نړۍ
امریکا د کرونا ویروس ضد واکسین پروګرام چټکوي
امریکا د کرونا ویروس د واکسین پروسه چټکوي ځکه چارواکو د کرونا له لاسه په یوه ورځ د نږدې څلور نیمو زرو کسانو د مړینې خبر ورکړی.
پخوا کله هم دومره ډېر کسان په یوه ورځ نه و مړه شوي.
د امریکا د نویو اقداماتو له مخې ټول هغه کسان چې متحده ایالتونو ته سفر کوي باید د کرونا ویروس د منفي معاینې سند وړاندې کړي.
سربېره په دې چې د کرونا ویروس د واکسین په اړه د ولسمشر ډونالډ ټرمپ د ادارې په پالیسیو انتقادونه روان دي امریکايي چارواکو له ۶۵ کلونو په ډېر عمر لرونکو باندې د واکسین تطبیق لازمي ګرځولی.
د امریکا د جانزهاپکنز پوهنتون د شمېرو له مخې په امریکا کې د کرونا مثبتې پېښې نږدې درویشتو میلیونو (۲۲۸۳۸۱۱۰) ته پورته شوي دي چې له ډلې یې څه باندې درې لکه او اتیا زره تنه ( ۳۸۰۶۷۰ ) مړه شوي.
په ټوله نړۍ کې بیا د کرونا د مثبتو پېښو شمېر له ۹۱ میلیون او پنځو لکو تېر شوی او له ډلې یې نږدې دوه میلیونه (۱۹۶۲۲۱۹) کسان مړه شوي.
د ورځې تازه خبرونه دلته ولولئ
د پاکستان په بلوچستان کې د پولیو یوه بله پېښه ثبت شوه
د پاکستان په بلوچستان ایالت کې د پولیو یوه بله پېښه ثبت شوه.
ځايي چارواکي وايي چې پرون شنبه په قلعه عبدالله کې د یوه ۱۵ میاشتني ماشوم د پولیو ویروس تایید شو.
له دې سره سږ کال په پاکستان کې د پولیو پېښې ۲۱ ته ورسېدې.
په دغو پېښو کې ۱۴ په بلوچستان کې ثبت شوي دي.
افغانستان او پاکستان په نړۍ کې هغه دوه هېوادونه دي چې لا هم د پولیسو ویروس پهکې له منځه نه دی تللی.
حزبالله د اسراییل په شمال کې پر څو سیمو تر ۱۰۰ زیات توغندي ویشتلي
د لبنان حزبالله نن سهار وختي د اسراییل په شمال کې پر څو سیمو تر ۱۰۰ زیات توغندي وویشتل.
دې ډلې، چې د متحدوایالتونو لهخوا یوه تروریستی ډله بلل کېږي، وویل چې ځینې توغندي یې د حیفا ښار ته نږدې لګېدلي دي.
داسې ښکاري چې د جګړې ښکېل اړخونه د تاوتریخوالي له زیاتوالی وروسته د بشپړې د پراخې جګړې په لور روان دي.
د تېرې شپې له توغندويي برید وروسته د اسراییل په شمال کې د هوایي بریدونو لپاره د خطر زنګ ووهل شو او په زرګونه خلک پناه ځایونو ته ولېږدول شول.
د اسراییل پوځ ویلي چې توغندي د ملکي سیمو په لور ویشتل شوي دي.
د اوکراین هوایي ځواک د روسیې د ۷۱ پیلوټه الوتکو د ویشتلو خبر ورکړ
د اوکراین هوایي ځواک نن یکشنبې وویل چې هوایي دفاعي سیستمونو یې تېره شپه د روسیې له ۸۰ بې پیلوټه الوتکو څخه ۷۱ ویشتلي دي.
د اوکراین هوایي ځواک دا هم ویلي چې روسیې د اوکراین له لوهانسک سیمې څخه دوه توغندي ویشتلي دي.
