د ملګرو ملتونو د بشري حقونو پلټونکو د عراق له حکومته غوښتي چې خپل نړیوال مسؤلیتونه درک او ژر تر ژره دې د بندیانو له اعدامولو لاس واخلي.
دوی دا غوښتنه وروسته له هغې کړې چې د پلټنو په لړ کې دې پایلې ته رسیدلي چې لسګونه کسان په عراق کې د دوی په خبره د غیر عادلانه محاکمو په لړ کې په اعدام محکوم او سزا پرې پلې شوې ده.
د ملګرو ملتونو د بشري حقونو د پلټونکو ډلې په یوه اعلامیه کې ویلي چې بندیان ډېری وختونه له لومړنیو حقونو محروم شوي او د پوښتنو ګرویږنو په وخت د هغوی د ځورونې شکایتونه چا نه دي څېړلي.
ملګري ملتونه وايي عراق کې د غیر عادلانه محاکمو په پایله کې لسګونه کسان اعدام شوي دي.
له دې ډلې د دوی په خبره ښايي د دوشنبې په ورځ ۵۰ تنه اعدام شي.
د ملګرو ملتونو د بشري حقونو کمېشنرۍ سازمان ویلي چې د نوومبر په ۱۶مه نېټه په یوه ورځ ۲۱ نور کسان هم اعدام شوي او تر هغه مخکې د رویټرز د راپور له مخې په اکتوبر کې ۲۱ کسان د ناصریه په مرکزي زندان کې چې په الحوت محبس مشهوره دی هم اعدام شوي وو.
د ملګرو ملتونو پلټونکو ویلي چې څلور زره بندیان په عراق کې د ترهګرۍ اړوند جرمونو په تړاو په اعدام محکوم شوي.
که د دغو بندیانو د اعدام حکم لاسلیک شي، وېره یې شته چې یو ځل به په ټولو باندې سزا پلې شي.
د عراق حکومت تر اوسه پورې د بشري حقونو د دغو پلټونکو د اعلامیې او غوښتنو په تړاو څه نه دي ویلي.
د ملګرو ملتونو د بشري حقونو د سازمان مشرې مېشل باچلیت تېره اوونۍ په عراق کې د ۲۱ کسانو تر اعدام وروسته له عراقي حکومته وغوښتل چې پاتې اعدامونه دې بند کړي.
مېرمن میشل زیاته کړې وه چې دوی د عادلانه محکمې له اصولو د سرغړونې، د دفاع د ښو شرایطو د نشتوالي، په اعترافونو باندې له حده زیاتې اتکا او د پرله پسې ځورونو ګڼې ادعاوې ثبت کړي دي.
