- واشنګټن پوسټ
واشنګټن پوسټ ورځپاڼې د امريکا او طالبانو تر منځ خبرو ته پام کړی او لیکلې يې دي: دا اقدام د افغانستان په جګړه کې يو پرمختګ دی.
د ورځپاڼې په وينا، د کوچني اختر پر مهال موقتي اوربند او اوس د يوه لوړ پوړي امریکایي ډیپلوماټ او په قطر کې د طالب وسله والو تر منځ کتنه یو مهم پرمختګ دی.
واشنګټن پوسټ ليکلي:
د سولې لپاره د لېوالتيا په برخه کې امريکا او طالبانو توافق کړی چې خبرو ته به دوام ورکوي.
يوه طالب چارواکي: دوه اړخيزه ليدنه په دوحه کې په يوه هوټل کې شوې چې ډېرې مثبتې نښانې يې لرلې
ورځپاڼې د يوه طالب چارواکي له قوله ليکلي چې دوه اړخېزه ليدنه په دوحه کې په يوه هوټل کې شوې چې ډېرې مثبتې نښانې يې لرلې.
د افغان حکومت استازي چې په علني توګه د افغانانو په مشرتابه د سولې د ابتکار په اړه خبرې کوي، د طالبانو په وينا په قطر کې يې په ياده غونډه کې ګډون نه درلود.
د واشنګټن پوسټ په وينا، د دې دليل چې طالبانو څه ډول په دوحه کې په مذاکراتو کې ګډون وکړ ډېر روښانه هم نه دی خو یو شمېر کارپوهان وايي:
سخت دريځې د جګړې په ډګر کې برلاسي دي او د سولې د خبرو لپاره هېڅ ډول انګېزه نه ويني، نو ښايي مشران يې حيران شوي وي چې د جون مياشتې اوربند ورته فرصت برابر کړ چې د خپلو غوښتنو لپاره امریکا تر فشار لاندي راولي.
- ګارډين ورځپاڼه
بریتانوي ورځپاڼې ګارډين لیکلي:
د داعش ډلې په حملو کې زياتوالي ته په کتو، افغانستان او امریکا ښايي په دې جګړه کې له طالبانو د مرستې غوښتنه کړې وي.
د ورځپاڼې په وينا، د داعش وروستۍ حملې ښايي د ننګرهار ولايت په لسو ولسوالیو کې د افغان او امريکايي ځانګړو ځواکونو عملیاتو په عکس العمل کې وي.
ګارډين دا هم ويلي چې د طالبانو او داعش ډلې تر منځ د مځکې پر سر او سیاسي مخالفتونه له ۲۰۱۴میلادي کال راهيسې دوام لري.
یو شمېر څېړونکو ورځپاڼې ته ويلي چې په افغانستان کې د داعش په اړه د امریکا اندېښنه د ايران او امریکا هم ده او دا په داسې حال کې ده چې روسیه او ايران دواړه له طالبانو سره د وسلو په برخه کې او نظامي مرستې کوي.
د ګارډين په ويناوو ويل کېږي د داعش ډلې خراسان څانګه د طالبانو له تښتېدلو غړيو، له عراق او سوريې څخه تښتېدلو سخت دريځو او د سوډان، چيچينیا، ازبکستان او تاجکستان له سخت دريځو جوړه ده.
په داسې حال کې چې داعش ډله د افغانستان په ختيځ او شمال کې په تهديد بدله شوې ده، شاوخوا دوه نيم سوه سخت دريځې يې په جوزجان ولايت کې د سې شنبې په ماښام افغان ځواکونو ته تسلیم شول.
د جوزجان د چارواکو په وینا، داعش سخت دريځې په درزاب ولسوالۍ کې د طالبانو د جګړې تر فشار لاندې راغلي وو او له دولت سره یو ځای شول.
- ټايمز ورځپاڼه
ټايمز ورځپاڼې د افغانستان د ولسمشريزو انتخاباتو د نېټې په اړه ليکلي دي.
د ورځپاڼې په وينا، د راتلونکي کال د حمل مياشتې انتخابات چې تر هغه مخکې د سږ کال په ميزان مياشت کې د ملي شورا انتخابات له ځينو ستونزو سره مخامخ دي.
ټايمز: امنيت یوه ډېره مهمه مسئله ده، ښايي انتخابات له ستونزو سره مخامخ شي
لومړی د ټايمز په وينا، امنيت یوه ډېره مهمه مسئله ده.
وروسته ښايي انتخابات له ستونزو سره مخامخ شي او د لاس وهنو او درغليو تورونه پورې شي.
د انتخاباتو د کمېسیون د پريکړې پر اساس، د ولسمشرۍ انتخاباتو ته نوماندان به تر نوومبر مياشت مخکې نومونه ثبت کړي.
تايمز دا هم ليکلي چې ويل کېږي، ولسمشر محمد اشرف غني یو ځل بیا د پنځه کلنې دورې لپاره ځان کانديد کړي او دا په داسې حال کې چې د ورځپاڼې په وينا د ۲۰۱۴میلادي کال په انتخاباتو کې د درغليو تورونه وو چې د اعتراضونو په نتيجه کې د عبدالله عبدالله له ټيم سره د ملي وحدت حکومت جوړ شو.