د اروپایي ټولنې دوه پیاوړو اقتصادي هېوادونو، جرمني او فرانسې د امریکا له خوا د تعرفې لوړولو ته غبرګون ښودلی او د متقابل اقدام ګواښ یې کړی دی.
د جرمني صدر اعظم اولاف شولتز نن پنجشنه " د وري ۱۴مه" وویل، اروپایي ټولنه چمتو ده چې جدي، پياوړی او مناسب ځواب ورکړي خو زیاته یې کړه چې اروپا په دې اړه له متحدو ایالتونو سره خبرو ته هم چمتو ده.
ښاغلي شولتز په برلین کې خبریالانو ته وویل " اړینه ده چې اروپایي ټولنه په یووالي سره غبرګون وښيي او واضح کړي چې غبرګون به یې څه وي. اروپایي ټولنه په نړۍ کې تر ټولو لوی واحد بازار دی، همدې ته کتو مونږ کولای شو چې په یووالي او پياوړې ارادې سره د امریکا ځواب ورکړو او وښيو چې د متقابل عمل لپاره امکانات لرو."
د فرانسې د حکومت ویاندې سوفیا پریماس هم نن وویل، دغه هېواد " پر انلاین خدمتونو برید سره" د امریکا تازه لګول شویو تعرفو ته ځواب وایي.
د میرمن پریماس په خبره اروپایي ټولنه د خپل غبرګون پر څرنګوالي بحث کوي.
د اروپایي ټولنې مشره اورسلا فان در لین هم وایي چې د امریکا له خوا د نورو تعرفو وضع کېدل " د نړۍ اقتصاد ته یوه لویه ضربه" ده.
د امریکا ولسمشر ډونالډ ټرمپ د چهارشنبې په ورځ د نړۍ په نژدې ټولو هېوادونو تعرفې وضع کړې.
د دې نوملړ له مخې، که اروپایي ټولنه له دې وروسته امریکا ته خپل تولیدي توکي صادروي، نو شل سلنه تعرفه یا ګمري محصول به ورکوي.
د امریکا ولسمشر ډونالډ ټرمپ په سپینه ماڼۍ کې وویل، دغه تعرفې به د امریکا اقتصاد وغوړوي او امریکا او نورو هېوادونو ترمنځ به عادلانه سوداګرۍ ته زمینه برابره کړي." نن د ازادۍ ورځ ده، چې له ډيره وخته ورته په تمه و. د اپریل دویمه نیټه به تل د هغې ورځې په توګه یادیږي چې د امریکا صنعت په کې له سره سا اخلي. دا به داسې ورځ وي چې زمونږ برخه لیک زمونږ خپل لاس ته په کې راځي، دا به داسې ورځ وي چې د امریکا د بیا بډایه کېدو کار مو په کې پيل کړ".
د ډونالډ ټرمپ له خوا دغه اعلان په ټوله نړۍ کې د ونډو بازارونه هم اغیزمن کړي دي.
د پنجشنبې په ورځ د یورو په وړاندې د ډالرو بیه هم نژدې دوه په سلو کې ولوېده.
