې چې د ملګرو ملتونو د بشري حقونو لوی کمېشنر خپور کړی، راغلي چې دا شمېر د ۲۰۲۴ کال په همدې موده کې د اعدامونو د شمیرې دوه برابره زیات دی.