په پاکستان کې ډېری افغان کډوال، په ځانګړي ډول د (اې سي سي) یا افغان تابعیت کارت لرونکي وايي،له دې هېواده د دوی د ایستلو د بهیر له پیل سره سم، اړ شوي چې خپلې شتمنۍ لیلام او په نیمه بیه وپلوري.
رحمت الله چې د (اې سي سي) یا افغان تابعیت کارت لري، د پاکستان په پلازمېنه اسلام اباد کې اوسېږي.
دی وایي، له دې هیواده د بې اسنادو افغان کډوالو او د ( اې سي سي) یا افغان تابعیت کارت لرونکو د ایستلو بهیر په پیلېدو سره، اړ دي چې د خپل کورنو وسایل، شتمنۍ، کار او سوداګري لیلام کړي.
د یو نیم لک مال مو په ۴۰ تر ۵۰ زرو کلدارو غواړي، څوک څه نه پېريپاکستان کې افغان کډوال
نوموړي چې له ۴۰ زیاتو کلونو راهیسې پاکستان کې اوسېږي او اوس د شړل کېدو له ګواښ سره مخ دی، ازادي راډیو ته یې وویل"د یو نیم لک مال مو په ۴۰ تر ۵۰ زرو کلدارو غواړي، څوک څه نه پېري، وایي که یې راکوئ خو ښه که نه نو که ولاړ شي همدلته به پاتې وي، ما خپله له مجبوریته یو غوا چې په ۱۲۰ زره کلدارو مې پېرلې وه په ۶۵ زره کلدارو مې وپلورله، له دې نه چې پاتې وه ښه دی، لال اقل د موټر کرایه مو پرې کېږي، مونږ ته دې تر لوی اختره وخت راکړي چې موږ خپل کورونه او څاروي په سمه بیه وپلورو."
د دغو افغانانو له ډلې یو شمېر یې چې په تیرو څو لسیزو کې په پاکستان کې یې واړه او لوی کاروبارونه پیل کړي دي وايي، دو کانونه تړل شوي او هېڅ څوک یې توکي په مناسبه بیه نه اخلي.
عبدالله چې په اسلام اباد کې د موبل او فرنیچرو کارو بار کوي ازادي راډیو ته وویل"تاوان کې یو، زموږ کار اوبار او سوداګري بنده شوې ده، دوکان ته تللی نه شو، یو نیم کروړه پانګونه مو په فرنیچرو کې بنده پاتې ده، اوس یې څوک په درې لکو هم نه پېري، چا سره پیسې هم نشته او که چا ته یې په پور هم ورکوو وایي چې تردوه درې میاشتو وروسته یې پیسې درکوو، دلته موږ سره وخت نشته، بلخوا د خلکو پیسې هم موږ سره دي، نو ډېر اندېښمن یو."
دوی وایي که افغانستان ته وشړل شي، د کاراوبار د بیا پیل لپاره پیسې نه لري.
تاوان کې یو، زموږ کار اوبار او سوداګري بنده شوې ده، دوکان ته تللی نه شوپاکستان کې افغان دوکاندار
د ملګرو ملتونو د کډوالو د عالي کمیشنرۍ (یو ان اچ سي ار) د اټکل له مخې، په پاکستان کې ۱.۵ میلیونه افغان کډوال ژوند کوي، چې له دې ډلې شاوخوا ۸۰۰ زره یې د افغان تابعیت(اې سي سي) کارتونه لري.
په دې وروستیو کې یو شمېر افغان کډوال، سره له دې چې قانوني ویزې یې درلودې، ونیول شول، وشړل شول او په دې هیواد کې د خپلو کورونو اوسوداګرۍ پریښودو ته اړ شول.
د پاکستان حکومت د روان کال په جنوري میاشت کې اعلان وکړ چې دا کډوال باید د مارچ تر ۳۱مې پورې له دغه هېواده ووځي، که نه نو په خبره یې، د اپریل په لومړۍ نیټه به د دوی پر وړاندې له زور کار واخیستل شي.
پاکستان د اپریل له لومړۍ نیټې راهیسې، د افغان کډوالو د نیولو او شړلو پروسه شدیده کړې او لسګونه افغان کډوال یې چې په اسلام اباد او راولپنډۍ کې نیول شوي وو د تورخم له لارې افغانستان ته شړلي دي.
په تورخم کې د کډوالو چارو ځینو چارواکو پاکستاني خبریالانو ته ویلي چې په دې کډوالو کې د (اي سي سي) په نوم د کډوالۍ کارت لرونکي او بې اسناده کډوال شامل وو.
پاکستان د ۲۰۲۳ کال د نومبر له میاشتې راهیسې د بې اسنادو افغان کډوالو د ایستلو بهیر پیل کړی دی.
د ملګرو ملتونو د کډوالو عالي کمیشنرۍ (یو ان اچ سي ار) په خبره، تر اوسه له پاکستانه له ۵۲۰ زرو زیات افغانان ایستل شوي دي.