خو په دې اړه یې څه نه دي ویلي چې توغندي چېرته لګېدلي او آیا د سر او مال تاوانونه یې اړولي او که نه.
په ورته وخت کې د روسیې دفاع وزارت ویلي چې د هوایي دفاع ځواکونو یې تېره شپه د اوکراین ۱۵ بې پیلوټه الوتکې ویجاړې کړي دي.
د ایران په یوه کان کې چاودنې لږترلږه ۳۰ کسان وژلي
د ایران د خراسان جنوبي ولایت په طبس ښار کې د ډبرو سکرو په یوه کان کې د چاودنې له امله لسګونه کسان وژل شوي دي.
د ایران دولتي خبري اژانس ایرنا ویلي، په دې چاودنه کې چې د میتان ګازو د لیک له امله شوې، لږترلږه ۳۰ کسان وژل شوي او لسګونه نور ټپیان دي.
چاودنه د شنبې په شپه شوې ده.
په پیل کې، ایراني رسنیو د يوه تن د مړينې او په تونل کې د کارګرانو د راګير پاتې کېدو راپورونه ورکړي وو.
اسراییلي ځواکونو په رامالله کې د الجزیرې شبکې پر دفتر یرغل وروړ او د هغه د تړلو امر یې وکړ
د الجزیرې خبري شبکې راپور ورکړ چې اسراییلي ځواکونو نن سهار د اشغال شوې لوېدیځې غاړې په رامالله کې د دې شبکې پر دفتر چاپه اچولې او کارکوونکو ته یې ویلي چې خپل دفتر بند کړي.
اسوشېټېډپرېس اژانس راپور ورکړی چې الجزیرې پر خپل دفتر د اسراییلي پوځیانو د حملو ژوندي تصویرونه خپاره کړل.
د الجزیرې شبکې د راپور له مخې، اسراییلي ځواکونه، چې په وسلو سمبال وو او ماسکونه یې پرمخ وو، د تلوېزیون د ژوندۍ خپرونې په ترڅ کې دفتر ته ورننوتل او امر یې وکړ چې دا دفتر دې د اوس لپاره تر ۴۵ ورځو پورې بند وي.
اسراییلي ځواکونو تراوسه په دې اړه څه نه دي ویلي.
د چک جمهوریت په پارلماني ټاکنو اپوزیسیون مخکښ بلل شوی
په چک جمهوریت کې د پارلماني ټاکنو د خپرو شویو لومړنیو پایلو له مخې، د واکمن ګوند اپوزیسیون یا "اېایناو" ډېرې رایې ترلاسه کړي دي.
د چک جمهوریت د احصايي ادارې پرون ویلي، د اپوزیسیون اصلي ګوند په تېرو دوو ورځو کې له ۱۳ سیمو څخه په لسو سیمو کې سیالۍ وکړې او دا رایې يې ترلاسه کړې دي.
د راپورونو پر بنسټ، د ټاکنو پایلې د اپوزیسیون ګوند څخه د چک د خلکو ملاتړ ښکاره کوي.
هاریس د اکټوبر په ۲۳مه په تلوېزیوني مناظره کې د ګډون وړاندیز ومانه
د امریکا د ولسمشر مرستیالې او د ډیموکرات ګوند کاندیدې کاملا هاریس د سيایناین CNN تلوېزیونې شبکې هغه وړاندیز ومانه چې د اکټوبر په ۲۳مه به په یوې مناظره کې ګډون کوي.
د هاریس ټاکنیز کمپاین د شنبې په ورځ ویلي وو، د جمهوري غوښتونکو کاندید ډونالډ ټرمپ هم باید په دې مناظره کې ګډون وکړي.
له دې وړاندې د سيایناین په ورته مناظره کې د روان کال په جون میاشت کې ډونالد ټرمپ ګډون کړی و چې یوه بریالۍ مناظره يې بللې وه.
ټرمپ د هغې مناظرې د تنظیموونکو او د سيایناین د مدیرانو ساتینه هم کړې وه.
