د امریکا ولسمشر جو بایډن د ټولو هېوادونو او خلکو لپاره ډموکراسي اساسي مساله وبلله او ویې ویل چې دا ښکارنده/پدیده په ځینو ځایونو کې له ننګونو سره مخ ده.
جو بایډن د امریکا د هغو یو میلیون پوځیانو د یادښت په ورځ چې په پوځ کې د خدمت پر مهال وژل شوي وویل، د ډموکراسي لمن تر حکومت ور پراخه ده او د خلکو وړتیا او توان نندارې ته وړاندې کوي.
بایډن وویل: "همدردي/خواخوږي د ډموکراسي ځواک دی. زموږ لېوالتیا باید دې ته وي چې یو بل د دښمن په سترګه نه بلکې د یوه ګاونډ په توګه وګورو. کله چې سره موافق نه یو پوه شو چې په بل څه تېریږي."
بایډن دا وینا د ارلینګتنون ملي هدیرې کې وکړه چې په ویرجینیا کې ده.
هغه چین او روسیې ته په اشارې هم وویل چې د دغو دوو هېوادونو زورواکي د امریکا له لویو ننګونو دي.
هغه همدا راز د بیان د ازادۍ په لا غښتلتیا، د اقتصادي اصلاحاتو په دوام او د توکمیزو مخالفتونو په ختمېدو ټینګار وکړ.
بایډن که څه هم د کوم مشخص هېواد نوم وانه خېست خو ویې ویل چې د امریکا ډموکراسي یې د ځینو زورواکو هېوادونو له خوا له خطر سره مخ ده.
د ډموکراسي ښکارنده/پدیده په ځینو ځایونو کې له ننګونو سره مخ ده.
د ارلینګنتون په ملي هدیره کې ګڼ خاورو ته سپارل شوي کسان د دویمې نړیوالې جګړې پر مهال وژل شوي پوځیان دي چې هرکال یې له نورو وژل شوېو سره په ګډه د درناوي په پار نمانځغونډه کېږي.
ولسمشر جوبایډن د خپلې وینا په یوه برخه کې په افغانستان او عراق کې د وژل شوېو امریکایي ځواکونو یادونه هم وکړه.
هغه وویل، ټول ټال ۷۰۳۶ امریکایي پوځیان په دغو دوو هېوادونو کې وژل شوي.
بایډن زیاته کړه، دغو پوځیانو د ډموکراسۍ په شعار ژوند وکړ او په همدې شعار یې ځانونه د خپل هېواد لپاره قرباني کړل.
