اټکل کیږي چې شاوخوا ۱۴۶۰۰ افغانان او ۷۹۰۰ کامرونیان به د دې پرېکړې په سبب د ایستل کېدو له خطر سره مخ وي.
د لنډمهاله محافظتي استوګنې حیثیت د هغو هیوادونو اتباعو ته ورکول کیږي چې طبیعي پیښې، جګړې او نورې استثنایي پیښې یې لیدلي وي.
د کورني امنیت وزارت ویاندې ټریشیا مکلالین د جمعې په ورځ په یوه بیان کې وویل وزارت یې دې پایلې ته رسیدلی چې په افغانستان او کامرون کې شرایط نور د دې معیارونو سره سمون نه لري.
په همدې اساس به د مې له میاشتې څخه، یعنې ۱۸ ورځې وروسته، د هغو افغان او کامروني اتباعو د لنډمهاله محافظتي استوګنې اسناد چې په متحده ایالاتو کې ژوند کوي نور د اعتبار وړ نه وي.
وروسته له هغه چې طالبانو د ۲۰۲۱ کال په اګست کې د افغانستان کنټرول په لاس کې واخیست، د امریکا حکومت له ۸۲۰۰۰ څخه ډیر افغانان له افغانستان بهر انتقال کړل.
له دې ډلې له اویا زرو څخه ډیر خلک د «پَرول» په نوم د یوه پروګرام په چوکاټ کې له لنډمهالې استوګنې سره امریکا ته داخل شول.
رویټرز د کډوالو د حقونو د فعالانو له قوله ویلي چې په وروستیو ورځو کې د افغانانو په شمول یو شمېر کډوالو پیغامونه ترلاسه کړي چې د د استوګنې لنډمهاله اسناد یې لغوه شوي او دوی ته له امریکا څخه د وتلو لپاره اوه ورځې وخت ورکړل شوی دی.
د کورني امنیت وزارت ویاندې ټریشیا مکلالین تیره اوونۍ تایید کړه چې د یو شمیر پناه غوښتونکو د دوه کلن استوګنې جوازونه لغوه شوي دي.
د امریکا ولسمشر ډونالډ ټرمپ، چې په جنوري کې بیا واک ته ورسېد، ژمنه کړې چې غیرقانوني کډوال به وباسي.
هغه د پخواني ولسمشر جو بایډن د کډوالۍ پر پالیسۍ نیوکه کړې او ویلي یې دي چې د بایډن ادارې د غیرقانوني اقداماتو څخه کار اخیستی ترڅو مهاجرینو ته اجازه ورکړي چې په قانوني توګه په هیواد کې پاتې شي.
ټرمپ د خپلې لومړۍ دورې په جریان کې د ۲۰۱۷ او ۲۰۲۱ کلونو ترمنځ د کډوالو د "موقتي محافظتي استوګنې" اسنادو د لغوه کولو هڅه هم وکړه، خو ناکام شو ځکه چې فدرالي محکمو یې مخالفت وکړ.