د جون په ۲۷مه ټرمپ له بایډن سره په یوې مناظره کې ګډون کړې و چې بایډن په کې په ښه توګه له خپل دریځ څخه دفاع ونه کړای شوه او په پایله کې کاملا هاریس د هغې پر ځای د راتلونکو ټاکنو لپاره کاندیده شوه.
په لاهور کې د عمران خان د خوشې کېدو په پار رابلل شوې ناسته پای ته ورسېده
په لاهور کې د پاکستان د تحریک انصاف ګوند یا پيټيآی هغه ناسته پای ته ورسېده چې د پخواني صدراعظم عمران د خوشې کېدو په پار د هغه د پلویانو لهخوا رابلل شوې وه.
د دې ګوند مشر ګوهرعلي خان پرون شنبې د سپټمبر۲۱مه ویلي، د پنجاب له حکومت سره د ټاکلو شرایطو له مخې يې ناسته پای ته رسولې ده.
د پېښور په ګډون د پاکستان له ډېرو ښارونو د پيټيآی د زرګونو پلویانو کاروانونه له تېرې ورځې راهیسې لاهور ته روان وو.
په اسلامآباد کې د مشال راډیو خبریال وايي، د خیبرپښتونخوا وزیر اعلی علي امین ګنډاپور چې د نیولو امر يې شوی دی، ونه توانېده چې دې ناستې ته ورسېږي.
د پاکستاني رسنیو د راپورونو پر بنسټ، که څه هم دې ناستې ته ډېر خلک ورغلي وو، خو د دې هېواد د اطلاعاتو او نشراتو وزیر ویلي چې پيټيآی د خپلو پلویانو په راټولو کې پاتې راغلی دی.
د زنداني عمران خان پلویانو له دې وړاندې هم د هغه د خوشې کېدو په پار وړاندې ناستې او لاریونونه ترسره کړي دي.
په لبنان کې د اسراییلو د هوايي برید له کبله د وژل شویو کسانو شمېر ۳۷ ته رسېدلی
د لبنان روغتیا وزارت ویلي چې په بیروت کې د اسراییلو د هوايي برید له کبله د وژل شویو کسانو شمېر ۳۷ ته رسېدلی دی.
په وژل شویو کې ۳ ماشومان او اوه ښځې هم شاملې دي.
د اسراییلو پوځ بیا ویلي چې د جمعې په ورځ یې په بیروت کې د حزبالله ډلې یوه غونډه هدف ګرځولې چې ۱۶ کسان یې پهکې وژلي دي.
د لبنان حزبالله ډلې تایید کړې چې په دې برید کې د دوی یو بل جګپوړی قومندان احمد محمود وهبي هم وژل شوی دی.
مخکې په دې برید کې د احمد عقیل وژنه هم تایید شوې وه.
د حزبالله په خبره چې وهبي د تېر کال له اکټوبر راهیسې د اسراییل پر ضد د پوځي عملیاتو مشري په غاړه درلوده.
په پاکستان کې درې نور ماشومان ګوزڼ وهلي
په پاکستان کې درې نور ماشومان ګوزڼ وهلي دي.
د پولیو مخنیوي پروګرام په یوه بیان کې ویلي چې تازه پېښې په بلوچستان، خیبر پښتونخوا او سند ایالتونو کې ثبت شوي دي.
په خیبر پښتونخوا کې سږ کال د پولیو دا لومړۍ پېښه ده.
په پاکستان کې تېر ۲۰۲۳م کال کې د ګوزڼ شپږ پېښې ثبت شوې وې چې ورڅخه یې څلور ماشومان د خیبر پښتونخوا او دوه د سیند اوسېدونکي وو.
په پاکستان سربېره، افغانستان کې هم د پولیو پېښې ثبت شوي دي.
افغانستان او پاکستان دوه هغه هېوادونه دي چې د پولیو ویروس په کې لا ژوندی دی.
سږ کال بیا په جنګ ځپلې غزه کې هم د پولیو مثبتې پېښې راپور شوي.