په سیمه کې د ازادي راډیو خبریال وايي چې په پروان کې د "دولت جوړوونکي" ټاکنیز ټیم کمپایني غونډې ته څېرمه د نن غرمې له چاودنې ۲ مړي او ۱۴ ټپیان د دغه ولایت روغتون ته لېږدول شوي دي.
د افغانستان د کورنیو چارو وزارت ویاند نصرت رحیمي وايي، نن له غرمې مخکې شااوخوا ۱۱:۴۰ دقیقې د پروان مرکز چارېکار ښار لومړۍ حوزې اړوند روزنیز مرکز لومړي نظام قراول کې چاودنه شوې ده.
ښاغلی رحیمي زیاتوي د "دولت جوړوونکي" ټاکنیز ټیم کمپایني غونډه کې چا ته زیان نهدی رسېدلی او کمپاین دوام کړی.
د پروان د امنیه قوماندانۍ د امنیت امر عبدالواسع ګلبهاري ازادي راډیو ته وايي چې په چارېکار ښار کې د نن له غرمې مخکې چاودنې تر اوسه ۲۴ مړي او ۳۶ ټپیان روغتون ته لېږدول شوي دي.
د پروان د ولایتي روغتون رئیس قاسم سنګین ازادي راډیو ته وايي چې په چارېکار ښار کې د نن له غرمې مخکې چاودنې د ښځو او نارینهوو په شمول تر اوسه ۲۴ مړي او له ۳۰ زیات ټپیان روغتون ته لېږدول شوي او د ۱۱ ټبيانو روغتیايي وضعیت د اندېښنې وړ دی.
تر اوسه د دغې حملې مسؤلیت چا نهدی منلی.