- واشنګټن پوسټ
واشنګټن پوسټ ورځپاڼې تر دې سرلیک لاندې لیکنه خپره کړې:
«خاوند یې د سولې له خبرو اړخ ته شوی، خو د افغانستان لومړۍ مېرمن ښځې راغونډوي.» تر دې عنوان لاندې راغلي دي چې په افغانستان کې د متحده ایالاتو او طالبانو د سولې خبرې ډېرو ښځو ته د طالبانو د رژیم تورې ورځې سترګو ته دروي، هغه وخت چې ښځې له خپلو ډېرو بنیادي حقونو څخه بېبرخې شوې وې.
ورځپاڼه لیکي:
کېدای شي چې د سولې له خبرو سره بیا طالبان واک ته ورسېږي او له دې خبرو تر دې دمه د ولسمشر اشرف غني حکومت بهر پاتې شوی دی، خو د هغه مېرمنې رولا غني پهدې خبرو کې د ښځو د ونډې په برخه کې یو پیاوړی غږ راپورته کړی دی.
واشنګټن پوسټ وړاندې لیکي، د افغانستان د لومړۍ مېرمنې هڅو د ښځو هغه حرکت پیاوړی کړی چې ورته وایي، افغان مېرمنې به شاته ولاړې نهشي.
ورځپاڼه څرګندوي چې اوس افغان مېرمنې په حکومت کې شته، پوهنتونونو ته ځي، د بشري حقونو په ډلو کې پیاوړی حضور لري او په پلازمېنه کابل کې نارینه او ښځې کافي شاپونو ته ځي، نو د طالبانو د وخت او اوس ډېر زیات توپیر دی.
واشنګټن پوسټ لیکي:
لومړۍ مېرمنه غواړي چې د سولې په خبرو کې د افغان مېرمنو غږ واورېدل شي، ورځپاڼې د رولا غني دا خبره را اخیستې ده چې وایي، موږ د دې لپاره هڅې کوو چې پوه شو چې:
- ښځې په حقیقت کې څه غواړي؟
- د دوی فکر څه دی؟
- دوی څه ته لومړیتوب ورکوي؟
- د سولې په خبرو کې څه ته دوی د خنډ په سترګه ګوري؟
ورځپاڼه بیا لیکي، تر اوسه پورې په قطر کې د امریکایانو او طالبانو په تېرو پنځو پړاوه خبرو کې هېڅ ښځې برخه نهده اخیستې او د مسکو په غونډه کې د میز شااوخوا ۴۲ تنه وو چې یوازې دوهیې مېرمنې وې.
- ګارډین
له افغانستانه د پخواني شوروي اتحاد د سره پوځ د وتلو په اړه پر یوه فلم د روسانو نیوکو ته د لوېدیځ یوې بلې ورځپاڼې، ګارډین پاملرنه کړې ده.
د ورځپاڼې په باور، جنجال وروسته تر دې پیل شو چې سیاستوالو او د سره پوځ پخوانیو سرتېرو انتقاد وکړ چې:
- ولې د سره پوځ ځواکونو ته پهدې فلم کې وطندوستان نهدي ویل شوي؟
دا فلم په افغانستان کې د یوه پخواني پوځي نیکولای کووالیوف د تجربو پر بنسټ پاول لنګین جوړ کړی دی.
د فلم کیسه داسې ده چې شوروي پوځیان هڅې کوي چې له مجاهدینو د خپل یوه جنرال برمته شوی زوی وژغوري او د دې لپاره له افغانستانه د سره پوځ د وتلو پروګرام ځنډېدلی دی.
لنګین تېر کال د ورایتي په نوم مجلې ته ویلي و چې دا فلم د جګړې د بېرحمۍ او بېمنطقۍ تصویر دی.
ګارډین لیکي:
د سره پوځ یو شمېر پخوانیو سرتېرو له ولسمشر ولادیمیر پوتین څخه غوښتي دي چې د دې فلم د خپرېدو مخه ونیسي، ځکه چې د دوی په باور د دې فلم خپرېدل روسیې ته زیان اړوي.
ورځپاڼې د روسیې د اطلاعاتو د وزیر ولادیمیر میدنسکي په وینا لیکلي دي چې دا فلم دې لکه څرنګه چې ټاکل شوې د مې په نهمه نهخپرېږي.
پهدې نېټه روسیه د نازي المان پر ضد په نړیواله دوهمه جګړه کې خپله بریا لمانځي.
په افغانستان کې د پخواني شوروي اتحاد ۱۰ کلن پوځي حضور په ۱۹۸۹ میلادي کال کې پای ته ورسېد.
پهدې موده کې د سره پوځ نږدې ۱۵ زره پوځیان ووژل شول.