د افغانستان د سولې لپاره د امريکا د بهرنيو چارو وزارت ځانګړي استازي زلمي خليلزاد او ولسمشر محمد اشرف غني د بينالافغاني ډيالوګ په پيلېدو کې د جرمني پر رول خبرې وکړې.
دواړو لورو پهدې اړه تېر ماښام په جمهوري رياست کې د کتنې پر مهال هيله ښوولې چې ډېر ژر به د بينالافغاني ډيالوګ لومړى دور پيل شي.
په وروستيو کې جرمني د بينالافغاني خبرو د کوربهتوب لپاره چمتووالى ښوولى و.
په قطر کې د طالبانو د سياسي دفتر وياند سهيل شاهين تېره پنجشنبه ازادي راډيو ته ويلي وو چې د جرمني پر دغه وړاندیز غور کوي.
ښاغلي خليلزاد نن سهار وختي په ټويټر کې وليکل چې له ولسمشر غني سرهيې پر دې هم خبرې وکړې چې د سولې لپاره نوره نړيواله اجماع هم رامنځته شي.
زلمي خليلزاد ليکلي، پهداسې حال کې چې د افغانستان د سولې په خبرو کې پرمختګ دوام لري، دوى موافقه وکړه چې د بينالافغاني خبرو دوام ضروري دى.
په کابل کې د امريکا سفارت پرون ماښام په يوه اعلاميه کې ويلي چې زلمى خليلزاد به د حکومتي مشرانو ترڅنګ له سياستوالو، د مدني ټولنو او ښځو له استازو سره هم خبرې وکړي.
بلخوا د پخواني ولسمشر حامد کرزي دفتر وايي، زلمي خليلزاد تېر ماښام له حامد کرزي سره هم د افغانستان د سولې په پروسه کې پر راروانو اقداماتو خبرې وکړې.
زلمى خليلزاد چې تر اوسهيې شپږ وارې په قطر کې د طالبانو له استازو سره کتلي، د افغانستان، سيمې او اروپا په اووم سفر وتلى دى.
هغه تر دې مخکې په بلجيم، تر هغه وړاندې په جرمني او بيا په پاکستان کې د افغانستان د سولې پر مسئله له چارواکو سره خبرې کړې دي.
په پام کې ده د افغانستان د سولې لپاره د امريکا د بهرنيو چارو وزارت ځانګړى استازى خليلزاد به متحده عرب اماراتو او قطر ته هم لاړ شي.
وسلهوال طالبان تر اوسه د افغانستان له حکومت سره مخامخ خبرو ته نهدي حاضر شوي.