د افغان حکومت اجرائيه ریاست وايي، په دوحه کې د افغانستان د سولې لپاره د امریکا ځانګړي استازي زلمي خلیلزاد او طالب استازو ترمنځ د خبرو نتيجې ته سترګې په لاره دي.
د دې رياست د وياند مرستيال امید میثم وايي، تمه لري زلمی خليلزاد له طالبانو سره په خبرو کې د بینالافغاني مذاکراتو اړوند لاسته راوړنې ولري.
دی وايي:
"زموږ نړیوال همکاران د پروسې د اسانه کوونکو رول لوبوي چې د خبرو مستقیمه زمینه برابره شي. همداسې لکه ښاغلي خلیلزاد چې اشاره کړې، څلور موضوعات چې هغوی اعلان کړي چې د دوی او طالبانو ترمنځ به ورباندې د خبرو تمرکز وي. له هغو څخه یوه موضوع د بینالافغاني خبرو مسئله ده. له امریکا زموږ تمه دا ده چې د هغو هڅو نتيجه دا شي چې موږ بینالافغاني خبرو ته ورسېږو."
ښاغلي میثم پرون دوشنبه ماښام ازادي راډيو ته وويل، د بینالافغاني خبرو په خاطر د ټولشموله پلاوي ټاکلو په برخه کې د حکومت هڅې دوام لري.
ښاغلی میثم زیاتوي:
"هغه پلاوی چې هم افغان حکومت او د هغو ټولو لورو چې د مدني ټولنې، ښځو د حقونو او اغېزناکو سیاسي جریاناتو استازيتوب وکړای شي، پر جوړولو یې کار دوام لري او معرفي به شي، خو هغه څه چې مهم دی باید له طالبانو سره د مستقیمو خبرو زمینه برابره شي چې په افغانستان کې سولې او ثبات ته لاره پرانیستل شي. "
ټاکل شوې ده د امريکا ځانګړی استازی زلمی خلیلزاد له طالبانو سره د افغانستان ۱۸ کلنې جګړې ته د پای ټکی ايښودو په هدف نن سې شنبې د قطر په پلازمېنه دوحه کې یو ځل بیا خبرې پیل کړي.
پهدغو خبرو کې د دوشنبې په ورځ د روژې میاشتې د لومړۍ ورځې په خاطر وقفه راغله.
په قطر کې د طالبانو د سیاسي دفتر وياند سهیل شاهین پرون ماښام ازادي راډيو ته وويل، له افغانستانه د نړيوالو ځواکونو د وتلو په اړه او دا چې د افغانستان خاوره به د هېڅ هېواد پر وړاندې نهکارېږي، پر دغو موضوعاتو به تمرکز کېږي او خبرې به د ځايي وخت د سهار له ۱۰ د مازیګر تر درېيو بجو دوام وکړي.
خو زلمي خليلزاد د شپږم دور خبرو په لومړۍ ورځ د پنجشنبې په ورځ پر خپله ټويټر پاڼه ولیکل، د سولې ترلاسه کولو په خاطر باید پر څلورو اړوندو موضوعاتو توافق تر لاسه شي.
د ده په وینا پر؛
- له افغانستانه د بهرنيو ځواکونو وتل.
- د ترورېزم پر وړاندې د مبارزې تضمين.
- بینالافغاني خبرې.
- او د تاوتریخوالي کمول چې پر هر اړخيز اوربند ولاړ وي
موضوعاتو به د خبرو تمرکز وي.
ده لیکلي چې تر هغه وخته چې د دغو څلورو موضوعاتو په اړه توافق نهوي شوی هېڅ نتيجه به نهاخیستل کېږي.
د راپور له مخې، امريکا او طالبان له افغانستانه د نړيوالو ځواکونو د وتلو لپاره د مهالوېش جوړولو او پهدې هېواد کې د اوربند رامنځته کولو پر سر اختلاف لري.
طالبانو ويلي چې تر هغه وخته چې امريکا مهالوېش نهوي اعلان کړی هېڅ اقدام نهکوي.
د طالبانو د ډلې يوه پخواني غړي سید اکبر اغا ازادي راډيو ته وويل چې د طالبانو او خلیلزاد په خبرو کې له افغانستانه د بهرنيو ځواکونو د وتلو موضوع طالبانو ته ډېره مهمه ده.
په افغانستان کې اوربند يوازې د خليلزاد غوښتنه نهده.
د سولې لپاره د مشورتي لویې جرګې ۳۲۰۰ غړو د روژې د مياشتې پر مهال د اوربند غوښتنه کړې ده.
ولسمشر محمد اشرف غني ويلي چمتو دی چې دا پرېکړهلیک په جديت عملي کړي.
خو طالبانو نهيوازې د اوربند غوښتنه نهده منلې، بلکې په عین حال کې يې د روژې مياشتې په رارسېدو سره د بغلان په ګډون په ګڼو ولایتونو کې پر افغان امنیتي ځواکونو حملې کړې دي.