په کراچۍ کې افغان کډول نواز وايي:
«دا پیغام ما نن سهار لس بجې ترلاسه کړ، وضعیت خراب دی، پولیس نه د پياو ار کارت ته ګوري، نه د ایسيسي کارت ته.»افغان کډوال
په دغه پیغام کې، چې ده ازادي راډیو سره شریک کړی، ویل شوي چې کراچۍ ښار کې د مېشتو افغان کډوالو پر ضد د روان میلادي کال د اپرېل په درېیمه نېټه عملیات پیل شوي دي.
په پیغام کې له خلکو غوښتنه شوې که چیرې افغان کډوال وویني، د پولیسو او رینجر ځواکونو د مرستې شمېرې ته دې زنګ ووهي او معلومات دې ورکړي، او ټینګار شوی چې د راپور ورکوونکي هویت به پټ پاتې شي.
نواز په دې اړه ازادي راديو سره خبرو کې وویل:
«اوس په کراچۍ کې وضعیت ډېر خراب دی، نه د ایسيسي کارت ته ګوري، نه د پياو ار کارت ته، راځي خلک نیسي، ان د پياوار کارت لرونکي یې هم نیولي، ترې پیسې اخلي، وهېډبوي یې.»
که څه هم د پاکستان حکومت کومې رسمي ادارې تر اوسه دا خبر تاید یا رد کړی نه دی خو افغان کډوال وايي، د دوی اندېښنې یې زیاتې کړې دي.
یوه بل افغان کډوال چې نه غواړي نوم یې خپور شي ازادي راديو ته وویل:
«دلته ټولو خلکو ته ویل شوي که کوم افغان وګورئ، نو مونږ ته خبر راکړئ. موږ ډېر په اندېښنه کې یو چې اوس به څه کېږي، بېرته افغانستان ته هم نه شو تللی.»
د کډوالو لپاره د ګډ اقدام کاري کمېټې هم د پنجشنبې په ورځ (د اپریل په دریمه) په خپله ایکس پاڼه دغو پیغامونو ته په اشارې سره ویلي دا د هر هغه چا پر وړاندې بشپړ تبعیض دی چې "د افغان په څېر ښکاري"
د پاکستان حکومت په جنوري کې اعلان کړی و، چې د (اې سي سي) یا افغان تابعیت کارت لرونکي کډوال باید د مارچ تر ۳۱ پورې له دغه هېواده په خپله خوښه ووځي، که نه نو له ټاکلې نېټې ورسته به د دوی په وړاندې له زور کار واخیستل شي.
د اپرېل له لومړۍ نېټې راهیسې، پاکستان د افغان کډوالو د نیولو او ایستلو لړۍ چټکه کړې، او لسګونه افغان کډوال، چې په اسلاماباد او راولپنډۍ کې نیول شوي وو، د تورخم له لارې افغانستان ته ستانه کړل شوي دي.
تورخم کې د کډوالۍ د برخې ځنيو مسولینو پاکستاني خبریالانو ته ویلي چې دغه کسانو د (ایې سي سي) په نوم کډوالۍ کارتونه درلودل او بې اسناده کډوال هم په کې وو.
د کډوالو په چارو کې د ملګرو ملتونو عالي کمېشنرۍ (یو این ایچ سي ار) د اټکل له مخې، ۱.۵ میلیونه افغان کډوال په پاکستان کې ژوند کوي، چې له دې شمېرې شاوخوا ۸ لکه ایې سي سي کارتونه لري.
