د روسیې ولسمشر ولادمیر پوتین پرون دوشنبې (د وري ۱۶مه) د انتخاباتو هغه نوی لانجمن قانون توشیح کړ چې په قدرت کې د ده پاتېدو ته تر۲۰۳۶ کاله پورې لاره پرانېزي.
د دغه قانون له مخې چې تېر کال په ټولپوښتنه کې یې ملاتړ وشو او پارلمان هم تایید کړی، پوتین کولای شي چې د دوو نورو دورو لپاره په ۲۰۲۴ او ۲۰۳۰ کلونو کې د جمهوري ریاست په انتخاباتو کې ودریږي.
د مخکیني قانون له مخې یوه ولسمشر پرله پسې له دوو دورو زیات نه شوای کولای چې د ولسمشرۍ لپاره ځان کاندید کړي.
۶۸ کلن پوتین له ۱۹۹۹ کال راهیسې د ولسمشر او د یوې کمې مودې لپاره د صدراعظم په توګه په قدرت کې دی.
نوموړي د ولسمشرۍ د دوو دورو له ترسره کولو وروسته په ۲۰۰۸ میلادي کال ځان د صدراعظمې لپاره غوره کړ او په ۲۰۱۲ کال یې بېرته د جمهوري ریاست واګې په لاس کې واخېستې.
د انتخاباتو په قانون کې د نوي تعدیل په اړه د تېرکال ټولپوښتنه کې د روسیې د انتخاباتو د مرکزي کمېسیون په وینا نژدې اتیا په سلو کې ګډونوالو یې د هغه ملاتړ کړی و، خو د یوې نظر شمېرنې له مخې چې د لوادا په نوم یوې خپلواکې ټولنې په دې وروستیو کې ترسره کړې، په سلو کې ۴۱ روسان نه غواړي چې پوتین دې د ولسمشرۍ د اوسنۍ دورې وروسته چې په ۲۰۲۴ کال پای ته رسیږي، په قدرت کې پاتې شي.
د راپورونو له مخې د پوتین محبوبیت په دې وروستیو کې د ځینو اقداماتو په خاطر کم شوی دی.
د لویدیځو رسنیو د راپورونو له مخې د کرملین د سرسخت منتقد الکسي ناوالنۍ نیول کېدو چې په روسیه کې یې پراخو مظاهرو ته لاره هواره کړه، هم د دې سبب شوې چې د پوتین محبوبیت کم شي.
د روسیې پولیسو په لسګونو مظاهره چیان نیولي چې د بشري حقونو د ملاتړو ډلو او د لویدیځو حکومتونو سخت انتقادونه یې را پارولې دي.
پوتین ویلي چې تر اوسه یې په دې اړه چې ایا غواړي د ۲۰۲۴ کال د جمهوري ریاست په انتخاباتو کې بیا ځان کاندید کړي، نهایي پریکړه نه ده کړې، خو انتقاد کوونکي وایي چې نوموړی به بیا هم په دغو انتخاباتو کې ودریږي.
