د سوریې چارواکي وايي، چې د اسراییلو په برید کې ۱۴ کسان وژل شوي او تر ۴۰ زیات نور ټپیان دي.
د سوریې دولتي خبري اژانس سانا ویلي، اسراییلو د سوریې د حما ولایت مصیاف ښار په څنډو کې پرون هوایي بریدونه کړي.
د بریدونو له امله یوه لار تخريب شوې او ګڼو کسانو ته مرګژوبله رسېدلې ده.
د یوه روغتون مشر فیصل حیدر ویلي، د ۱۴ کسانو مړي ور وړل شوي او ۴۳ نور ژوبل دي.
د سوریې دولتي اژانس یکشنبه لومړی ویلي وو، ځینې پوځي اهداف ویشتل شوي.
هممهاله رویټرز ویلي، پهدې بریدونو کې د کیمیاوي وسلو د څېړنې یو مرکز چې ایراني کارپوهان پهکې په کار بوخت وو هدف ګرځېدلی.
ایراني چارواکو دوشنبه دا ادعا رد کړې.
په لندن کې مېشت د سوریې د بشري حقونو څارونکې ډلې ویلي، په وژل شویو کې لږ تر لږه څلور ملکیان شامل دي.
دې ډلې ویلي، لږ تر لږه څلور هوايي بریدونه د مصیاف ښار په څنډو کې شوي، چې ځینو سیمو کې یې له امله اور هم لګېدلی.
اسراییل په وروستیو کلونو کې د سوریې دننه بریدونه کوي او اکثر د سوریې پوځیان یا د ایران ملاتړي ګروپونه په نښه کوي، خو ډېر کم د خپلو دغو بریدونو یا عملیاتو په اړه خبرې کوي.
مصیاف باندې مخکې کلونو کې هم اسراییلو ځینې بریدونه کړي.
تېر کال د اسراییلو یوې څېړندوی ډلې ویلي وو، چې ایران د سوریې د پوځي صنایعو د کنټرول په لټه کې دی.
د غزې د جګړې له پیل راهیسې، په سوریه کې پر ځینو سیمو باندې اسراییلو ته منسوب بریدونه زیات شوي او هغه سیمې چې ویل کېږي د ایران او یا د سوریې د هوایي مدافعې سره تړلې ملېشې پهکې دي، څو ځلې په نښه شوي دي.
تېره میاشت سپاه پاسداران اعلان وکړ، چې د دغه پوځي سازمان د هوايي ځواک یو افسر احمدرضا افشاري په سوریه کې د یوه هوايي برید له کبله ژوبل او بیا یې وروسته ساه ورکړه.
سږ کال بیا د اپرېل په لومړیو کې په دمشق کې د ایران په کونسلګرۍ په برید سره چې، پړه یې پر اسراییل اچول شوې څو ایراني پوځیان له هغې ډلې د ایران د سپاه پاسداران ځواکونو یو جګپوړی قومندان محمد رضا زاهدي ووژل شول.
د دغه برید په ځواب کې ایران د اپریل په ۱۳مه نیمه شپه پر اسرايیلو د بېپیلوټه الوتکو او توغندیو بریدونه وکړل.
